Wavugiye uruganda rwose - Muyoboke Alex kuri Bruce Melodie watuye ibibazo bibangamiye abahanzi

Ibi yabigarutseho nyuma y’uko Bruce Melodie ahawe ijambo mu Nama y’Igihugu y’Umushyikirano yasojwe ku wa Gatanu tariki ya 6 Gashyantare 2026, yabereye muri Kigali Convention Center, iyobowe na Perezida wa Repubulika y’u Rwanda, Paul Kagame.

Mu kiganiro yatanze, Bruce Melodie yagarutse ku rugendo rw’imyaka isaga 20 umuziki nyarwanda umaze ugerageza kwisanga ku isoko mpuzamahanga, agaragaza aho ugeze n’intambwe zimaze guterwa, ariko anashimangira ko hakiri imbogamizi zikomeye zikibangamiye abahanzi mu kazi kabo ka buri munsi.

Yavuze ku kibazo cy’ibikorwaremezo by’ibitaramo bikiri bike kandi bihenze, ku buryo bigora abahanzi gutegura no gushyira mu bikorwa ibitaramo bikomeye byinjiza amafaranga.

Yanagarutse ku kibazo cya ‘Monetization’ ku mbuga nkoranyambaga kitarashyirwa mu bikorwa mu Rwanda, bigatuma abahanzi n’abandi bakora mu rwego rw’inganda ndangamuco batabasha kubyaza umusaruro ibihangano byabo bishyirwa ku mbuga zitandukanye zikoreshwa ku rwego mpuzamahanga.

Mu butumwa yanyujije ku rubuga rwe rwa Instagram ku wa Gatandatu tariki 7 Gashyantare 2026, Muyoboke Alex yagaragaje ko yanyuzwe bikomeye n’uburyo Bruce Melodie yakoresheje uwo mwanya adatinya, akavuga ku bibazo by’ingutu byugarije creative industry.

Yagize ati “Wakoze cyane Bruce. Reka ngushimire mu izina ryanjye bwite na Voxa Group. Ni kenshi ‘creative industry’ twagiye tugira amahirwe yo guhura na Nyakubahwa Perezida wa Repubulika, Paul Kagame, ariko ntihaboneke umwanya mwiza wo kuvuga ku bibazo dufite muri ‘creative industry’ (inganda ndangamuco). Mu by’ukuri waraye uvugiye ‘industry’, binkora ku mutima.”

Muyoboke Alex yakomeje agaragaza ko yashimishijwe n’ibibazo by’ingenzi Bruce Melodie yashyize imbere, birimo kuba abahanzi badafite aho gukorera ibitaramo hagutse kandi hahendutse, kuba Leta yakworohereza abakora mu nganda ndangamuco ku bijyanye n’imikoreshereze y’imbuga nkoranyambaga zitanga inyungu, ndetse no kuba ubuhanzi bwashyirwa mu nkingi z’ingenzi zigize ubukerarugendo bw’Igihugu binyuze muri gahunda ya Visit Rwanda.

Yagize ati “Bimwe mu bibazo by’ingutu wagaragaje byanshimishije cyane, cyane cyane ibyerekeye aho gukorera ibitaramo, 'Social Media Monetization' n’uko ‘creative industry’ yakwitabwaho igashyirwa muri gahunda z’ubukerarugendo bw’igihugu.”

Yanasoje ashimira Perezida Paul Kagame ku gutega amatwi ibitekerezo n’ubusabe byatanzwe, agaragaza icyizere ko ibyo Bruce Melodie yagaragaje bishobora kuba intangiriro y’impinduka nziza mu iterambere ry’inganda ndangamuco mu Rwanda.

Ubu butumwa bwa Muyoboke Alex bugaragaza ko ijwi rya Bruce Melodie ritumvikanye nk’iry’umuhanzi ku giti cye gusa, ahubwo nk’iry’uruganda rwose rw’abahanzi n’abandi bakora mu myidagaduro, aho benshi babona ko icyo gikorwa ari intambwe ikomeye iganisha ku guhabwa agaciro no kwitabwaho ku buhanzi ku rwego rw’Igihugu.

View this post on Instagram

A post shared by Muyoboke Alex 🇷🇼 (@muyoboke_alex)

Muyoboke Alex yashimye Bruce Melodie ku gukoresha neza umwanya yahawe mu Nama y’Igihugu y’Umushyikirano, avuga ko yagize ubutwari bwo kugeza ku buyobozi bw’Igihugu ibibazo bikibangamiye abahanzi n’inganda ndangamuco muri rusange

Mu Nama y’Igihugu y’Umushyikirano, Bruce Melodie yagaragaje imbogamizi zikibangamiye abahanzi zirimo kubura ibikorwaremezo by’ibitaramo no kutagira ‘Monetization’ ku mbuga nkoranyambaga, asaba ko ubuhanzi bwahabwa agaciro bukajyanishwa n’iterambere ry’igihugu

BRUCE MELODIE NA SCOVIA MUTESI BASOBANUYE IKIBAZO CYA 'MONETIZATION' KIBANGAMIYE ABAHANZI MURI RUSANGE