RFL
Kigali

FERWAFA yasohoye ingengabihe y’umwaka w’imikino wa 2020/21

Yanditswe na: SAFARI Garcon
Taliki:6/08/2020 15:01
0

Ishyirahamwe ry’umupira w’amaguru mu Rwanda ‘FERWAFA’ ryasohoye ingengabihe y’umwaka w’imikino wa 2020/21, nta gihindutse ugomba gutangira mu Ukwakira 2020 usozwe muri icurasi 2021 mu gihe imikino ya Playoffs ku makipe ashaka kuzamuka mu cya mbere izakinwa guhera tariki 02 kugera 17/10/2020.



Kuri uyu wa Kane tariki 07 Kanama 2020, nibyo FERWAFA yatangaje ko shampiyona y’icyiciro cya mbere mu Rwanda mu bagabo izatangira tariki ya 30/10/2020 irangire tariki ya 29 Gicurasi 2021, mu gihe icyiciro cya kabiri n’abagore bo bazatangira mbere yaho, gusa iri shyirahamwe rivuga ko iyi ngengabihe ishobora guhinduka.

FERWAFA itangaza ko iyi myanzuro yafatiwe mu nama yahuje komite nyobozi yayo tariki ya 31 Nyakanga 2020, Inama yibanze kureba ejo hazaza ku marushanwa iri shyirahamwe ritegura.

Komite ya FERWAFA yanzuye ko shampiyona y’icyiciro cya mbere mu bagabo izatangira tariki ya 30 Ukwakira 2020 isozwe tariki ya 29 Gicurasi 2021.

Shampiyona y’icyiciro cya kabiri mu bagabo izakinwa guhera tariki 31/10/2020 ikazasozwa tariki 29/05/2021.

Shampiyona y’abagore mu cyiciro cya mbere n’icya kabiri na yo ikazakinwa hagati y’amatariki ya 3 Ukwakira na 20 Ukuboza 2020.

FERWAFA yemeje kandi ko imikino ya 1/4 na 1/2 mu cyiciro cya kabiri izakinwa mu mukino umwe gusa imikino ikazabera ahantu hatari hatangazwa mu mujyi wa Kigaki kuva tariki ya 2-17 Ukwakira 2020.

Irushwanwa ry’Intwari rizakinwa kuva tariki ya 19 Mutarama kugeza iya 1 Gashyantare 2021 mu gihe igikombe cy’Amahoro cyo kizakinwa kuva tariki ya 4 Gashyantare 2021 kugeza muri Kamena 2021.

FERWAFA yatangaje kandi ko kwandikisha abakinnyi bazakina shampiyona bizakorwa inshuro ebyiri nk’uko bisanzwe mu mwaka w’imikino, aho inshuro ya mbere abakinnyi bazandikishwa kuva tariki 16/08 kugera tariki 24/10/2020, naho inshuro ya kabiri ikazaba kuva tariki 18/01/2021 kugera tariki 05/02/2021, ibi bikaba ari muri shampiyona y’icyiciro cya mbere mu bagabo.

FEREWAFA itangaza ko iyo byose bikazakorwa hakurikijwe amabwiriza yo kurwanya Covid-19. FERWAFA ivuga ko iyi ngengabihe ishobora guhinduka bitewe n’ingamba zindi Leta yashyiraho zo gukomeza kwirinda ikwirakwizwa ry’icyorezo cya Coronavirus.

Shampiyona y'icyiciro cya mbere mu Rwanda izatangira tariki ya 30/10/2020






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND