Mu myaka myinshi ishize, umuziki wa Afurika wakomeje gutera imbere ku rwego mpuzamahanga, aho abahanzi bawo bagiye bahabwa ibihembo bikomeye mu marushanwa atandukanye ku Isi. Ibi byafashije benshi muri bo kwandika amateka no kumenyekana kure y'umugabane bakomokaho.
Urutonde rw'abahanzi 10 bafite ibihembo byinshi muri Afurika ruyobowe n'umunya-Nigeria Wizkid, wamaze kwegukana ibihembo bigera kuri 166 mu rugendo rwe rwa muzika.
1. Wizkid (Nigeria) – Ibihembo 166
Ayodeji Ibrahim Balogun uzwi nka Wizkid ni we uyoboye uru rutonde. Mu bihembo bikomeye yegukanye harimo Grammy Award ya 2021 mu cyiciro cya Best Music Video ku ndirimbo "Brown Skin Girl" yakoranye na Beyoncé.
Yanegukanye MOBO Awards zirindwi, BET Awards enye, Billboard Music Awards eshatu ndetse n'ibihembo byinshi bya The Headies na MTV Awards, ibintu byamugize umwe mu bahanzi bafite amateka akomeye muri Afurika.
2. Angélique Kidjo (Benin) – Ibihembo 140
Angélique Kidjo ni umwe mu bahanzi bafite izina rikomeye ku Isi bakomoka muri Afurika. Yatwaye Grammy Awards eshanu ndetse anahabwa igihembo cya Polar Music Prize mu 2023, gifatwa nka kimwe mu bihembo bikomeye mu muziki ku rwego rw'Isi.
Mu 2021 kandi yabaye umwe mu bahanzi b'Abanyafurika bashyizwe kuri Hollywood Walk of Fame.
3. Sarkodie (Ghana) – Ibihembo 120
Sarkodie ni umwe mu bahanzi bafite ibihembo byinshi muri Ghana no muri Afurika. Mu 2019 yabaye umuhanzi wa mbere wegukanye BET Hip Hop Award mu cyiciro cya Best International Flow. Yanatwaye BET Award ya Best International Act: Africa ndetse anegukana ibihembo byinshi bya Headies Awards.
4. Davido (Nigeria) – Ibihembo 119
Davido amaze imyaka myinshi ari umwe mu bayoboye umuziki wa Afurika. Mu bihembo bikomeye yegukanye harimo BET Awards, MTV Europe Music Awards, MOBO Awards na MTV Africa Music Awards. Mu 2017 yahawe MTV EMA ebyiri zirimo Best African Act na Best Worldwide Act.
5. Shatta Wale (Ghana) – Ibihembo 109
Shatta Wale ni umwe mu bahanzi ba Dancehall bafite amateka akomeye muri Afurika. Amaze gutwara ibihembo birenga 100, harimo 11 bya International Reggae and World Music Awards (IRAWMA). Yanahawe ibihembo bitandukanye muri AFRIMMA, African Entertainment Awards ndetse na Nigeria Entertainment Awards.
6. Burna Boy (Nigeria) – Ibihembo 99
Burna Boy ni umwe mu bahanzi b'Abanyafurika bageze kure ku rwego mpuzamahanga. Mu 2021 yegukanye Grammy Award ya Best Global Music Album ku bw'album ye "Twice as Tall". Yanatwaye BET Awards inshuro eshatu zikurikiranya, MOBO Awards nyinshi ndetse na MTV Europe Music Awards.
7. 2Baba (2Face Idibia) (Nigeria) – Ibihembo 81
2Baba afatwa nk'umwe mu bahanzi bubatse umusingi wa muzika ya Nigeria igezweho. Mu bihembo bye harimo BET Award, MTV Europe Music Award, MOBO Award ndetse na World Music Award. Yabaye kandi umwe mu bahanzi ba mbere bo muri Afurika bageze ku rwego rwo guhangana ku isoko mpuzamahanga.
8. Stonebwoy (Ghana) – Ibihembo 78
Stonebwoy ni umwe mu bahanzi ba Reggae na Dancehall bubashywe muri Afurika. Mu 2015 yegukanye BET Award ya Best International Act: Africa. Yanatwaye ibihembo bya IRAWMA ndetse ahabwa amashimwe na Billboard kubera ibikorwa bye by'umuziki.
9. Diamond Platnumz (Tanzania) – Ibihembo 73
Diamond Platnumz ni umwe mu bahanzi b'ibihe byose bakomeye muri Afurika y'Iburasirazuba. Mu bihembo yegukanye harimo AFRIMA Awards, MTV Europe Music Awards na Soundcity MVP Awards. Yagize uruhare runini mu kugeza umuziki wa Bongo Flava ku rwego mpuzamahanga.
10. Tiwa Savage (Nigeria) – Ibihembo 60
Tiwa Savage ni umwe mu bahanzikazi bakomeye muri Afurika. Amaze kwegukana ibihembo byinshi birimo AFRIMMA Awards, MTV Africa Music Awards ndetse na The Headies Awards. Yamenyekanye cyane nk'umwe mu bagore bafite uruhare rukomeye mu iterambere rya Afrobeats ku rwego rw'Isi.
Muri rusange, Nigeria ni cyo gihugu gifite abahanzi benshi kuri uru rutonde, ibintu bigaragaza uburyo inganda z'umuziki zaho zakomeje kwaguka no kugira ijambo rikomeye ku rwego rwa Afurika no ku Isi yose.