Yafunguwe! Twibukiranye ibintu 5 byaranze urubanza rwa Bishop Gafaranga –VIDEO

Ni urubanza rwakurikiwe n’abatari bake, haba abamukunda kubera ubuhanga bwe mu gusetsa no kwigisha binyuze mu biganiro bya YouTube. Kuri uyu wa Gatanu, tariki ya 10 Ukwakira 2025, Urukiko Rwisumbuye rwa Gasabo ni bwo rwasomye umwanzuro wahinduye amateka y’uyu mugabo w’imyaka 35.

1.Urugendo rutoroshye rwatangiye mu nkiko

Ku wa 7 Gicurasi 2025, Urwego rw’Igihugu rw’Ubugenzacyaha (RIB), rwatangaje ko rwataye muri yombi Bishop Gafaranga akurikiranyweho ibyaha byo gukubita no gukomeretsa, ndetse no guhoza ku nkeke uwo bashyingiranywe, Annette Murava.

Nyuma y’iminsi micye afunzwe, Urukiko rw’Ibanze rwa Nyamata rwategetse ko afungwa iminsi 30 y’agateganyo, kugira ngo hakorwe iperereza ryimbitse.

Ubushinjacyaha bwari bwaragaragaje ibimenyetso birimo raporo y’ubuyobozi bw’inzego z’ibanze ivuga ko urugo rwabo rwari rufite amakimbirane, ndetse na raporo ya muganga yemezaga ko Murava yagize ibikomere.

Gafaranga, mu kwiregura kwe, yagiye avuga ko amakimbirane y’urugo rwe n’umugore we atigeze agera ku rwego rw’ihohoterwa, ahubwo ko byashoboraga gukemurwa n’imiryango.

Ariko urukiko rwasanze ibyo ashinjwa bifite ishingiro, rumutegeka gukomeza gufungwa mu gihe dosiye ye itarangira.

2.Urubanza rwabereye mu muhezo

Ku wa 22 Gicurasi 2025, urukiko rwemeye icyifuzo cy’Ubushinjacyaha ko urubanza rubera mu muhezo. Icyo gihe, Umucamanza yasobanuye ko ari urubanza rusanzwe rureba umuryango kandi ko ibivugirwamo bishobora kubangamira isura n’imibereho y’uwahohotewe ndetse n’abana babo.

Umunyamategeko we yasobanuye ko kuburanira mu muhezo byari mu nyungu z’umuryango, kugira ngo ibibazo byabo bitaba inkuru y’amateka y’amarira y’urugo rwabo. Icyo gihe, umugore we Annette Murava yari yamaze gutangaza mu buryo buteruye ko adashaka ko urugo rwe rusenyuka, ndetse ahakana amakuru yavugaga ko ari we wafungishije umugabo we.

3.Murava Annette yahakanye ko ari we wafungishije umugabo we

Mu mashusho yatambukije ku rukuta rwe rwa YouTube, Murava yagaragaye afite ihumure ryuzuye, avuga amagambo yuje urukundo. Ati: “Turakomeye kandi turi amahoro. Hari abavuga byinshi ariko Imana izi ukuri.”

Mu gihe abantu benshi bari bamaze kumufata nk’umugore washatse kwihorera, Murava we yahisemo kwigaragaza nk’umugore wihanganye, wifuza kwiyunga n’umugabo we aho kumwitaza.

Yasabye abantu kwirinda kubogama mu byo bumva biturutse mu itangazamakuru, avuga ko mu gihe cya vuba bazagaragara bari kumwe basobanura byose.

Kuri konti ye ya Instagram, Murava yigeze no kwandika amagambo akomeye agira ati: “Imana iri muri iyi nkuru. Isengesho ryanjye n’umutima wanjye biri kumwe nawe.”

Ni ubutumwa bwateye impaka mu bantu benshi, bamwe babifata nk’ubuhamya bw’urukundo ruhamye, abandi bakabona ko ari ikimenyetso cy’umugore uheze mu gahinda adashobora kubaho adafite uwo yubakanye nawe.

4.Igihe cy’amarira n’agahinda hanze y’urukiko

Mu gihe Bishop Gafaranga yari akiri muri gereza, ku wa 7 Nyakanga 2025 ubwo yaburanaga mu Rukiko Rwisumbuye rwa Gasabo, byari amarira ku ruhande rwa Murava.

Murava yageze ku rukiko ahetse umwana mu mugongo, afite impapuro zigaragaza ko ari muzima mu mitekerereze, mu rwego rwo guhakana raporo yavugaga ko afite agahinda gakabije.

Ariko ntiyigeze yemererwa kwinjira mu rukiko. Ubwo yamenyeshwaga ko adakenewe, yicaye hasi ararira biratinda.

Abari bahari bavuga ko byari ibihe by’amarira adasanzwe—amarira y’umugore utumva impamvu umuryango we uri gusenyuka imbere y’imbaga.

5.Umwanzuro w’urukiko – Gafaranga yarekuwe

Nyuma y’amezi atanu ategereje, urukiko rwisumbuye rwa Gasabo rwasomye urubanza rwe kuri uyu wa Gatanu tariki 10 Ukwakira 2025. Rwamuhamije ibyaha byo gukubita no gukomeretsa, ndetse no guhoza ku nkeke uwo bashyingiranywe.

Ariko kubera ko yagaragaje kwicuza, akemera amakosa mu buryo buziguye, kandi umugore we yemeza ko yamubabariye, urukiko rwamuhanishije igifungo cy’umwaka umwe usubitse n’ihazabu ya 150,000 Frw.

Ibyo byatumye arekurwa ako kanya, asubira mu muryango we nyuma y’amezi atanu yari amaze mu igororero rya Ririma i Bugesera.

Umwaka usubitse, bisobanuye ko agomba kwirinda ibyaha mu gihe cy’amezi 12, kuko aramutse agarutse mu makosa, urukiko rwahita rumuhanisha igifungo yari yasonewe.

Bishop Gafaranga wamenyekanye nk’umuntu wifashishaga urwenya n’amagambo y’ubuhanga mu gusetsa no kwigisha, ubu atangiye urupapuro rushya mu buzima bwe.

Kuva ku ifatwa rye, gusomerwa ibyaha, kugeza ku mwanzuro w’urukiko, Bishop Gafaranga yakomeje kugaragara nk’uwizeye ubutabera ariko kandi atemera ibyaha aregwa, bigeza ku bushishozi bw’urukiko rwamukatiye igifungo cy’umwaka umwe usubitse

KANDAHANO UREBE IKIGANIRO KIGARUKA KU IFUNGURWA RYA BISHOP GAFARANGA