Icyo gihe Richard Batista yari umuganga afite imyaka 49, utuye i Ronkonkoma muri Long Island, New York, akaba yarakoraga muri Nassau University Medical Center. Yari yarashakanye na Dawnell Batista kuva ku wa 31 Kanama 1990, barabyaranye abana batatu.
Impyiko yayimuhaye muri 2001
Dawnell yari afite ibibazo bikomeye by’impyiko, ndetse yari yarigeze guhabwa impyiko ebyiri zombi zanga gukora neza. Ku wa 18 Kamena 2001, Richard yahisemo kumuha imwe mu mpyiko ze.
Igikorwa cyo kumutera iyo mpyiko cyakorewe muri University of Minnesota Medical Center, muri Minnesota, muri Leta Zunze Ubumwe za Amerika.
Ikinyamakuru The Guardian cyatangaje ko, Richard yavuze ko icyo gihe intego ye nyamukuru yari ukurokora ubuzima bw’umugore we, ndetse yari yizeye ko ibyo byari gufasha no gukomeza kubaka umuryango wabo.
Umugore yaje gusaba gatanya
Nyuma y’imyaka hafi ine, ibintu byarahindutse. Muri Nyakanga 2005, Dawnell Batista yatanze ikirego asaba gutandukana n’umugabo we, nyuma y’imyaka 15 bari bamaze bashakanye.
Urubanza rwa gatanya rwarakomeje, rumara imyaka myinshi, ndetse muri Mutarama 2009 Richard yahisemo kujya mu itangazamakuru avuga ko yumvaga yarahemukiwe cyane muri iyo nzira ya gatanya.
Yavugaga kandi ko yari amaze igihe adashobora kubona abana babo uko yabishakaga, kuko nyina atamwemereraga kubabona uko yifuza.
“Nshaka impyiko yanjye cyangwa miliyoni $1.5”
Nk’uko tubikesha ikinyamakuru CBS News, kuwa 7 Mutarama 2009, Richard n’umwunganizi we Dominick Barbara baganiriye n’abanyamakuru mu gace ka Garden City, muri Long Island.
Ni bwo Richard yatangaje ko mu biganiro byerekeranye no kugabana umutungo mu gihe cya gatanya, yashakaga ko impyiko yari yarahaye umugore we ayisubizwa , cyangwa akabona indishyi z’amafaranga zingana na miliyoni 1.5 z’amadolari.
Richard yashinjaga Dawnell kuba yaramucuye inyuma n’undi muntu bakundana, ariko Dawnell yahakanye ibyo birego.
Ku wa 13 Mutarama 2009, CBS News yatangaje ko umwunganizi wa Dawnell, Douglas Rothkopf, yavuze ko ibyo umugabo we yamushinjaga bidafite ishingiro. Uwo munsi kandi impande zombi zari zagaragaye mu rukiko rw’i Mineola muri New York.
Ese koko yashoboraga gusubizwa impyiko?
Abahanga mu mategeko n’imyitwarire y’ubuvuzi bavuze ko icyo cyifuzo cyari hafi y’ibidashoboka.
Umuhanga, Robert Veatch wo muri Georgetown University, yasobanuye ko impyiko yatanzwe nk’impano kandi ko ingingo z’umubiri zitagomba gufatwa nk’ibicuruzwa bigurwa cyangwa bigurishwa, ndetse bitagomb gufatwa nk’umutungo abantu bagabana muri gatanya.
Ikindi kandi, gukuramo impyiko Dawnell yari yaratewe byari gushyira ubuzima bwe mu kaga, kandi nta rukiko rwashoboraga gutegeka umuntu gukora igikorwa nk’icyo ku gahato.
Icyabaye nyuma
Icy’ingenzi ugomba kumenya ni uko Richard Batista atigeze ahabwa impyiko ye. Icyifuzo cye cyabaye kimwe mu bintu byatangaje benshi cyane mu rubanza rwabo rwa gatanya, ariko impyiko ntifatwa nk’umutungo wari kugabanywa hagati y’abashakanye. Abasesenguzi mu by’amategeko babonaga ko nta mahirwe yari afite yo kubona iyo mpyiko cyangwa miliyoni 1.5 z’amadolari yasabaga.
Inkuru ya Richard na Dawnell Batista yakomeje kuvugwa cyane kuko yagaragaje ikibazo kidasanzwe: ese iyo umuntu ahaye uwo bashakanye urugingo rw’umubiri kugira ngo arokore ubuzima bwe, nyuma umubano ukarangira, ashobora gusaba ko icyo yatanze agisubizwa? Kugeza ubu igisubizo ni oya!