Vybz Kartel, umwami wa Dancehall agiye gukorera igitaramo i Kigali

Ni ku nshuro ya mbere iri serukiramuco rigiye kuba, rifite intego yo guhuza impano z’Afurika no kuzamura ubukungu bushingiye ku guhanga udushya mu muziki, imideli n’ubuhanzi muri rusange.

Urugendo rwa Vybz Kartel ruzatangirira muri Uganda ku wa 1 Gicurasi 2026, ku munsi w’Umurimo (Labour Day), aho azataramira abafana be muri Lugogo Cricket Oval i Kampala.

Urugendo ruzasozwa ku wa 8 Gicurasi 2026 i Nairobi muri Laureate Gardens ku muhanda wa Thika Road muri Kenya.

Bukeye bwaho, ku wa 09 Gicurasi 2026 azahita akomereza mu Rwanda aho azataramira muri BK Areba, inzu imaze kumenyekana mu kwakira ibitaramo mpuzamahanga bikomeye.

Ku bakunzi ba Dancehall mu Rwanda, iki ni igitaramo cyitezweho kuzaba amateka, dore ko Vybz Kartel ari umwe mu bahanzi bafite izina rikomeye kandi rimaze igihe kinini ryumvikana ku Isi, haba mu bihangano bye ndetse no mu nkuru zagiye zimuvugwaho.

Abategura iri serukiramuco batangaje ko Talanta Afrika Festival igamije kurenga kuba igitaramo gisanzwe, ahubwo ikaba urubuga rwo kwerekana imbaraga z’urubyiruko rwa Afurika mu guhanga no mu bucuruzi bushingiye ku buhanzi.

Mu kiganiro n’abanyamakuru, Bushington wa Tunez Records muri Uganda yavuze ko iki gikorwa ari “umutwe w’urugendo rushya ruhuza Abanyafurika binyuze mu muco, indangagaciro n’imbaraga zo guhanga.”

Yagize ati “Ibi si igitaramo gusa. Ni urugendo rugamije kugaragaza ibyo Afurika y’Iburasirazuba ishoboye no kubihuza n’Isi.”

Umwe mu bafatanyabikorwa, Mayanja Jackson, we yavuze ko intego ari ukubaka urubuga ruzahoraho, rutari igikorwa cy’umwaka umwe gusa, ahubwo rukazahinduka ihuriro rihuza abahanzi n’abanyamwuga mu nganda z’imyidagaduro zo mu karere.

Uretse Vybz Kartel uzaba ari we uyoboye (headliner) iri serukiramuco mu bihugu byose uko ari bitatu, hazitabira n’abandi bahanzi barimo umunya-Kenya Charisma, wamamaye mu ndirimbo zirimo “True Love”.

Charisma aherutse guteguza abakunzi be ku mbuga nkoranyambaga ko agiye kujya mu bitaramo muri Afurika y’Iburasirazuba, ashimangira ko ari imwe mu nama zikomeye yagize mu buzima bwe bwa muzika.

Hazanaririmbamo kandi Umunya-Uganda Elijah Kitaka ndetse n’Umunyarwanda Element Eleéeh, bigaragaza ko iri serukiramuco rifite intego yo guhuza impano zo mu karere no ku rwego mpuzamahanga.

Mu myaka ishize, BK Arena yakiriye abahanzi bakomeye bo ku rwego mpuzamahanga, ariko ukuza kwa Vybz Kartel bizaba ari indi ntambwe ikomeye mu gukomeza gushyira u Rwanda ku ikarita y’ibitaramo bikomeye muri Afurika.

Ku bakunzi b’injyana ya Dancehall, Gicurasi 2026 izaba ari ukwezi kw’amateka. Umwami wa Dancehall azaba ageze i Kigali, azanye imbaraga, inkuru, ndetse n’amateka amaze imyaka irenga 20 yubaka.

Talanta Afrika Festival izaba itangiye urugendo rwayo, ariko ku Rwanda, izaba inafunguye urundi rwego rwo kwiyereka Isi nk’ihuriro ry’imyidagaduro n’umuco muri Afurika y’Iburasirazuba.

Mu myaka irenga 20 amaze mu muziki, Vybz Kartel yabaye umwe mu bahanzi ba Dancehall bagize uruhare rukomeye mu kuyigeza ku rwego mpuzamahanga.

Nubwo izina rye ryagiye rijyana n’impaka zitandukanye, ibihangano bye byakomeje kwambuka imipaka, bigera ku masoko akomeye arimo Amerika, u Burayi na Afurika.

Afite indirimbo zamubereye itike yo kwinjira ku isoko mpuzamahanga nka “Clarks” yo muri 2010. Iyi ndirimbo yakoranye na Popcaan yabaye nk’impinduramatwara mu muco no mu myambarire, cyane cyane inkweto za Clarks zahise zongera kwamamara ku Isi.

 “Clarks” ntiyabaye indirimbo yakunzwe gusa muri Jamaica gusa, ahubwo yaninjiye ku masoko yo mu Bwongereza no muri Amerika, ihindura Vybz Kartel isura izwi cyane muri Dancehall.

Mu 2011 yasohoye “Summertime”. Ni imwe mu ndirimbo zafashije Dancehall kwinjira mu birori no mu bihe by’impeshyi ku rwego mpuzamahanga. Yacuranzwe cyane mu makipe (clubs) no kuri Radiyo mpuzamahanga, bituma izina rya Kartel rirushaho kumenyekana mu rubyiruko rwo hirya no hino ku Isi.

Mbere y’aho muri 2009 yari yasohoye “Romping Shop” yakoranye na Spice. Iyi ndirimbo yateje impaka kubera amagambo yayo, ariko ni imwe mu zamuhesheje kumenyekana cyane. Yageze ku rutonde rwa Billboard R&B/Hip-Hop Charts, ibintu bidakunze kubaho ku ndirimbo za Dancehall z’icyo gihe.

Muri 2016 yasohoye “Fever”. Mu gihe yari afunzwe, “Fever” yabaye ikimenyetso cy’uko Vybz Kartel agifite imbaraga mu muziki. Yakwirakwiye ku mbuga nkoranyambaga no kuri YouTube, igera kuri miliyoni nyinshi z’abayirebye, yerekana ko izina rye ritigeze risibangana ku ruhando mpuzamahanga.

Muri uriya mwaka kandi yasohoye “Turn & Wine”. Iyi ndirimbo yakunzwe cyane mu birori no mu maserukiramuco atandukanye ku Isi, cyane cyane muri Caribbean no muri Afurika. Yakomeje gushimangira Vybz Kartel nk’umwe mu bayoboye Dancehall y’igihe gishya.

Mu 2018 yasohoye “Come Home” yakoranye na Tory Lanez. Gukorana n’umuraperi wo muri Canada Tory Lanez byafunguye amarembo mashya ku isoko rya Amerika y’Amajyaruguru.

Iyi ndirimbo yakiriwe neza ku mbuga zicururizwaho umuziki nka Spotify na Apple Music, yongera kwerekana ko Kartel ashobora guhuza Dancehall n’izindi njyana zigezweho.

Nubwo ubuzima bwe bwagiye burangwa n’ibigeragezo byinshi birimo n’igifungo, Vybz Kartel yakomeje kuba izina rikomeye mu muziki wa Dancehall.

Indirimbo ze zakomeje gucurangwa, gusubirwamo (remixes), ndetse zigira uruhare mu kuzamura abahanzi bashya barimo Popcaan n’abandi.

Ku rwego mpuzamahanga, Vybz Kartel afatwa nk’umwe mu bantu bahinduye isura ya Dancehall mu kinyejana cya 21, ayivana ku kirwa cya Jamaica ayigeza ku masoko akomeye y’Isi.

Indirimbo ze zanabaye nk’ikiraro cyahuje Caribbean n’Isi yose, ibintu byatumye izina rye rihinduka ikirango cya Dancehall ku rwego mpuzamahanga.

Vybz Kartel yatangaje uruhererekane rw’ibitaramo birimo n’icyo azakorera mu Rwanda

Indirimbo zirimo “Clarks” na “Fever” ni zo zahinduye Vybz Kartel izina rikomeye rya Dancehall ku rwego mpuzamahanga

Nubwo yafunzwe, indirimbo za Vybz Kartel zakomeje kwamamara ku Isi, zimugira umwe mu bayoboye Dancehall y’iki gihe

Guhera mu 2009, Vybz Kartel yagiye yubaka ubwamamare mpuzamahanga abikesha indirimbo zakunzwe muri Amerika, u Burayi na Afurika

KANDA HANO UBASHE KUREBA INDIRIMBO ZINYURANYE ZA VYBZ KARTEL