Victor Lustig yavukiye mu cyahoze ari Austria-Hungary. Yari umuntu ufite ubwenge budasanzwe, uzwi cyane mu kuvuga neza no kwemeza abantu ibyo yashakaga. Yavugaga indimi nyinshi kandi yari azi kwiyegereza abakire n’abacuruzi, akabizeza amahirwe adasanzwe yo kunguka.
Mu mwaka wa 1925, Lustig yasomye inkuru mu kinyamakuru yavugaga ko Eiffel Tower yari ishaje kandi ko kuyisana byasabaga amafaranga menshi cyane. Ako kanya yahise abona uburyo bwo gukora uburiganya bwamugize ikirangirire.
Yiyise umukozi mukuru wa Leta y’u Bufaransa ushinzwe umutungo wa Leta, maze yohereza ubutumire ku bacuruzi bakomeye bacuruzaga ibyuma bishaje (scrap metal dealers), ababwira ko Leta y’u Bufaransa iri guteganya gusenya Eiffel Tower no kuyigurisha nk’ibyuma bishaje.
Kubera ko icyo gikorwa cyagombaga kuguma ari ibanga, yabatumiriye inama yabereye muri imwe mu mahoteli akomeye i Paris. Abacuruzi benshi baramwizeye, kuko yari yateguye ibyangombwa bisa n’ibya Leta kandi akitwara nk’umuyobozi ukomeye.
Mu bitabiriye iyo nama harimo umucuruzi witwaga André Poisson. Uyu mugabo yifuzaga kwigaragaza nk’umwe mu bacuruzi bakomeye b’i Paris, bityo ahita yemera ayo masezerano.
Lustig yamubwiye ko kugira ngo ahabwe iryo soko, yagombaga gutanga ruswa y’ibanga, nk’uko bamwe mu bayobozi ba Leta babigenza. Poisson yarabyemeye, amuha amafaranga menshi nk’iyo ruswa, anishyura n’ayo kugura Eiffel Tower.
Akimara kwakira ayo mafaranga, Victor Lustig yahise atorokera muri Austria. Igitangaje ni uko André Poisson yagize isoni zo kwemera ko yashutswe, bityo ntiyahita abimenyesha polisi.
Ibyo byahaye Lustig icyizere cyo gusubira i Paris nyuma y’amezi make. Yongeye gukoresha ya mayeri nyine, ashaka undi mucuruzi kugira ngo yongere "agurishe" Eiffel Tower ku nshuro ya kabiri.
Icyakora, uwo mucuruzi wa kabiri yahise akeka ko harimo uburiganya, ahita abimenyesha polisi. Lustig na we yahise ahunga igihugu mbere y’uko afatwa.
Nubwo yamenyekanye cyane kubera kugurisha Eiffel Tower inshuro ebyiri, si bwo buriganya bwonyine yakoze. Mu myaka yakurikiyeho yakomeje gukora ubundi buriganya butandukanye muri Leta Zunze Ubumwe za Amerika no mu Burayi.
Amaherezo yafashwe n’inzego z’umutekano muri Leta Zunze Ubumwe za Amerika, ashinjwa uburiganya butandukanye ndetse no gucura amafaranga y’amiganano. Yakatiwe igifungo maze ajyanwa muri gereza ya Alcatraz, imwe mu zari zifite umutekano ukomeye kurusha izindi ku Isi muri icyo gihe.
Victor Lustig yapfiriye muri gereza mu mwaka wa 1947, ariko amateka ye akomeje kuvugwa kugeza n’ubu nk’urugero rw’umwe mu babeshyi n’abanyaburiganya badasanzwe babayeho.
Victor Lustig akunze kwitwa "umugabo wagurishije Eiffel Tower inshuro ebyiri." Nubwo bisa n’inkuru yo muri filime, ni amateka y’ukuri yemejwe n’abashakashatsi b’amateka ndetse n’ibitabo byinshi byanditswe ku buzima bwe.
Victor Lustig yagurishije mu buriganya Eiffel Tower inshuro ebyiri ku bantu batandukanye