Healing Worship team yongeye gukora igitaramo cy’amateka mu kumurika “Tuliza nguvu za shetani” -AMAFOTO

Iki gitaramo cyabaye kuri iki cyumweru tariki 6 Ukuboza 2015 mu rusengero rwa Four Square Gospel Church rwa Kimironko, kuva isaa kumi z’umugoroba kugeza saa moya n’igice. Abakitabiriye basabanye n’Imana mu kuramya no kuyihimbaza mu ndirimbo za Healing Worship team zakunzwe n’abatari bake ndetse no mu zindi z’amatsinda yafatanyije nayo.

Healing Worship team ni uko yari yambaye mu gitaramo cyakoze ku mitima ya benshi

Benshi bari bavuye imihanda, bitabira igitaramo cya Healing Worship team

Intego y’iki gitaramo yari iyo gushyira hanze alubumu ya 2 y’amashusho yitwa “Tuliza nguvu za shetani”. Iyo alubumu ikaba ikubiyemo indirimbo zifite ubutumwa buvuga ku bitangaza, ku kurwanya satani no gusohoza amasezerano. Abakunzi ba Healing worship team basabwe kuzareba amashusho yayo kuko bazarushaho kujya mu bwiza bw’Imana.

Iki gitaramo cyatumiwemo True Promises, Gisubizo Ministries ndetse na Kingdom of God Ministries kitabiriwe ku rwego rwo hejuru kugeza aho bamwe babuze imyanya bicaramo, bahagarara hanze na cyane ko kwinjira byari ubuntu. Ayo matsinda yose yataramiye abari aho barushaho kunezerwa.

Bamwe bari bahagaze hanze kubera kubura aho bicara

Mu gitaramo Healing worship team yakoze ubushize nabwo byabayeho, bamwe mu bakunzi bayo bataha batishimye kuko batataramanye uko bikwiye n’itsinda bakunda kubera gukurikirana igitaramo bahagaze hanze. Rumenge Etienne uyobora iri tsinda yabwiye Inyarwanda.com ko bagiye gufata ingamba zizatuma iki kibazo kitazongera kubaho bakajya bashimisha abakunzi babo bose. Yagize ati:

Igiterane cyagenze neza turashima abatwitabye(abitabiriye), abantu benshi  bari mu rusengero usibye ko batakwiriye bose(bamwe babuze aho bicara bajya hanze), Turafata ingamba zizatuma bitazongera  kubaho kugirango tunezeze abakunzi bacu bose. Nyuma y’iyi DVD, turi gutegura indi DVD y’umwaka utaha wa 2016, ubu tugiye gutegura iminsi mikuru,nta yindi gahunda turategura usibye  igikorane(igiterane) cy’abaririmbyi.

Healing Worship team igizwe n’abaririmbyi basaga  47,kugeza imaze gukora alubumu ebyiri z’amashusho. Iya mbere yitwa “Yesu ni muzima muri twe”, iya kabiri ari nayo bashyize hanze kuri iki cyumweru yitwa “Tuliza nguvu za shetani”. Iri tsinda rikunzwe mu ndrimbo zitandukanye nka: Tuliza, Ibiriho ubu, Sinzatuza,Imana ntijya ibeshya, Inzira z’Imana, Nziringira umuremyi n’izindi.

REBA AMAFOTO Y'UKO ICYO GITARAMO CYAGENZE

Healing Worship team yakoze igitaramo cy'amateka

Kibonke Muhoza uyobora indirimbo muri Healing worship team

Iki gitaramo kitabiriwe ku buryo bushimishije

Uyu niwe wari wigishije ijambo ry'Imana muri icyo gitaramo

Uyu niwe wayoboye umuhango wo kumurika alubumu

Habayeho umwanya wo gushyigikira Healing worship team, benshi bayitera inkunga