Tour de France 2021: Tadej Pogacar yakoze amateka yo kwegukana irushanwa ku nshuro ya kabiri yikurikiranya

Kuri iki Cyumweru tariki ya 18 Nyakanga 2021, nibwo hasojwe irushanwa rikomeye kurusha andi yose ku Isi mu mukino w’amagare ‘Tour de France’ byarangiye ryisubijwe n’umunya-Slevenia, Tadej Pogacar uikinira ikipe ya UAE yo mu barabu.

Pogacar utarigeze arekura umwenda w’umuhondo kuva yawambura Jonas Vingegaard wa Jumbo-Visma, yegukanye irushanwa amusize iminota 5 n’amasegonda 20 ndetse anarusha Richard Carapaz wa Ineos Grenadiers iminota 7 n’amasegonda 03.

Tadej Pogacar wa UAE Team Emirates yatwaye Tour de France 2021, akoresheje amasaha 82, iminota 56 n’amasegonda 36.

Uretse umwambaro w’umuhondo, Pogacar yegukanye umwambaro w’umukinnyi uzamuka [polka-dot] n’umwambaro w’umweru uhabwa umukinnyi ukiri muto, ibintu nanone akoze mu myaka 2 yikurikiranya.

Mark Cavendish ukinira Deceuninck-QuickStep niwe wegukanye umwenda w’icyatsi, uhabwa umukinnyi wihuta ahatambika ku manota 337.

Agace ka nyuma ka Tour de France 2021 kakinwe ku Cyumweru, kegukanwe n’Umubiligi Wout Van Aert ukinira ikipe ya Jumbo Visma nyuma yo gutsinda igihangange Mark Cavendish washakaga gukora amateka muri iri rushanwa cyane ko anganya uduce amaze kwegukana na Eddy Merckxx ufite amateka akomeye muri Tour de France.

Wout Van Aert yegukanye agace ka 3 we wenyine muri Tour de France 2021, mu gihe Mark Cavendish ariwe wegukanye uduce twinshi 4. Tadej Pogacar nawe yegukanye 3.

Pogacar yegukanye Tour de France ku nshuro ya kabiri yikurikiranya