Yampano yicujije icyizere yahaye abantu cyavuyemo ‘kugambanirwa’

Ni ubutumwa yashyize ku mbuga nkoranyambaga mu ijoro ryo kuri Kane, tariki ya 4 Ukuboza 2025, ashyiraho n’ifoto ye asuka amarira, agaragaza agahinda n’umuruho yanyuzemo.

Ibi bibaye mu gihe kuri uwo munsi nyirizina, mu rukiko hatangiwe ubusabe bushya n’umunyamategeko wa Ishimwe Patrick [Pazzo Man] uregwa gusakaza amashusho agaragaramo Yampano n’umukunzi we bari mu bihe byabo by’ibanga.

Uwo munyamategeko yasabye ko Yampano ubwe yakorwaho iperereza, akavuga ko bishoboka ko yaba yaragize uruhare mu isakazwa ry’ayo mashusho kuko yari kuri ‘email’ ye bwite.

Mu butumwa bwe buremerera imitima, Yampano yanyujije amagambo agaragaza ko yahuye n’akaga yatewe no gukunda abantu no kubaha icyizere gikomeye, nyamara bakamubera intandaro y’ibibazo ari gucamo muri ibi bihe.

Yagize ati: “Kubera wenda kuvukira kure y’iterambere, hari igihe mpa urukundo abantu nkarwima imbwa, kandi burya imbwa ntiyakugambanira. Reka mbabwire, nta muntu n’umwe wanyumva, ariko byose byapfiriye mu gutanga umutima wanjye."

Uyu muhanzi wamenyekanye mu ndirimbo nka “Uwo muntu”, yongeye kugaragaza ko n’ubwo ibihe arimo bitoroshye, yizeye ko hazaza ibihe byiza, ukuri kukamenyekana kandi byose bigasubira mu murongo. Yasoje agira ati “Ibihe bizacaho haze ibindi kandi byiza. Mwana wanjye cyangwa muntu wanjye, aheza ni mu ijuru.”

Ubutumwa bwa Yampano bwakomeje gucicikana ku mbuga nkoranyambaga, benshi bagaragaza impungenge n’inkunga yo kumushyigikira muri ibi bihe by’ubuzima bwe bwite n’akazi ke ka muzika kagezweho n’ibi bikorwa by’ugusesereza no kwangiza isura.

Yampano yasohoye ifoto imugaragaza asuka amarira, yumvikanisha ko yagambaniwe n’abantu yizeye

KANDA HANO UBASHE KUMVA EP UMUHANZI YAMPANO AHERUTSE GUSHYIRA HANZE