Vincent Niyibizi wavuye kuri TV1 akerekeza kuri Royal TV, arimo gukabya inzozi yagize ari umwana muto

Nk’uko yabisobanuye mu kiganiro yagiranye n’umunyamakuru wa Inyarwanda.com, Vincent Niyibizi yakuze akunda cyane abanyamakuru, ndetse ubwo yari akiri igitambambuga yifuzaga kuba yamena radiyo ngo abashe kwirebera abanyamakuru bavugiramo, n’ubwo icyo gihe byari iby’ubwana ariko byari ikimenyetso cy’urukundo yagiriye itangazamakuru akiri muto cyane.

Vincent Niyibizi yamenyekanye cyane nk'umunyamakuru wa TV1

Guhora yifuza ko nawe nakura yazaba umunyamakuru, byatumye abihigira hasi kubura hejuru, maze mu mwaka wa 2011 aza kubasha gukora kuri Radio y’abaturage yitwa Ishingiro, ndetse ahita anatangira kwiga mu ishuri ry’itangazamakuru. Yatangiye kwiyumva nk’ukabya inzozi, urugendo rwe mu itangazamakuru rukomeza kumuhira kugeza n’ubu.

Yaje kuva kuri Radiyo Ishingiro, akomereza kuri Voice of Africa, aho yavuye ajya kuri Radio One ndetse TV1 yatangira agahita ashyirwa mu banyamakuru bayikozeho mu ishami ry’amakuru, abantu benshi bakaba ari naho bamumenyeye. Avuga ko umunsi wa mbere agaragara kuri Televiziyo, yari yifitemo ubwoba kuko atari abimenyereye, ariko akaba yaraje kubibasha ndetse abantu benshi bakunda uburyo yavugaga amakuru kuri televiziyo.

Uyu musore wishimira uburyo mu Rwanda hakomeje kuza amateleviziyo menshi, yamaze kujya kuri Royal TV yahoze yitwa Lemigo TV, avuga ko ashimira TV1 yahozeho n’ubuyobozi bwayo, akanaboneraho kwizeza abakunzi be ko agiye gukora ibishoboka byose bakazanyurwa n’ibyo we n’ikipe ya Royal TV bazagenda babagezaho. Avuga ko mu bijyanye n’umwuga w’itangazamakuru, abona agenda akabya inzozi yagize kuva mu buto kandi akaba yizeye ko azabasha kugera no ku rwego rwisumbuyeho.