Kühne yari umuyobozi w’ingoma y’ubucuruzi yari yarubatse mu myaka myinshi, aho ibikorwa bye byibandaga ku gutwara no kohereza ibicuruzwa, indege, imiti n’imitungo itimukanwa.
Umutungo we uzajya muri Kühne Foundation
Kühne ntiyari afite abana, kandi gahunda yari yarateganyije mbere y’urupfu rwe ni uko umutungo we uzajya muri Kühne Foundation. Iyi fondasiyo yashinzwe n’umuryango we hashize imyaka igera kuri 50, ikaba ikorera mu bijyanye n’ibikoresho n’ubwikorezi, ubuvuzi, umuco ndetse n’ibidukikije.
Fondasiyo izaba ari yo izajya igenzura umutungo wose wa Kühne mu gihe kiri imbere. Igenzurwa n’inama y’abagize ubuyobozi irimo bamwe mu bajyanama be ba hafi ndetse n’umugore we, Christine Kühne.
Mu mutungo ukomeye uzaba uri munsi y’iyi fondasiyo harimo imigabane myinshi muri Kühne + Nagel International AG, kompanyi ikomeye ku rwego mpuzamahanga mu gutwara no kohereza ibicuruzwa, yashinzwe na sekuru wa Kühne.
Kühne yari afite hafi 60% by’imigabane ya Kühne + Nagel, kandi ni yo yari isoko nyamukuru y’ubutunzi bwe.
Yari afite imigabane muri kompanyi zikomeye
Mu myaka ishize, Kühne yakoresheje amafaranga yavaga muri Kühne + Nagel mu gushora imari mu zindi nzego. Yari afite hafi 30% muri Hapag-Lloyd AG, kompanyi ikomeye mu bwikorezi bwo mu mazi, ndetse afite na 20% muri Brenntag SE, ikora mu bijyanye n’imiti.
Yari afite kandi imigabane ikomeye muri Flix SE, kompanyi izwi mu gutwara abantu n’imodoka n’amabisi mu bihugu bitandukanye. Mu mutungo we harimo n’amazu ndetse n’amahoteli ahenze, harimo The Fontenay, hoteli i Hamburg mu Budage, umujyi yavukiyemo.
Mu ntangiriro z’uyu mwaka, kompanyi ye y’ishoramari, Kuehne Holding, yazamuye imigabane yayo muri kompanyi y’indege y’u Budage Deutsche Lufthansa AG igera kuri 20%.
Umutungo we wariyongereye cyane
Nk’uko Bloomberg Billionaires Index ibigaragaza, umutungo wa Kühne wariyongereye inshuro zirenga enye mu myaka icumi ishize, ugera kuri miliyari 49 z’amadolari.
Nubwo yari umwe mu bantu bakize cyane ku isi, Kühne yigeze kuvuga ko ubuzima bwe bwite butari bushingiye ku gukoresha amafaranga menshi. Yigeze kuvuga ko yari afite amazu atatu n’ubwato bw’akataraboneka, avuga ko ibyo byari bihagije kandi ko atari akeneye ubundi buhenze bwinshi.
Kühne yabaga hagati y’u Busuwisi n’ikirwa cya Mallorca, ari kumwe n’umugore we Christine, usigaye amenyekana cyane mu bikorwa bya fondasiyo, cyane cyane mu bijyanye n’ubuvuzi.
Imiyoborere y’umutungo we iracyari ikibazo
Nubwo Kühne yari yaravuye ku mirimo ya buri munsi muri kompanyi ze, yakomeje kugira ijambo rikomeye ku cyerekezo cy’ubucuruzi bwe kugeza mu bihe bye bya nyuma. Abasesenguzi bavuga ko nyuma y’urupfu rwe, uburyo fondasiyo izacunga uwo mutungo bushobora guhindura imikorere y’ingoma y’ubucuruzi yasize.
Bamwe batekereza ko imigabane muri Kühne + Nagel na Hapag-Lloyd ishobora gufatwa nk’umutungo w’ingenzi ugomba kurindwa igihe kirekire. Icyakora, kuba umutungo wimuriwe muri fondasiyo ntibivuze ko buri migabane Kühne yari afite izaguma aho iteka.
Kühne Foundation isanzwe ifite abakozi bagera kuri 800 ndetse n’ingengo y’imari ya hafi miliyoni 135 z’amafaranga y’u Busuwisi, angana na miliyoni 168 z’amadolari. Nyuma yo kwakira umutungo wa Kühne, ishobora kuzaba imwe muri fondasiyo nini z’abagiraneza mu Burayi.
Klaus-Michael Kühne, umwe mu bacuruzi bakomeye bo mu Budage akaba yari afite imigabane ikomeye muri kompanyi zitandukanye, yapfuye muri iki cyumweru afite imyaka 89