Mu
butumwa yashyize ku mbuga nkoranyambaga mu ijoro ryo ku wa Kane tariki 12
Werurwe 2026, uyu muhanzikazi yavuze ko iyi album yasohotse mu 1996 yabaye imwe
mu zafashe umwanya ukomeye mu buzima bwe ndetse no mu mitima y’abakunzi
b’umuziki.
Yagaragaje
ko iyi album yari yuzuyemo indirimbo zigaragaza imbaraga z’ijwi rye ndetse
n’amarangamutima akomeye, zirimo nka “It’s All Coming Back to Me Now,” “All By
Myself,” ndetse na “Because You Loved Me.”
Yavuze
ko indirimbo “It’s All Coming Back to Me Now” yabaye nk’indirimbo yongeye
kumvikana cyane mu bihe byakurikiye icyorezo cya COVID-19, aho abantu benshi
bayibonagamo ubutumwa bubagarura ku byishimo no ku kwibuka ibihe byiza
byabayeho.
Celine
Dion yavuze ko iyi album ya kane yakoze mu rurimi rw’Icyongereza yabaye
intambwe ikomeye mu rugendo rwe rwa muzika, kuko yakunzwe cyane ku rwego
mpuzamahanga.
Iyi
album “Falling Into You” yaje kugurishwa kopi zirenga miliyoni 30 ku Isi,
bituma iba imwe mu zatsinze cyane mu mateka ya muzika ya Pop.
Si
ibyo gusa kuko iyi album yanegukanye ibihembo bibiri bikomeye bya Grammy Awards
birimo ‘Album of the Year’ na Best Pop Album, ibintu byayihesheje umwanya
ukomeye mu mateka y’umuziki w’Isi.
Celine
Dion yavuze ko iyi album yabaye imwe mu zagize uruhare rukomeye mu gusobanura
uburyo muzika ya Pop yakorwaga mu myaka ya za 1990, ndetse ko indirimbo ziriho
zakomeje kugera ku mitima y’abakunzi b’umuziki kugeza na n’ubu.
Uyu
muhanzikazi yashimangiye ko nubwo hashize imyaka myinshi iyi album isohotse,
indirimbo zayo zigikomeje kumvwa no gukundwa n’abatandukanye ku Isi, ibintu
bigaragaza uburyo uyu mushinga wabaye igice cy’ubuzima bwa benshi.
“Falling Into You” ikomeje gufatwa nk’imwe mu album zikomeye cyane mu mateka ya muzika ya Pop, ndetse ikaba yaragize uruhare rukomeye mu gukomeza gushyira Celine Dion mu bahanzi bafite ijwi n’uruhare rukomeye mu muziki mpuzamahanga.
Celine
Dion yizihije imyaka 30 ya Album ‘Falling Into You’ imaze isohotse, yamuhesheje ibihembo bibiri bya Grammy harimo ‘Album of the Year’
Album
‘Falling Into You’ ya Celine Dion yasohotse mu 1996 igurishwa kopi zirenga
miliyoni 30 ku Isi, iba imwe mu zakunzwe cyane mu muziki wa Pop