Igikorwa cyo gushyikiriza ibyo bikoresho ku mugaragaro Ishuri Winners Mount Academy, cyabaye ku wa Gatatu tariki ya 23 Nzeri 2026, mu Karere ka Musanze, mu Murenge wa Cyuve, mu Kagari ka Kabeza, mu Mudugudu wa Kungo ahari icyicaro cy'iryo Shuri.
Iki gikorwa cyitabiriwe na Ambasaderi wa Israel mu Rwanda, H.E. Ambassador Einat Weiss n'intumwa yari ayoboye, ubuyobozi bw'Intara y'Amajyaruguru, ubw'Ishuri Winners Mount Academy, inzego z'umutekano, ababyeyi, abarezi n'abanyeshuri.
Iyi Laboratwari y’ikoranabuhanga n’ibikoresho bitandukanye bya siyansi, byubatswe ku bufatanye n’Ambasade ya Israel mu Rwanda, mu rwego rw’ubufatanye busanzwe hagati y’impande zombi mu guteza imbere uburezi. Ibikorwa byo kuyubaka byatwaye arenga ibihumbi $30, akaba arenga Miliyoni 44 z'amafaranga y'u Rwanda [44,434,470 Frw].
Ambasaderi wa Israel mu Rwanda, Nyakubahwa Einat Weiss, yavuze ko kuba barahisemo gukorana na Winners Mount Academy ari uko bagaragaje ubushake ndetse akaba ari Ishuri rikorera ku ntego bijyanye n'icyerekezo cy'Igihugu.
Yagize ati: "Buri gihe nishimira kuba hano muri Musanze, iri Shuri rigezweho kubera intego yaryo nziza mu ikoranabuhanga. Twavuganye n'umuyobozi waryo Elie mbese haba kubuka ibi bikorwa dutashye no kubona abanyeshuri byamutwaye umwaka umwe."
"Mbere ya byose twizera ko u Rwanda ruyoboye haba kuri uyu mugabane no ku Isi mu kugira icyererekezo no kwiyemeza kandi twizera abana b'ahazaza h'iki Gihugu. Nk'uko twizeye cyane iki Gihugu dushaka kuba abafatanyabikorwa muri urwo rugendo. Kuva nagera ino mu myaka itatu ishize, nabonye uburyo iki Gihugu cyateye imbere."
Yakomeje ati: "Nk'uko Perezida [Kagame] abivuga, ni ukwita ku bana, twatangiriye ku bana nk'uko ubiba urubuto mu butaka ejo ukaba ufite igiti kiza, dushaka kuba abafatanyabikorwa muri urwo rugendo. Iyo duhuye rero n'abantu nka Elie ntitwakwanga gukorana nabo kandi ubu bufatanye buzakomeza."
Umuhuzabikorwa wa STEM POWER Rwanda, Espoir Serukiza, avuga ko usibye abanyeshuri bo muri Winners Mount Academy bazigishwa ikoranabuhanga na Siyansi, yizera ko n'abandi bahegereye bazabona ubumenyi kandi buzabafasha gushyira mu bikorwa ibyo bize.
Ati: "Ubu hashyizweho ikigo cy'ikoranabuhanga kizigisha abanyeshuri bakiri bato bo mu mashuri abanza n'ayisumbuye, kibigishe iby'ikoranabuhanga n'ubumenyi bushingiye kuri siyansi.
Abana ba hano na bagenzi babo baturanye mu bindi bigo bazahungukira ubumenyi mu ikoranabuhanga n'ubumenyi ngiro. Umusaruro ugenda uboneka kuko bifasha abana gushyira mu bikorwa ibyo bize biciye mu bikoresho baba bahawe."
Bamwe mu banyeshuri biga muri Winners Mount Academy, bo bemeza ko ibikoresho bahawe bizabafasha kumenya neza ibyo biga ariko ko bazanabafasha mu guhanga ibishya bikabahesha n'amafaranga.
Niyonsenga Prince, ni umwe muri bo, yagize ati: "Ibi bikoresho njye bigiye kumfasha gukora ubushakashatsi mu ikoranabuhanga kuko nifuza kuzaba umuntu uzi gukora imodoka neza."
Isimbi nawe yagize ati: "Ibi bikoresho twahawe turabyishimiye cyane kandi tuzabifata neza tubibyaze umusaruro. Nkiri umwana numvaga nakora ikibumbano (Statut) kigezweho none ubu nzifashisha ikoranabuhanga njyanishe n'aho isi igeze ngikore kandi bizampesha amafaranga."
Umuyobozi akaba n'Uwashinze Winners Mount Academy, Muhizi Elie, yashishikarije abakiri bato kugira intego no guharanira kuyigera bajyanishije n'aho iterambere ry'Isi riganisha. Ati: "Nakuze mfite inzozi kandi nkurira mu kinyejana cy'ikoranabuhanga rihanitse bituma nanjye nkanguka".
"Iyi gahunda izatanga umusaruro kuko iyo urebye uko ibintu bitangiye bikwereka imbaraga zabyo n'ukuntu bihagaze. Dufite abafatanyabikorwa banini kandi bafite imbaraga, bafite n'inararibonye mu bintu by'ikoranabuhanga. Rero intego ni ugutuma umwana wacu urangiza aba afite ubushobozi, icyerekezo ndetse n'intumbero mu ikoranabuhanga rihambaye."
Yashimiye Ambasade ya Israel mu Rwanda n'abandi bafatanyabikorwa, yizeza abifuza kurerera muri iryo Shuri ko batazabatererana kandi ko bafite intego yo kuba Ishuri Mpuzamahanga.
Ati: "Ikintu gikomeye Ambasade ya Israel yadufashije ni ukuduha abafatanyabikorwa, kutumenyekanisha no kuduha ibikoresho ku buryo niba tuvuze ngo turi urugo ruhanga udushya tube dufite n'ibyo bikoresho kandi Israel yarabiduhaye iduha murandasi n'amahugurwa, igisigaye ni ahacu kubikoresha."
"Ibi bidukuye ku rwego rwo kwiga ibintu mu magambo ahubwo twongeraho no kubikora. Biradukura ku rwego rwo kuba abanya-Musanze gusa tujye ku rwego mpuzamahanga. Ababyeyi nibatwizere batuzanire abana ntabwo tuzabatenguha."
Umwihariko wa Winners Mount Academy, ifite ubufatanye na Leta ya Israel ku bijyanye n'Ikoranabuhanga ikindi kandi Leta y'u Budage yohereza abarimu buri mwaka ku buryo umwana uhiga arangiza azi neza Ikidage bikamuhesha amahirwe yo kujya mu Budage kwihugura no guhahayo ubundi bumenyi.
Mu nshuro ebyiri bamaze gukora ibizamini bya Leta batsindishije ku kigero cya 100/100 kubera ko umwana waharerewe adashobora gutegwa mu ndimi z'Ikinyarwanda, Igifaransa n'Icyongereza hakiyongeraho ubumenyi mu bya siyansi n'Ikoranabuhanga no gukurikiza integanyanyigisho za leta uko zateguwe.
Usibye kuba abarerera muri Winners Mount Academy abana babo bahabwa uburezi bufite ireme kandi badahenzwe, ababyeyi boroherezwa mu kwishyura ku buryo ntawe binaniza kandi umwana akiga neza.
Uwifuza kurerera mu Ishuri Winners Mount Academy mu mashuri y'incuke, abanza n'ayisumbuye mu cyiciro rusange, Tronc Commun, agana ku cyicaro cy'iri Shuri aho rikorera cyangwa agahamagara ubuyobozi bwaryo kuri telefoni igendanwa +250788997084 agahabwa ibisobanuro.
Ku wa Gatatu tariki ya 23 Nzeri 2026, ni bwo Winners Mount Academy yahawe laboratwari y’ikoranabuhanga n’ibikoresho bitandukanye bya siyansi,
Umuyobozi akaba n'Uwashinze Winners Mount Academy, Muhizi Elie, aganira na Ambasaderi wa Israel mu Rwanda, Einat Weiss
Laboratwari y’ikoranabuhanga ya Winners Mount Academy ifite agaciro k'amafaranga arenga ibihumbi 30 by’amadolari ya Amerika
Winners Mount Academy yungutse Laboratwari y’ikoranabuhanga n’ibikoresho bya siyansi, byubatswe ku bufatanye n’Ambasade ya Israel mu Rwanda
Abanyeshuri ba Winners Mount Academy bakiriye abashyitsi babagendereye mu mbyino nyarwanda
Umwanditsi: Jean Claude Bazatsinda - InyaRwanda.com