Yavukiye muri Uganda! Ibyo wamenya kuri Zohran Mamdani ugiye kuyobora New York

Zohran Mamdani yavukiye i Kampala, muri Uganda, aza kwimukira i New York afite imyaka irindwi gusa. Yize mu mashuri azwi cyane muri Leta ya New York, arimo Bronx High School of  Science, hanyuma akomereza muri Bowdoin College, aho yakuye impamyabumenyi mu bijyanye na Africana Studies.

Ni umwana w’ababyeyi bazwi cyane dore ko nyina Mira Nair ari umukinnyi n’umuyobozi wa filime zamenyekanye nka Queen of Katwe mu gihe se Mahmood Mamdani ari umushakashatsi n’umwarimu wa kaminuza ya Columbia mu by’imibereho y’abantu.  Kuri ubu yatowe nk’umuyobozi wa New York ahigitse Andrew Cuo bari bahanganye.

Uyu mugabo w’imyaka 34 yahise yanditka amateka yo kuba ari we wa mbere wavukiye ku mugabane wa Afurika ugiye kuyobora New York ndetse anandika n’andi yo kuba ari we muyobozi muto ugiye kuyobora iyi Leta kuva mu 1892.

Usibye ibi, Zohran Mamdani yananditse amateka yo kuba ari we mu Islam utorewe kuyobora Umujyi wa New York. Mu gihe cyo kwiyamamaza kwe, yakunze gusengera mu misigiti itandukanye, ndetse agasohora amavidewo avugamo indimi zitandukanye.

Hari igihe yafatanyije n’abaturage bari muri gari ya moshi gufungura ifunguro rya Ramadhan, ibintu byamuhesheje isura y’umuyobozi wiyegereje abaturage.

Nubwo yigeze guhuriramo n’ubutumwa bw’urwango, Mamdani yavuze ko urugendo rwe kuva i Kampala kugera i New York ari ishusho y’ubuzima bw’abimukira benshi bashaka amahirwe mashya.

Muri gahunda ze nk’umuyobozi mushya, Mamdani yahize gukora ibishoboka byose kugira ngo New York ibe ahantu heza ku bantu bose.

Bimwe mu byo yateguye akimara kuba umuyobozi harimo gutanga ingendo rusange ku buntu (buses na subway), gushinga amaduka acuruza ibiribwa ku giciro gito, gukomeza amategeko yo kurinda abakodesha inzu, gutegura uburyo bwo gutuza imiryango ikennye ku giciro gito n’ibindi.

Mbere y’uko Zohran Mamdani yinjira muri politiki, yakoraga nk’umukangurambaga afasha abatagira aho baba mu gace ka Queens kugira ngo ba nyir'amazu batabirukana.

Mu ijambo rye ry’intsinzi yibukije urugendo rwe rwo kuva i Kampala kugera ku biro bikuru by’Umujyi wa New York.

Zohran Mamdani yanditse amateka mashya muri Leta Zunze Ubumwe Za Amerika
 

Zohran Mamdani yari ashyigikiwe n'abaturage benshi muri Amerika

Zohran Mamdani yakoraga ubukangurambaga bwo gufasha abadafite aho baba muri New York