Yugarijwe n’imvune! Umutoza wa Arsenal ntishimiye kuba bari gukina imikino myinshi yegeranye

Ibi yabitangaje nyuma y’uko Cristhian Mosquera na Declan Rice bombi bakuwe mu kibuga kubera imvune mu mukino Arsenal yatsinzemo Brentford 2-0 kuri uyu wa Gatatu i Londres, bikayifasha gukomeza kuba ku mwanya wa mbere n’ikinyuranyo cy’amanota atanu hagati yayo na Manchester City iyikurikiye.

Muri uyu mukino Mosquera yasimbuwe na Jurrien Timber mu gice cya mbere nyuma yo kugira ikibazo cy’imvune naho Declan Rice we asimbuzwa ku munota wa 83 nawe nyuma yo kuvunika.

Arsenal yagiye muri uyu mukino idafite ba myugariro bayo babanza mu kibuga Gabriel Magalhães na William Saliba, bombi nabo bafite imvune. Hari kandi ba rutahizamu bayo bamaze igihe badakina kubera imvune ari bo Gabriel Jesus na Kai Havertz. Ibi bibazo by’imvune byugariye iyi kipe, umutoza wayo abyegeka ku kuba bari gukina imikino myinshi mu gihe gito.

Mu kiganiro n’abanyamakuru, Mikel Arteta yagize ati: ”DeclanRice yakinnye iminota myinshi cyane, ariko ikibazo ni igihe dukinira. Gukina ku wa Gatatu nimugoroba, hanyuma tukongera tugakina no Gatandatu ni ikibazo gikomeye. Nibaduha umunsi umwe wo kuruhuka, byafasha cyane. Ibi ni ibintu twabasha gukosora. Dukeneye gutekereza ku mibereho y’abakinnyi.”

"Ntabwo ari impaka, ni ugukoresha ubwenge. Imikino ikomeje kuba myinshi mu marushanwa yose haba muri Premier League, Champions League n’andi marushanwa. Abakinnyi ntabwo ari robo. Tugomba kubatekerezaho.”

Arsenal igiye gukina imikino itatu mu cyumweru aho ku Cyumweru gishize yakinnye na Chelsea, ejo ikaba yarakinnye na Brentford none ku wa Gatandatu ikaba izakina na Aston Villa muri Premier League.

Mikel Arteta avuga ko imikino myinshi yegeranye ari kimwe mu biri gutuma abakinnyi benshi bavunika

Declan Rice yagize ikibazo cy'imvune