Kuri uyu Wakane nibwo hakomeje gukinwa imikino yo ku munsi wa 30 wa shampiyona y'ikiciro cyambere mu Bwongereza.
Saa tatu n'iminota 15 nibwo hari hategerejwe umukino ukomeye kuri Stamford Bridge aho Chelsea yari yakiriye Manchester United.
Ni umukino watangiye wihuta cyane kubera ko mu minota 2 gusa nibura buri kipe yari yamaze kugera imbere y'izamu ry'indi.
Ku munota wa 3 Malo Gusto yahinduye umupira uragenda ukubita ku birenge bya Harry Maguire uragenda usanga Conor Callagher ahita atsinda igitego cya 1 cya Chelsea.
Nyuma yo gutsindwa abakinnyi na Manchester United batangiye gushaka uko bakwushyura abarimo Antony na Garnacho bagerageza kurekura amashoti ariko ba myugariro ba Chelsea bakayitambika.
Ku munota wa 18 Mykhaylo Mudryk yahaye umupira Marc Cucurella yinjiye mu rubuga rw'amahina, Antony ahita amutereka hasi maze umusifuzi atanga penariti iterwa neza na Cole Palmer aba ateretsemo igitego cya 2.
Ku wa 34 Manchester United yabonye igitego cya 1 gitsinzwe na Alejandro Garnacho nyuma yuko Moises Caicedo akoze amakosa amwihera umupira.
Ikipe y'amashitani atukura ikimara kubona igitego yabaye nkiriye amavubi maze nyuma y'iminota 5 gusa Bruno Fernandes ahita atsinda igitego cya 2 ku mupira yarahawe na Diogo Dalot.
Igice cya mbere cyarangiye amakipe yombi anganya ibitego 2-2. Mu gice cya kabiri amakipe yose yagarutse ari hejuru agerageza uburyo imbere y'izamu nkuko byari bimeze mu gice cya mbere.
Ku munota wa 66 Eric Ten Hag utoza Manchester United yakoze impinduka mu kibuga havamo Rasmus Hoejlund na Jonny Evans hajyamo Marcus Rashford na Willy Kambwala.
Nyuma y'umunota umwe gusa ikipe y'amashitani atukura yahise ibona igitego cya 3 gitsinzwe na Alejandro Garnacho ku mupira mwiza yarahawe na Antony.
Ikipe ya Chelsea yashatse uko yakwishyura maze umukino ugiye kurangira ugeze ku munota wa 90+7 Noni Madueke wari winjiye mu kibuga asimbuye akorerwaho ikosa na Diogo Dalot ari mu rubuga rw'amahina umusifuzi yongera gutanga penariti.
Yahise iterwa neza Cole Palmer arayinjiza ndetse na nyuma y'umunota umwe gusa ahita atsinda igitego cya 4 aba afashije Chelsea gutsinda Manchester United ibitego 4-3.
Chelsea yahise ijya kumwanya wa 10 n'amanota 43 naho Manchester United yo ikomeza kuba kumwanya wa 6 n'amanota 48.
Undi mukino wabaga ni uwo Liverpool yatsindagamo Sheffield United ibitego 3-1 bya Darwin Nunez,Mac Allister,Cody Gakpo na Conor Bradley witsinze.
Liverpool yahise yisubiza umwanya wa mbere n'amanota 70 naho Sheffield United yo ikomeza kuba kumwanya wa nyuma n'amanota 15.
Chelsea yatsinze Manchester United ibitego 4-3