Iri shoramari rishingiye ku cyifuzo cy'u Buhinde cyo kubona amabuye y'agaciro y'ingenzi nka zahabu, lithium na copper, akenewe cyane mu gukora imodoka zikoresha amashanyarazi, za batiri n'ibindi bikoresho by'ikoranabuhanga.
Afurika ifite umutungo kamere mwinshi, ari na yo mpamvu ibihugu bikomeye bikomeje kuyishoramo imari.
Nk’uko tubikesha ikinyamakuru Business Insider Africa, mu baherwe bafite ibikorwa bikomeye muri Afurika harimo Sunil Bharti Mittal, washinze Airtel Africa, imwe mu masosiyete akomeye y'itumanaho akorera mu bihugu 14 bya Afurika, itanga serivisi z'itumanaho n'iz'imari zikoresha ikoranabuhanga.
Undi ni Gautam Adani, waguriye ibikorwa bye muri Afurika binyuze mu ishoramari mu bucukuzi bw'amabuye y'agaciro, ibyambu, ubwikorezi n'ingufu, hagamijwe koroshya ubucuruzi hagati y'u Buhinde n'ibihugu bya Afurika.
Lakshmi Mittal, uyobora sosiyete ya ArcelorMittal, na we afite ibikorwa bikomeye mu bucukuzi bw'amabuye no gutunganya ibyuma mu bihugu birimo Liberia na Afurika y'Epfo.
Mu gihe Anil Agarwal, washinze Vedanta Resources, yashoye amafaranga menshi mu bucukuzi bwa copper muri Zambia binyuze muri Konkola Copper Mines.
Mu rwego rw'ingufu zisubira, umuherwe Raj Gupta na we ari kubaka umushinga munini w'amashanyarazi akomoka ku mirasire y'izuba muri Nigeria, ushobora kuzaba umwe mu mishanga minini muri Afurika yo munsi y'Ubutayu bwa Sahara.
Nubwo ishoramari ry'Abahinde rikomeje kwiyongera, u Bushinwa buracyari umufatanyabikorwa wa mbere wa Afurika mu bucuruzi.
Bumaze imyaka irenga 15 buyoboye ubucuruzi hagati yabwo na Afurika, bufashwa n'ingamba zirimo gukuraho imisoro ku bicuruzwa bituruka mu bihugu 53 bya Afurika bifitanye umubano nabwo.
Abasesenguzi bavuga ko nubwo uburyo bw'u Buhinde bwo gushora imari butandukanye n'ubw'u Bushinwa bukunze gushyigikirwa na Leta, ibihugu byombi bibona Afurika nk'umugabane ufite amahirwe menshi y'iterambere, cyane cyane kubera umutungo kamere n'isoko rinini ufite.
Mu gihe isi ikomeje gukenera amabuye y'agaciro akoreshwa mu ikoranabuhanga rigezweho n'ingufu zisukuye, Afurika ikomeje gukurura ishoramari rikomeye rituruka mu bihugu bikomeye ku isi.