Sister Yvonne yakiriye agakiza arabatizwa atangira no kuririmba indirimbo zihimbaza Imana-AMAFOTO

Amazina ye asanzwe ni Mushimiyimana Yvonne akaba azwi cyane mu muziki nka Sister Yvonne. Ni umwanditsi akaba n'umuririmbyi w'indirimbo mu ndirimbo zo kuramya no guhimbaza Imana, gusa abantu benshi bakaba bari bamuzi akora umuziki usanzwe (secular music). Mu muziki usanzwe Sister Yvonne yari amaze gukora indirimbo 9 z'amajwi n'ebyi z'amashusho ari zo Birakomeye na Agasaro. 

REBA HANO 'BIRAKOMEYE' INDIRIMBO SISTER YVONNE YAKOZE AGIKORA UMUZIKI WA SECULAR

Sister Yvonne mbere agikora umuziki usanzwe

Sister Yvonne yabwiye Inyarwanda ko mu ntangiriro z'uyu mwaka wa 2017 ari bwo yafashe umwanzuro wo kwakira Yesu Kristo nk'umwami n'umukiza we. Tariki 13/3/2017 ni bwo yabatijwe mu mazi menshi, ubu ni umukristo mu Itorero ry'Abadivantiste b'umunsi wa Karindwi ku Ruyenzi. Yahise ahagarika umuziki usanzwe atangira guhimbaza Imana akoresheje impano yo kuririmba yagabiwe n'Imana. Kugeza ubu amaze gukora indirimbo eshatu za Gospel. 

Sister Yvonne yakiriye agakiza abatizwa mu mazi menshi

Inyarwanda yabajije Sister Yvonne uko yafashe umwanzuro wo kwiyegurira Imana adusubiza muri aya magambo: "Ni inzira ndende ntabwo aka kanya nahita mbisobanura ngo mbivemo. Gusa ndakeka ni imbaraga z'Imana ihindura." Tumubajije niba yaba ataribeshye ahitamo kwiyegurira Imana, yagize ati:

Ohh hoya ntabwo nibeshye narabikunze cyane. Icya mbere ukuramo wenda si inyungu z'amafaranga kuko kuririmba Gospel ntabwo ari ugukorera amafaranga nko muri secular ariko icya mbere bitanga amahoro ikindi kandi gukorera Imana nta gihombo kirimo. 

UMVA HANO 'TWARACUMUYE' YA SISTER YVONNE

Sister Yvonne ni umudivantiste w'umunsi wa karindwi ku Ruyenzi. Ni itorero yabarizwagamo na mbere akiririmba secular music, gusa avuga ko atari akomeye mu gakiza. Mu gihe hari abakizwa bahindukiriye abakunzi babo, Sister Yvonne nawe ukiri ingaragu abajijwe niba we atari ko byaba byaragenze akaba yarakiriye agakiza akurikiye umusore, yavuze ko yahindutse ari we wifatiye umwanzuro. "Hoya ntabwo ariko byagenze kuko ndengejeho ibindi wenda naba ngiye kuvuga ubuzima bwanjye bwite ariko ntabwo ari cyo cyanjyanye."

Ku bijyanye n'ibikorwa by'umuziki we, yadutangarije ko arimo gukora album y'indirimbo 8. Kugeza ubu amaze gutunganya indirimbo 3, iya mbere yayise Ihangane, ikaba ikubiyemo ubutumwa bwihanganisha ababuze ababo. Hari indi yise Twaracumuye, ikaba ari isengesho. Indi amaze gukora ni Nditanze ikubiyemo ubuhamya bwa Sister Yvonne uko yamaramaje mu gukorera Imana. 

Sister Yvonne avuga ko gukorera Imana nta gihombo kirimo

UMVA HANO 'IHANGANE' YA SISTER YVONNE

REBA HANO 'GASARO' INDIRIMBO SISTER YVONNE YAKOZE AGIKORA UMUZIKI WA SECULAR