Uyu mukino uteganyijwe ku wa 15
Kanama uzabera i Kigali kuri Stade Amahoro, ukazaba mu rwego rwo kwizihiza umunsi
udasanzwe wa Rayon Sports. Ni umukino uzanabera Yanga umwanya ukomeye wo
gusuzuma urwego rwayo mu kwitegura umwaka mushya w’imikino.
Mu kiganiro yagiranye na The
Respondent Online, Umuyobozi wa Yanga ushinzwe Itangazamakuru n’Itumanaho,
Ally Kamwe, yavuze ko imyiteguro igeze kure.
Ally Kamwe yagize ati “Ikipe iri
gukora imyitozo ikomeye kugira ngo ibe mu bihe byiza mbere y’uyu mukino. Ni
igice cy’ingenzi mu kwitegura umwaka w’imikino utaha,”
Yakomeje asaba abafana b’iyi kipe
kubasanga mu Rwanda bakabatera ingabo mu bitugu. Ati “Turahamagarira abafana
bacu bose, abanyamuryango n’abakunzi ba Yanga gukora ibishoboka bakaduherekeza,
bakadufasha guha imbaraga ikipe muri uru rugendo rudasanzwe,”
Umukino wa Yanga na Rayon Sports witezweho
gukurura abantu benshi, biturutse ku buryo aya makipe yombi yo mu karere ka
Afurika y’Iburasirazuba ahangana kandi akaba akunwe n’abafana bayo.
Mu rwego rwo kwitegura uwo mukino,
ikipe ya Rayon Sports nayo ntabwo yicaye kuko iri kuzenguruka u Rwanda ikina
imikino ya Gicuti mu cyumweru yise Rayon Week, ibikorwa iri gukora
ibifashijwemo n’uruganda rya Skol rutunganya ibyo kunywa bisembuye n’ibidasembuye.
Mu cyumweru cya Rayon Week Rayon sports yigaragaje mu mikino ya Gicuti itandukanye, nyuma yo Gutsindira Gasogi United I Nyanza, igatsindira Gorilla FC i Ngoma ndetse kuri uyu wa Gatandatu ikaba igomba gucakirana na Etincelles mu karere ka Rubavu.
