Vingegaard w'imyaka 29, asanzwe afite ibikombe bibiri bya Tour de France ndetse n'icya Vuelta a España yatwaye umwaka ushize.
Uyu mukinnyi wa Team Visma-Lease a Bike ubu arusha uwa kabiri, Umunya-Austria Felix Gall, iminota 5 n'amasegonda 22 ku rutonde rusange (General Classification), ibintu bituma asabwa gusa kugera ku musozo w'agace ka nyuma kazabera i Roma kugira ngo yegukane Giro d'Italia 2026.
Felix Gall we yasoje agace ari uwa kabiri nyuma yo kunanirwa gukurikirana umuvuduko wa Vingegaard mu bilometero 11 bya nyuma, mu gihe Umunya-Australia Jai Hindley yarangije ku mwanya wa gatatu.
Nyuma y'intsinzi ye, Vingegaard yavuze ko ikipe ye yari yateguye gukina byose kuri aka gace kuko ari ho hagombaga gufatirwa umwanzuro wa nyuma ku wegukana irushanwa.
Yagize ati: "Uyu munsi ni wo wagombaga gutanga umwanzuro wa nyuma, ni yo mpamvu twahisemo gukoresha imbaraga zose kugira ngo dutware agace. Kuba ngeze ku ntsinzi eshanu muri Giro kandi nkaba ngiye mu gace ka nyuma mfite ikinyuranyo kinini ni ibintu bidasanzwe kuri njye."
Mbere y'uko irushanwa rigera mu bice bikomeye by'imisozi, itsinda ry'abakinnyi batanu bayobowe na Jonas Geens ryari ryacitse peloton, nyuma baza kongerwamo abandi bakinnyi babiri. Gusa uko urugendo rwakomerezaga ku misozi miremire ya Piancavallo, icyo kinyuranyo cyagiye kigabanuka.
Mu gihe hasigaye kilometero zirenga 100 ngo isiganwa rirangire, Fredrik Dversnes wari wegukanye agace ka 15 yakoze impanuka ari kumwe na Tobias Bayer hafi y'umuyoboro w'amazi. Nubwo bombi bakomeje isiganwa.
Umutaliyani Giulio Ciccone na we yagize umunsi mwiza kuko yakomeje kwegeranya amanota yo mu misozi, ibintu byamuhesheje kwemeza ko azegukana umwambaro w'ubururu (King of the Mountains) nk'uwazamumutse neza muri Giro d'Italia ku nshuro ya kabiri.
Agace ka nyuma ka Giro d'Italia 2026 kazakinirwa mu mujyi wa Roma kuri iki Cyumweru, aho benshi bateganya ko kazaba nk'urugendo rwo kwizihiza intsinzi kuri Jonas Vingegaard, kuko nta gihinduka gikomeye gitegerejwe ku rutonde rusange rw'abakinnyi.
Source: the guardian
