Yaserukanye ababyinnyi 53, ahindura 'Band': Bruce Melodie yibuki

Uyu muhanzi yagaragaje ko atari aje gutanga igitaramo gisanzwe, ahubwo yari yazanye imyiteguro idasanzwe yagaragaje urwego ibitaramo bye bimaze kugeraho.

Bruce Melodie wari umaze ibyumweru azenguruka igihugu mu bitaramo bya Summer Country Tour, yongeye kwerekana ko akomeje kuba umwe mu bahanzi bafite igikundiro gikomeye mu Rwanda. Kuva ku rubyiruko kugeza ku bakuru, abafana be bamwakiranye urugwiro, baririmbana na we indirimbo ze hafi ya zose.

Mbere y'uko ahamagarwa ku rubyiniro, abafana benshi bari bamaze gufata imyanya yabo bafite ibyapa byanditseho amazina amuranga nka "001" na "Munyakazi", bategereje ko aza kubaha ibyishimo bari bategerezanyije amatsiko.

Icyatangaje benshi ni uko Bruce Melodie atacurangiwe na Symphony Band isanzwe iherekeza abahanzi muri MTN Iwacu Muzika Festival. Ahubwo yazanye Target Band, itsinda bari basanzwe bakorana mu bitaramo bya Summer Country Tour, ibintu byahise bitanga isura itandukanye y'igitaramo cye.

Si Band gusa yahinduye.

Uyu muhanzi yanageze ku rubyiniro aherekejwe n'ababyinnyi 53, abakobwa n'abasore, ibintu bitari bisanzwe biboneka muri ibi bitaramo.

Yanahinduye uburyo bw'imiririmbire ye akoresha abakobwa batanu bamufashaga nk'abaririmbyi (back-up singers), mu gihe ubusanzwe abahanzi baririmbira muri MTN Iwacu Muzika Festival bafashwa n'abaririmbyi babiri gusa.

Bruce Melodie yari yanazanye umugabo ushinzwe amajwi (sound engineer) ndetse anaherekezwa n'itsinda rinini ry'abamushyigikiye, barimo n'umunyarwenya Pilate ukunzwe muri Gen-Z Comedy.

Ubwo yafataga ijambo hagati mu gitaramo, Bruce Melodie yahisemo kubanza kwibutsa abaturage ba Karongi amateka abafitanye.

Yavuze ko aka karere gafite umwanya wihariye mu rugendo rwe rw'umuziki, kuko mu bihe bya Covid-19, ubwo ibikorwa byinshi byari byarahagaze, ari i Karongi yafatiye amashusho y'indirimbo ye "Saa Moya", imwe mu ndirimbo zakunzwe cyane ndetse zikaba zarabaye igice cy'ibihe by'ingenzi mu muziki we.

Aya magambo yakiriwe n'amashyi menshi, agaragaza ko n'abafana bishimiye kuba uyu muhanzi ataribagiwe amateka abafitanye.

Nyuma y'aho, Bruce Melodie yahise atangira urugendo rw'indirimbo ze zakunzwe, aririmba "Selebura", "Ikinya", "Ikinyafu", "Pom Pom", "Kungola", "Bado" na "Henzapu".

Buri ndirimbo yakirwaga nk'aho ari yo ya mbere. Abafana bamufashaga kuririmba ijambo ku rindi, bamwe basimbuka, abandi babyina, mu gihe abandi bafataga amashusho n'amafoto yo kwibukiranya uwo mugoroba.

Bruce Melodie yongeye kugaragaza ko indirimbo ze zaciye mu byiciro byose by'abakunzi b'umuziki, kuko abato n'abakuru bose bagaragazaga kuzimenya no kuziririmbana na we.

Iki gitaramo cya Karongi cyari kimwe mu bigize urugendo rwa MTN Iwacu Muzika Festival 2026, aho abahanzi umunani, biyongeraho Bruce Melodie nk'umushyitsi wihariye watwaye Primus Guma Guma Super Star ya munani, basusurukije abaturage b'Intara y'Iburengerazuba.

Nk'ibisanzwe, iki gitaramo cyayobowe n'abashyushyarugamba Ntakirutimana Halifa uzwi nka MC Buryohe afatanyije na Uwamwezi Mugire Daphine uzwi nka MC Bianca. Bombi bakomeje kwigarurira imitima y'abitabira ibi bitaramo binyuze mu mikino, kubyina no kuganiriza abafana mbere yo guhamagara abahanzi ku rubyiniro.

Mu bitabiriye iki gitaramo harimo Guverineri w'Intara y'Iburengerazuba, Ntibitura Jean Bosco, Umuyobozi w'Akarere ka Karongi, Muzungu Gerald, hamwe n'ibihumbi by'abaturage bari baje kwihera ijisho iri serukiramuco.

Ku nshuro ya mbere MTN Iwacu Muzika Festival ibereye i Karongi, abaturage baho bagaragaje ko bari bamaze igihe bifuza kwakira ibitaramo nk'ibi bihuriza hamwe bamwe mu bahanzi bakomeye mu gihugu.

Naho Bruce Melodie we, ntiyasize gusa asusurukije Karongi. Yasize anongeye kwerekana ko iyo ageze ku rubyiniro, aba ashaka gutanga igitaramo kirenze ibisanzwe, haba mu myiteguro, mu mubare w'abamuherekeza no mu buryo yubaka isano n'abafana be.