Ku wa 28 Nyakanga 2026, Malawi yakoze amateka adasanzwe ubwo yakinaga umukino wayo wa mbere mu mateka ya Women's Africa Cup of Nations (WAFCON), ihita itsinda Nigeria, ikipe ifite amateka akomeye kurusha izindi muri Afurika.
Umukinnyi wa Kansas City Current ukina muri NWSL, Temwa Chawinga, ni we wafunguye amazamu ku munota wa 73, nyuma yo gutsinda umunyezamu wa Nigeria Chiamaka Nnadozie wari wavuye mu izamu hakiri kare. Iki gitego cyabaye icya mbere cya Malawi mu mateka ya WAFCON.
Nyuma y'iminota mike, kapiteni wa Malawi Tabitha Chawinga, usanzwe akinira Olympique Lyonnais yo mu Bufaransa, yatsinze igitego cya kabiri ku munota wa 79. Abavandimwe bombi bahise bishimira iki gitego bahoberana, ibintu byashimishije cyane abafana ba Malawi bari muri stade.
Nigeria yagarutse mu mukino ku munota wa 91, aho Rasheedat Ajibade yinjije penaliti, agabanya ikinyuranyo.
Ariko Malawi ntiyacitse intege. Mu minota y'inyongera, Temwa Chawinga yongeye gutsinda igitego cya gatatu, cyabaye icye cya kabiri muri uyu mukino, ashyira ikipe ye mu mwanya mwiza wo kubona intsinzi.
Nubwo Uchenna Kanu yatsinze igitego cya kabiri cya Nigeria ku munota wa 98, nticyahagije ngo ikipe ye ibone amanota.
Nyuma y'ifirimbi ya nyuma, abakinnyi ba Malawi binjiye mu kibuga bishimira iyi ntsinzi y'amateka, mu gihe Temwa Chawinga yahawe igihembo cy'umukinnyi wahize abandi (Player of the Match).
Malawi yinjiye muri iri rushanwa ari yo kipe ifite urutonde rwo hasi kurusha izindi zose muri WAFCON, iri ku mwanya wa 153 ku rutonde rwa FIFA, mu gihe Nigeria ari yo kipe ya mbere muri Afurika kandi iri ku mwanya wa 36 ku Isi.
Iri rushanwa ni ingenzi cyane kuko amakipe ane ya mbere azabona itike yo kwitabira Igikombe cy'Isi cy'Abagore cya 2027. Malawi, itarigeze ikina Igikombe cy'Isi, yatangiye urugendo rwayo itanga ubutumwa bukomeye.
Mu yindi mikino yo muri iri tsinda, Zambia yatsinze Misiri ibitego 6-0, aho kapiteni wayo Barbra Banda yatsinze ibitego bine wenyine.
Intsinzi ya Malawi kuri Nigeria ni imwe mu mpinduka zikomeye zabaye muri WAFCON 2026 kugeza ubu. Abavandimwe Temwa na Tabitha Chawinga bayoboye igihugu cyabo mu kwandika amateka mashya, berekana ko n'amakipe mashya ashobora guhangana n'ibihangange bya ruhago yo muri Afurika.
Iyo ntsinzi ishobora kuba intangiriro y'urugendo rushya rwa Malawi mu mupira w'amaguru w'abagore.
Source:the atheletic