Ahabanza Imikino

Gikamba Ismael kapiteni wa Etincelles FC ntazakina na Rayon Sports

Yanditswe na: Mihigo Saddam
Taliki:25/04/2018 6:45 0

Gikamba Ismael kapiteni wa Etincelles FC ntabwo aza kugaragara mu mukino w’igikombe cy’Amahoro 2018 bafitanye na Rayon Sports kuri uyu wa Gatatu tariki 25 Mata 2018 kuri sitade Umuganda bitewe n’ikibazo cy’imvune yagize ku kirenge.

Ubwo Etincelles FC yatsindaga Espoir FC igitego 1-0 mu mukino w’umunsi wa 17 wa shampiyona, Gikamba Ismael yaje gutsikira bimuviramo kubabara imitsi y’ikirenge cy’iburyo. Kugeza magingo aya ntarabasha kuba yatangira imyitozo.

Mu kiganiro yagiranye na INYARWANDA, Gikamba Ismael yavuze ko imvune yagize atari ibintu bidasanzwe byatuma abagwa ahubwo ko bari kumusigiraho imiti banagorora imitsi (Massage) akarenzaho imiti isanzwe amira.

“Ntabwo nzakina na Rayon Sports kubera imvune nagize dukina na Espoir FC. Natambutse nabi ndatsikira. Bari kumvura mu buryo busanzwe bitari ibizasaba ko bambaga kuko ni imitsi yikanze”. Gikamba

Gikamba Ismael yabaye mu ikipe ya Etincelles Fc kuva mu 2015 kugeza ubu aho asigaye ari kapiteni bitewe n’uruhare rw’umusanzu atanga hagati mu kibuga.

Image result for Gikamba Inyarwanda

Gikamba Ismael ubwo yari imbere ya Farouk Ruhinda Saifi muri shampiyona 2016-2917

Umukino wa Etincelles FC na Rayon Sports ni uwubanza wa 1/8 cy’igikombe cy’Amahoro 2018, umukino utarabereye igihe. Mu gihe imwe muri aya makipe yabasha kubona umusaruro uzayifasha gukomeza, izahura na FC Marines yo yamaze gukomeza muri ¼ cy’irangiza.

Amakipe yakomeje muri ¼ ni; APR FC, Police FC, Sunrise FC, Bugesera FC, Amagaju FC, Marines FC na Mukura VS. Hasigaye imikino ibiri izahuza Rayon Sports na Etincelles FC.

Imvune ya Gikamba Ismael izatuma adakina na Rayon Sports