Amateka y'umuhanuzikazi Eliane Isaac utegerejwe i Kigali mu giterane ‘Abagore Twese hamwe’

Muri iyi nkuru Inyarwanda.com tugiye kubagezaho amateka y’uyu mukozi w’Imana Prophetess Eliane Isaac watumiwe na Women Foundation Ministries ikuriwe na Apostle Alice Mignone Kabera ndetse bikaba biteganyijwe ko agera i Kigali ku mugoroba w’uyu wa kabiri tariki 8 Kanama 2017 nkuko Inyarwanda.com yabitangarijwe n'abari gutegura igiterane 'Abagore twese hamwe'. 

Eliane Isaac yavutse mu mwaka wa 1974 avukira muri Montreal mu gihugu ya Canada mu mugabane wa Amerika, ni umwana wa 5 mu muryango w’abana 7. Papa we yari umukozi w’Imana ndetse yari Apostle (Intumwa y'Imana). Eliane Isaac ni umu mama w’abana bane, akaba umwalimu muri kaminuza aho yigisha muri USA, Afrika y’Epfo, Brazil, Chile na Haiti. Ikindi ni uko ari umuhanzi w’umuramyi ndetse akaba afite album zinyuranye harimo iyitwa ‘The Moment Is Coming’, My name is n'izindi. 

Umuhanuzikazi Eliane Isaac agiye kuza mu Rwanda

Prophetess Eliane Isaac yakuriye mu itorero rya se (wari Apotre) aho yari umwe mu bagize itsinda ry’abaririmbyi bari barishinzwe kuramya no guhimbaza Imana. Eliane Isaac wize ibijyanye no kuvura amenyo, yaje gushakana na Apostle Patrick Isaac, mu mwaka 1998 atangiza Center de la Parole qui Libere (PQL Centre) iherereye muri Montreal ikaba yaratanze umusanzu ukomeye mu gufasha abagore mu kwitinyuka no kwiteza imbere.

Binyuze muri PQL Centre yatangije ukongeraho n’ubumenyi yari asanganywe, Prophetess Eliane Isaac yabaye umukozi w’Imana w’umwizerwa, ahugura ku ijambo ry’Imana ibihumbi by’abantu yahuraga nabo yaba abamuganaga ndetse n'abo yahuraga nabo mu biterane mpuzamahanga akunze gukora. Mu nyigisho ze zinyuranye atanga, Prophetess Eliane Isaac ahugurira cyane abagore gukorera mu mihamagaro yabo bakiteza imbere.

Prophetess Eliane Isaac hamwe n'umugabo we Apostle Isaac Patrick

Album ye yise 'My Name is' iriho indirimbo zahembuye imitima ya benshi, muri zo hari; I lift my hands, My God is wonderful, Send your anointing,Zion Arise, Never let me God, Moving forward, My name is, We wanna see your power, Hear my Voice n’izindi. Uyu muhanuzikazi akaba n'umuhanzikazi Ellane Isaac akunze gukora ivugabutumwa mu bihugu bitandukanye ku isi aho ahamagarira abagore gukunda umurimo haba mu itorero no mu buzima busanzwe. Eliane Isaac amaze guhurira kuri stage n’abahanzi bakomeye ku isi mu muziki wa Gospel barimo Israel Houghton, Donnie McClurkin, James Hall Choir, Shekinah Glory, Deitrick Haddon n’abandi. 

Amakuru ku giterane Prophetess Eliane Isaac yatumiwemo i Kigali

Uyu mukozi w'Imana Prophetess Eliane Isaac yatumiwe mu giterane 'Abagore twese hamwe' kigiye kuba ku nshuro ya Karindwi, kikaba gifite insanganyamatsiko ivuga ngo “Kuva mu gutsikamirwa tujya mu butsinzi (Zaburi: 68: 12). Igiterane kizabera mu Nzu Mberabyobyi ya Kigali Convention Centre kuva tariki ya 08 kugeza tariki ya 11 Kanama 2017 guhera saa Kumi kugeza saa tatu z’umugoroba.

'Abagore twese hamwe' ni kimwe mu biterane bikomeye bya Women Foundation Ministries

Abazitabira iki giterane bazaganirizwa n’abagore b’inararibonye nka Eliane Isaac uturuka mu gihugu cya Canada, Grace Serwaga uturuka mu gihugu cy’u Bwongereza, Kathy Kiuna uturuka mu gihugu cya Kenya. Bose bakazakirwa n’Umushumba Mukuru w’Umuryango Women Foundation Ministries, Apostle Umunezero Alice Mignone Kabera.

Apotre Mignone Alice Kabera uyobora Women Foundation Ministries

Mu rwego kandi rw’isakazabutumwa, imigendekere y’iki giterane izaba ikurikiranwa imbona nkubone ku mbuga nkuranyambaga nka Facebook, Youtube, mu bitangazamakuru by’amashusho bitandukanye nka BTN Canada n’ibindi bya hano mu Rwanda. Abari n’abategarugori bose bahawe ikaze muri icyo giterane mu ntego yo kwamamaza inkuru nziza maze umugore ave mu gutsikamirwa ajye mu butsinzi. 

Igiterane Elliane Isaac yatumiwemo

Reba hano 'Devant Ton Trône' ya Elliane Isaac