Real Madrid yatsinze FC Barcelona mu mataha, igikombe gisa nkaho kigiye

Ni umukino wabaye kuri iki Cyumweru saa tatu z'ijoro kuri Santiago Bernabeu.

Ikipe ya Real Madrid yatangiye umukino ihererekanya neza gusa ikabikorera mu kibuga hagati. 

Ku munota wa 6 gusa FC Barcelona yahise ibyaza amahirwe umusaruro itungura Real Madrid iyiterekamo igitego cya 1 gitsinzwe na Andreas Christensen akoresheje umutwe kuri koroneri yaritewe na Raphinha.

Nyuma yo gutsindwa ikipe ya Real Madrid yahise ijya mu mibare yo gushaka igitego itangira gusatira cyane. 

Ku munota wa 18 Lucas Vazquez yinjiye mu rubuga rw'amahina maze myugariro wa FC Barcelona Cubarsi amutereka hasi umusifuzi ahita ataga penariti.

Yahise iterwa na Vinicius Junior ayitereka mu izamu  igitego cyo kwishyura kiba kirabonetse. 

Ikipe ya FC Barcelona yakomeje gukina irusha Real Madrid kubona uburyo buremereye imbere y'izamu ndetse hari naho byashobokaga kubona penariti ku ikosa ryari rikorewe kuri Lamine Yamal gusa umusifuzi arasanza.

Real Madrid nayo yagiye inyuzamo ikabona uburyo bwiza imbere y'izamu nkaho Valverde yarekuye ishoti riremeye ku munota wa 34 gusa Andre Ter Stegen akora akazi arikuramo.

Igice cya mbere cyarangiye amakipe yombi anganya igitego 1-1. 

 Mu gice cya kabiri Real Madrid yaje igerageza uburyo bwo gushaka igitego cya 2. Ku munota wa 55 Vinicius Junior yabonye uburyo asigaranye n'umunyezamu wenyine ku mupira yarahawe na Jude Bellingham gusa arekuye ishoti rinyura hejuru y'izamu kure.

Kuwa 69 Fermin Lopez wa FC Barcelona yatsinze igitego cya 2 cya FC Barcelona ariko nyuma y'iminota 4 gusa Lucas Vazquez ahita akishyura ku mupira yarahawe na Vinicius Junior.

Umukino ugiye kurangira Jude Bellingham yatsinze igitego cya 3 cya Real Madrid ahawe umupira na Lucas Vazquez baba batsinze FC Barcelona ibitego 3-2 gutyo.

Birasa nkaho igikombe cya shampiyona kigiye kwa Real Madrid kubera ko ihise igira amanota 81 ikaba irusha FC Barcelona iyikurikiye amanota 11.