Iyi ntsinzi yafashije
Barcelona kwisubiraho nyuma yo gutsindwa na mukeba wayo Real Madrid mu mukino
wa El Clásico mu mpera z’icyumweru gishize.
Muri uwo mukino, Real
Madrid yatsinze Barcelona ibitego 2-0, ibifashijwemo na Kylian Mbappé
watsinzemo ibitego byombi, ihagarika uruhererekane rw’imikino icyenda Barcelona
yari imaze gutsindira kuri Camp Nou.
Gusa kuri iyi nshuro,
Barcelona yagarutse mu murongo w’intsinzi, ibifashijwemo n’ibitego bibiri bya
Raphinha, ibindi bibiri bya Lamine Yamal, ndetse n’ibyatsinzwe na Fermin Lopez
na Anthony Gordon.
Barcelona yafunguye
amazamu ku munota wa munani w’umukino, ubwo Raphinha yahabwaga umupira mwiza na
Fermin Lopez akawushyira mu izamu. Nyuma yaho gato, Lopez na we yatsinze
igitego cya kabiri, arangiza neza uburyo yari abonye.
Aba bakinnyi bombi
bongeye gufatanya mu gitego cya gatatu cya Barcelona, mbere y’uko Lamine Yamal
atsinda icya kane habura iminota mike ngo igice cya mbere kirangire. Iki gitego
cyaturutse ku busatirizi bwiza bwateguwe n’abakinnyi ba Barcelona, Yamal asoza
neza umupira akoresheje ishoti rikomeye.
Mu gice cya kabiri, Yamal
yongeye kwigaragaza atsinda igitego cya kabiri ku giti cye, akoresheje ubuhanga
bwo kuzamura umupira ukanyura hejuru y’umunyezamu Antonio Sivera.
Uyu mukinnyi w’imyaka 19,
uherutse kwegukana umwanya wa gatatu mu bihembo bya Ballon d’Or byatanzwe ku wa
Mbere, yari yishimiye kongera kwigaragaza imbere y’abafana ba Barcelona.
Nyuma y’iminota 17,
Anthony Gordon winjiye mu kibuga asimbuye na we yatsinze igitego cya gatandatu,
akoresheje uburyo busa n’ubwo Yamal yari amaze gutsindamo icya gatanu.
Alavés yabonye igitego
cy’impozamarira mu minota ya nyuma y’umukino, gitsinzwe na Mariano Díaz,
wafashe umupira wari woherejwe nabi na Rodri, awushyira mu izamu ryari ririnzwe
na Joan Garcia.
Kugeza ubu, Raphinha
amaze gutsinda ibitego 15 muri La Liga muri uyu mwaka w’imikino, arusha ibitego
bine Kylian Mbappé uri ku mwanya wa kabiri. Lamine Yamal, we amaze gutsinda
ibitego 10, akaba ari ku mwanya wa gatatu.
Iyi ntsinzi yasubije
Barcelona ku mwanya wa mbere n’amanota abiri irusha Atlético Madrid yari
yabanje kuyobora urutonde nyuma yo gutsinda Levante ibitego 2-0.
Real Madrid yo iri ku
mwanya ukurikira Atlético Madrid, irushwa amanota ane na Barcelona, ikaba itegereje
umukino wayo na Racing Santander uteganyijwe uyu munsi ku Cyumweru.