Yago Pon Dat agiye gutaramira bwa mbere muri Uganda mu gitaramo azamurikiramo Album ya Kabiri

Ni igitaramo kizwi nka Listening Party, aho azahuriza hamwe abakunzi be n’abahanzi batandukanye bagize uruhare kuri iyi album. Yago yavuze ko indirimbo 18 zose ziyigize azaziririmba mu gitaramo, ndetse buri muhanzi wamufashije kuzitunganya cyangwa kuzicuranga azaba ahari.

Yabwiye InyaRwanda ati: “Indirimbo 18 zose nzazirimba, kandi umuhanzi wese wagaragaye kuri iyi Album agomba kuzaba ahari. Nka Sintex, Paccy Kizito, Okkama n’abandi bose nzaboherereza ‘invitation’ kugira ngo tuzataramane.”

Iki gitaramo kizabera ahitwa Nomad, hamwe mu hantu hakomeye h’imyidagaduro muri Uganda. Yago yavuze ko ari ishema kuri we kuba ari ho azakorera igitaramo cye cya mbere kuva yimukiye ibikorwa bye muri kiriya gihugu.

Uretse abahanzi bo mu Rwanda bazamufasha, Yago yavuze ko hari n’abahanzi bakomeye bo muri Uganda bazifatanya nawe, barimo na Levixone.

Mbere y’iki gitaramo, azabanza kwitabira igitaramo cyo kuru Lugogo Cricket Oval ku wa 19 Nzeri 2025.

Iyi album agiye kumurika yashyizwe hanze ku wa 25 Nyakanga 2025, ikaba ari iya kabiri nyuma ya Suwejo yo mu 2023. Ifite indirimbo 18 zirimo: Amashagaga, Ibyo birabera, Kwa Mama, Ocean (feat. Paccy Kizito), Elo, Nzaririmba Igitangaza, Habaye Ibitangaza (feat. Inyogoye), Nooma (feat. Double Jay wo mu Burundi), Kasabanitta, Shall We Do It Again?, No Nyash No Problem (feat. Ykee Benda wo muri Uganda), Sarambara, Urakapu, Padiri n’Umudari, Sokka (feat. Sintex), Mumavi (feat. Okkama), ndetse na Elo Remix (feat. Ayma wo muri Uganda).

Mu gutunganya iyi album, Yago yakoranye na ba producer 10 barimo: Logic Hit It, Prince Kiiz, Dany Beats, Knox on the Beat, ISB Pro, Chrisy Neat, Iyzo Pro, Epa Gold, Lion Beat na Devy Denko & Klein.

Album yanahawe umugisha na Mavenge Sudi, umuhanzi w’inararibonye mu muziki nyarwanda, mu gihe ‘design’ yayo yakozwe na Zeo Trap.

Yago aheruka gusohora album ya mbere yise Suwejo mu 2023, ayimurikira muri Camp Kigali ku wa 23 Ukuboza 2023. Iyo album yari igizwe n’indirimbo 13 zirimo: Suwejo, Rata, Si Swing, Umuhoza, Yahweh, Original Kopy, True Love, Alright, Naremeye (feat. Bushali), My Love, Vis à Vis, Yago Piano na T’en Vas Pas.

Yayikoranye n’aba producer 13 barimo Element, The Major, Iyzo Pro, Knox on the Beat, Bob Pro, Santana Sauce, Fanta Pro, Prince Kiiz, Pakkage, Chrisy Neat, Nessim, Logic Hit It na Flyest Music.

Yago yatangaje ko azamurika Album ye ya kabiri ‘Yago Life II’ mu gitaramo cya mbere azakorera muri Uganda 

Yago yavuze ko indirimbo 18 zose zigize iyi Album azaziririmba mu gitaramo kizabera i Kampala 

Yago yashimangiye ko abahanzi bose bakoranye kuri iyi Album bazaba bahari mu rwego rwo kumushyigikira 

Yago yatangaje ko iki gitaramo kizabera ahantu hakomeye mu myidagaduro yo muri Uganda, ahitwa Nomad

KANDA HANO UBASHE KUMVA ALBUM YA KABIRI 'YAGO LIFE II' Y'UMUHANZI YAGO