Police FC yegukanye igikombe cy'Amahoro itsinze Bugesera FC yari yabukereye - AMAFOTO

Ibitego bya Akuki na Nsabimana Eric batsindiye Police FC,niyo bihesheje igikombe cy'Amahoro ikipe ya Police FC, mu gihe Bugesera yatsindiwe na Faruku RUhinda 

90+4" Umukino urarangiye, ikipe ya Police FC yegukanye igikombe cy'Amahoro itsinze Bugesera FC ibitego 2-1.

90+1" Ikipe ya Bugesera FC yakambitse imbere y'izamu rya Police FC ariko byanze

90" Umusifuzi yongeyeho iminota ine kugirango umukino urangire. 

81" Igitego cya Bugesera FC. Bugesera FC ibonye igitego gitsinzwe na Ruhinda Ssentogo Farouk ku mupira ateye n'umutwe Rurangwa awukoraho uranga ujya mu izamu. 

71" Police FC ikoze izindi mpinduka, Moro Ismail agiye mu kibuga asimbuye Mugisha Didier

66" Igitego cya 2 cya Police FC. Police FC ibonye igitego cya kabiri giturutse muri koroneri itewe neza Nkubana Marc, Nsabimana Eric aterekaho umutwe umupira uruhukira mu izamu

60" Ikipe ya Bugesera FC ikoze impinduka, Tuyihimbaze Gilbert avuye mu kibuga na Stepfan Bonney hinjira Vincent Adams na Byiringiro David. Police FC nayo ikoze impinduka Chwukuma Odil yinjiye mu kibuga asimbuye Akuki wari umaze wutsinda igitego.

57" Igitego cya Police FC. Police FC ibonye igitego cya mbere gitsinzwe na Jibrin Akuki, ku mupira uzamukanwe na Hakizimana Muhadjiri ahereza Abedi wagise asubiza Hakizimana Muhadjiri, nawe ntiyatinzamo ahereza Akuki wahise asigarana n'umunyezamu ahita atereka mu izamu nta kwigora.

52" Police FC Imana ikinze akaboko, kuko yari iriye igitego ku mupira uzamukanwe na Ani awutera ugana mu izamu Ruhinda arawusanganira agiye gushyira umutwe Onesme awukora ujya muri koroneri

Amakipe yombi agarutse mu gice cya kabiri afite umuvuduko nk'uwo yatangiranye igice cya mbere aho ikipe iva ku izamu rimwe ijya ku rindi

46" Koroneri ya mbere ya Bugesera FC mu gice cya kabiri, koroneri itewe na Niyomukiza Faustin ariko ayita mu maboko y'umunyezamu wa PoliceFC Onesme

45" Igice cya kabiri kiratangiye ku makipe yombi. Nta kipe n'imwe yakoze impinduka abakinnyi bashoje igice cya mbere ninabo bagarutse

Umugaba mukuru w'Ingabo z'u Rwanda Gen Mubarakh Muganga akaba yitabiriye uyu mukino

Minisitiri wa Siporo Aurore Mimosa Munyangaju nawe akaba yaje kureba uyu mukino w'amateka mu Rwanda 

45+1" Igice cya mbere kirarangiye amakipe akaba agiye kuruhuka ari ubusa ku busa

45" Umusifuzi Ruzindana Nsoro akaba yongeyeho umunota umwe.Savio Nshuti kapiteni wa Police FC ari gushaka ikindi gikombe cy'Amahoro nyuma y'icyo yatangiriyeho kwegukana 2016 ubwo yari muri Rayon Sports

Karim Kamanzi wakiniye ikipe y'igihugu Amavubi mu mukino y'igikombe cy'Afurika mu 2004, niwe waje ashigatiye igikombe kiribuhembwe ikipe iributsinde

Haringingo na Mashami bari guhoberana mbere y'umukino. Aba batoza baraziranye cyane, ndetse bose bakaba bafiteho iki gikombe cy'Amahoro

15" Abafana bakubise baruzura yaba ikipe ya Bugesera yamanuka imodoka zisaga 10 z'abafana ndetse na Police FC ikaba ifite abafana benshi biganjemo abapolisi.

Amakipe yombi ari gukina neza yose asatirana, ubona ko nta kipe yaryamye mu izamu. 

05" Police FC nayo ibonye uburyo bwa mbere bw'igitego ariko Savio umupira ateye Niyongira umunyezamu wa Bugesera FC awushyira muri koroneri.

01" Bugesera FC ihushije igitego ku mupira uzamukanwe na Niyomukiza Faustin ku ruhande rw'iburyo, ahereza Ani Elijian wahise ashota adahagaritse umupira uca ku ruhande

16:05" Umukino uratangiye. Twongeye kubaha ikaze bakunzi ba InyaRwanda mu mukino wa nyuma w'igikombe cy'Amahoro uri guhuza ikipe ya Police FC na Bugesera FC.

Abakinnyi 11 Bugesera FC yabanje mu kibuga

Niyongira Patience

Ani Elijah (c)

Niyomukiza Faustin

Stephan Bonney

Nshimirimana Daud

Ntakirutimana Theotime

Kaneza Augustin

Dukundane Pacifique

Tuyihimbaze Gilbert

Ssentongo Farouk

Dushimimana Olivier

Abakinnyi 11 Police FC yabanje mukibuga

Rukundo Onesime

Nkubana Marc

Rutanga Eric

Rurangwa Mosse

Nsabimana Eric 'Zidane'

Rutonesha Hesbone

Bigirimana Abeddy

Nshuti Dominique Savio (c)

Hakizimana Muhadjiri

Akuki Djibrine

Mugisha Didier

Aya makipe yombi yageze ku mukino wa nyuma yabikoreye, nyuma yaho ikipe ya Bugesera FC isezereye Rayon Sports, naho Police FC isezerera Gasogi United.

AMATEKA WAMENYA MBERE Y’UYU MUKINO

Mu mwaka wa 2014 Police FC yatsinze Bugesera FC ibitego 5-0 mu mukino wa 1/4 cy'Igikombe cy'Amahoro. Bugesera FC ni ubwa mbere igeze ku mukino wa nyuma w'Igikombe cy'Amahoro.

Police FC iramutse yegukanye iki gikombe iraba igitwaye ku nshuro ya 2 mu mateka nyuma y'Igikombe cy'Amahoro yatwaye mu mwaka wa 2015 itsinze Rayon Sports igitego kimwe ku busa cya Eric Ngendahimana ku munota wa 87'.

Bugesera FC ibaye ikipe ya 5 yo mu Ntara igeze ku mukino wa nyuma w'Igikombe cy'Amahoro nyuma ya Etincelles FC (1988), AS Muhanga (mu 2013), Espoir FC (mu 2017) na Mukura VS (mu 2018).

Ni inshuro ya 5 Police FC igeze ku mukino wa nyuma w'Igikombe cy'Amahoro, mu mwaka wa 2010-2012 na 2014 yatsinzwe na APR FC, mu gihe mu mwaka wa 2015 Police FC yatsinze Rayon Sports ndetse na 2024 aho igiye guhura na Bugesera FC.

Bugesera FC iramutse itwaye igikombe y'aba ari ikipe ya 3 ituruka mu Ntara yiaba itwaye igikombe cy'Amahoro nyuma ya Mukura VS (1978- 1886-1990-1992-2018) ndetse na Etincelles FC yagitwaye mu 1988.

Abatoza Mashami Vincent (Police FC) na Haringingo Francis Christian (Bugesera FC) buri umwe amaze kwegukana igikombe cy'Amahoro inshuro imwe. Mashami Vincent yagitwaye mu mwaka wa 2014 ubwo APR FC yatozaga yatsindaga Police FC Igitego 1-0 cya Ndahinduka Michel, mu gihe Haringingo Francis yagitwaye mu mwaka wa 2018 ubwo yatozaga Mukura VS igatsinda Rayon Sports kuri Penaliti 3-1 nyuma yo kunganya 0-0, ndetse na 2023 muri Rayon Sports atsinze APR FC.

Ni Final ya 44 igiye gukinwa mu gikombe cy'Amahoro kuva mu mwaka w' 1975. Mu gihe mu 1977-1991-2004-2020-2021 ntabwo igikombe cy'Amahoro cyakinnywe.

AMAFOTO: Serge Mutuyimana - InyaRwanda