Uyu muhanzi yatangaje ko yishimiye iyi ntambwe, ashimangira ko ari ishema kuri we kubona ibihangano bye bishyirwa mu bigiye gutoranywa muri ibi bihembo bikomeye mu muziki ku Isi.
YewëeH yashyizwe mu cyiciro cya Best African Music Performance abikesha indirimbo ye ‘Dizaya’, mu gihe Album ye ‘Sugar Boi’ yashyizwe mu cyiciro cya Best Global Music Album.
Uyu muhanzi yabwiye InyaRwanda ko iyi ntambwe yayigejejemo abifashijwemo na sosiyete ifasha abahanzi mu muziki, Kauris Music, ari na yo yatanze ubusabe bwatuma ibihangano bye byitabwaho muri ibi bihembo.
Indirimbo ‘Dizaya’ yasohotse mu 2025, ni imwe mu ndirimbo zatumye YewëeH agaragaza ko ashoboye gukora umuziki ugezweho uhuza injyana za Afurika.
Iyi ndirimbo iri mu zakorewe muri Kauris Music, aho YewëeH yagaragajwe nk’uwakoze umuziki wayo, afatanyije na Peace Kala mu gutunganya amajwi, mu gihe Bob Pro yakoze ibijyanye no kuyatunganya bwa nyuma.
Ku rundi ruhande, ‘Sugar Boi’ ni Album ya mbere ya YewëeH, igizwe n’indirimbo 16 kandi yasohotse ku mugaragaro muri Gicurasi 2026.
Iyi Album igaragaramo ubufatanye n’abahanzi batandukanye bo mu Rwanda no mu karere, barimo Okkama, Lilian Mbabazi, Lisaa, Papa Cyangwe, Levixone, Confy, Khalfan, Afrique, Lloav na Lina Starz.
Mu ndirimbo ziyigize harimo ‘Focus’ yakoranye na Khalfan, ‘Tatata’ yahuriyemo na Afrique na Papa Cyangwe, ‘Tondela’ yakoranye na Lisaa, ‘Smile’ yakoranye na Lilian Mbabazi, ‘On You’ yahuriyemo na Magna Romeo, ‘Carolina’ iriho Okkama, ‘Kiss & Tell’ yakoranye na Lloav, ‘Kirimana’ yahuriyemo na Lina Starz, ‘Me & U’ yakoranye na Confy na ‘Blessed’ iriho Levixone.
Hari kandi izindi ndirimbo nka ‘Loud’, ‘Together’ na ‘Sweet Poison’ yakoranye na Excoo. Iyi Album igaragaza uburyo YewëeH yagerageje guhuza injyana zitandukanye, zirimo Afrobeat n’umuziki gakondo nyarwanda.
Yatangiye ari Producer mbere yo kwagura ibikorwa bye nk’umuhanzi
YewëeH amaze imyaka mu ruganda rw’umuziki, aho yabanje kumenyekana cyane nk’utunganya indirimbo mbere yo kwagura ibikorwa bye akajya no kuziririmba. Mu bahanzi bazwi yagize uruhare mu gutunganyiriza indirimbo harimo The Ben, Bruce Melodie, Eddy Kenzo, Otile Brown, Papa Cyangwe na Uncle Austin.
Mu 2024, yatangaje ko yatangiye urugendo rwo gukora umuziki nk’umuhanzi nyuma y’imyaka myinshi akorera abandi. Yasobanuye ko nubwo yakunze kuririmba kuva kera, yaje kwiga gutunganya indirimbo nyuma yo guhura n’imbogamizi zo kubona abatunganya umuziki bamuha umwanya wo gukora ibihangano bye.
Mu ndirimbo ze bwite zasohotse mbere ya Album ‘Sugar Boi’ harimo ‘Far Away’ yakoranye na Pasco na Pride, ‘Dangote’ na ‘Pani’.
Iyi ntambwe nshya mu rugendo rwe ije yiyongera ku bikorwa bye byo gutunganya indirimbo z’abandi bahanzi, ikaba ishobora kumufasha kurushaho kumenyekana ku rwego mpuzamahanga.
Nubwo gushyirwa mu cyiciro cy’ibanze cyo gusuzuma ibihangano bya Grammy atari kimwe no gutorwa ku mugaragaro cyangwa gutsindira igihembo, ni intambwe ikomeye ku muhanzi nyarwanda ushaka kugeza umuziki we ku rwego mpuzamahanga.
YewëeH yashimiye abamushyigikiye, agaragaza ko urugendo rwe rugikomeje kandi ko afite intego yo kugera kuri byinshi mu muziki.
YewëeH yagejeje indirimbo ye ‘Dizaya’ na Album ‘Sugar Boi’ mu cyiciro cy’ibanze cyo gusuzuma abahatanira Grammy Awards