Yakozwe imyaka 14 ihuza abantu 380! Ikanzu yerekana amateka y’u Rwanda yanditswe muri Guinness World Records

Ni ikanzu itukura izwi nka The Red Dress, imaze kwamamara ku Isi yose nk'umushinga wahuje abantu benshi kurusha indi yose mu budozi. Yakozwe mu gihe cy'imyaka 14, ihuza n'abantu 380 baturutse mu bihugu 51, ikozweho n’urudodo rugera kuri miliyari imwe.

Uyu mushinga waninjiye mu gitabo cya Guinness World Records 2026 nk'uwaciye agahigo ko kuba ari wo mushinga munini ku Isi w'ubudozi bwakozwe n'abafatanyabikorwa benshi baturutse mu bihugu bitandukanye.

Iyi kanzu ntabwo ari igihangano cy'ubugeni gusa, ahubwo ni urubuga rwahurije hamwe inkuru z'ubuzima bw'abagore n'abagabo baturutse hirya no hino ku Isi, bamwe banyuze mu ntambara, abandi mu buhungiro, ubukene, akarengane n'ibindi bibazo bikomeye, ariko bose bakagira icyo basiga mu budozi bwayo.

Imyaka 14 yo guhuriza hamwe amateka y'Isi

Umuhanzi w'Umunya-Britain ukora ibijyanye n'ubugeni bwo kudoda, Kirstie Macleod, ni we watangije uyu mushinga mu 2009 ugamije guha ijwi abantu batabasha kugaragaza inkuru zabo mu buryo busanzwe.

Mu myaka 11 ya mbere, yawukoresheje nta nkunga afite. Yiyishyuriraga ubwe amafaranga yo kohereza ibice by'igitambaro muri Afurika, Aziya, u Burayi n'Amerika, hanyuma ababidodaga bakabimusubiza byamaze gukorwaho.

Byageze mu 2023 umushinga urarangira, ukaba wari umaze guhuriza hamwe abantu 380 barimo abagore 367, abagabo 11 ndetse n'abandi babiri batishyira mu byiciro by'igitsina.

Iyo kanzu ikozwe mu mwenda wa silk dupion, ipima ibiro 6.8, ariko uburemere bwayo nyabwo bushingiye ku nkuru n'amarangamutima biyirimo kurusha ibiro ifite.

U Rwanda rwahuje amateka ya Jenoside yakorewe Abatutsi n'urugendo rwo kwiyubaka

Mu bice byose bigize iyo kanzu, kimwe mu bikora ku mutima cyane ni icyakozwe n'abagore batandatu bo mu Mujyi wa Kigali nk’uko bivugwa n’ikinyamakuru Brisbanetimes.

Iyo urebye neza icyo gice, ubona ishusho y'umugabo wica umwana akoresheje umuhoro, hagakurikiraho umurongo w'umukara uzamuka ugahinduka izuba rifite amabara y'umukororombya.

Kirstie Macleod avuga ko iki gice cyerekana amahano Jenoside yakorewe Abatutsi yasize, ariko kikerekana n'urugendo rwo gukira ibikomere, kongera kubaho no kongera kubaka umuryango n'icyizere.

Ni igice cyerekana ko n'ubwo amateka ashobora kuba akomeye, ubuzima bushobora kongera kubaka icyizere.

Buri gice gifite inkuru yacyo

Ntabwo u Rwanda ari rwo rwonyine rwasize amateka kuri iyo kanzu. Hari abagore babiri b'Abanya-Palestine bayidodeye mu nkambi y'impunzi muri Libani mu 2009. Ikibabaje ni uko nyuma y'imyaka 17, abo bagore bagikomeje kuba muri iyo nkambi.

Muri Australia na ho, abaturage bagize umuryango w'abadozi wa Allthreads Embroidery Community badodeyeho amashusho ya Uluru, kanguru, amababi ya eucalyptus n'ibimera byo mu nyanja.

Umwe muri bo, Lyn Roberts, yavuze ko nyuma yo kohereza igice cyabo batari bazi ko kizahinduka igihangano kizwi ku Isi. Yagize ati: "Kubona kiri hano biranshimishije cyane. Iyo urebye n'ibindi bice byose byadodewe hirya no hino ku Isi, wumva ari icyubahiro kuba warabigizemo uruhare."

Guinness World Records yayihaye umwanya udasanzwe

Ubwo Guinness World Records yegerezaga Kirstie Macleod, yamubwiye ko uyu mushinga wari ukwiriye guhabwa ibihembo bitanu bitandukanye kubera agahigo waciye.

Mu mpera z'isesengura, wahise wandikwa muri Guinness World Records 2026 nk'umushinga munini ku Isi w'ubudozi bwahurije hamwe abantu benshi baturutse mu bihugu bitandukanye.

Nanone kandi, wahize indi yose mu kugira uruhare rw'ibihugu byinshi mu gukora umwambaro umwe, kuko byageze kuri 51.

Wanaciye agahigo ko guhuriza hamwe abantu bafite imyaka itandukanye cyane, kuko uwawudodeze muto yari afite imyaka itandatu, mu gihe umukuru yari ageze mu myaka isaga 80.

Abantu 28 gusa ni bo bemerewe kuyambara

N'ubwo The Red Dress yakunze gusabirwa kwambarwa mu bukwe, ibitaramo n'ibirori bitandukanye ku Isi, abantu bake cyane ni bo bayambaye.

Kugeza ubu, ni abantu 28 gusa bayambaye, kandi bose ni bamwe mu bayigizeho uruhare.

Kirstie Macleod avuga ko yakira ubusabe bwinshi bw'abifuza kuyambara, ariko buri gihe abasubiza ko yagenewe gusa abayidodeye.

Abamaze kuyambara bavuga ko ibaha imbaraga, bakumva bahujwe n'abandi bantu bose bayisizeho igice cy'ubuzima bwabo.

Nyuma ya Australia, urugendo ruyerekeza i Kigali

Muri iki gihe, The Red Dress iri kumurikirwa muri Museum of Brisbane muri Australia, aho izaguma kugeza muri Nzeri 2026.

Nyuma yaho, urugendo rwayo ruzakomereza mu Rwanda mu Ugushyingo 2026, mbere yo gusubira mu Bwongereza mu 2027.

Ku Banyarwanda, uku kuyakira si ukubona igihangano cy'ubugeni gusa. Ni amahirwe yo kongera kureba uburyo amateka y'igihugu yashyizwe ku mwambaro umwe uhuriza hamwe amajwi y'abaturage baturutse ku migabane yose y'Isi.

Iyo urebye The Red Dress, uba utareba ikanzu isanzwe. Uba ureba amateka adodeshejwe urudodo, amarira yahindutse icyizere, n'ubumwe bw'abantu baturutse mu bihugu 51 bahuriye ku gitekerezo kimwe: ko ubugeni bushobora kuvuga ibyo amagambo adashobora gusobanura.

Ubwo Guinness World Records yegerezaga Kirstie Macleod, yamubwiye ko uyu mushinga wari ukwiriye guhabwa ibihembo bitanu bitandukanye kubera agahigo waciye

Muri iki gihe, The Red Dress iri kumurikirwa muri Museum of Brisbane muri Australia, aho izaguma kugeza muri Nzeri 2026

Nyuma yaho, urugendo rwayo ruzakomereza mu Rwanda mu Ugushyingo 2026, mbere yo gusubira mu Bwongereza mu 2027