Iyi baruwa yaturutse mu rwego rushinzwe kurinda inyigisho za Kiliziya Gatolika, ruzwi nka Dicastery for the Doctrine of the Faith (DDF), isinyweho na Karidinali Víctor Manuel Fernández, uyobora uru rwego. Yari igenewe Musenyeri Stephan Ackermann wa Diyosezi ya Trier, ndetse n’abandi bepiskopi bose bo mu Budage.
Muri iyi baruwa, Vatikani yasobanuye ko guha umugisha wa Liturujiya ababana mu buryo budahuye n’inyigisho zayo, harimo n’ababana bahuje ibitsina, bishobora gutuma bigaragara nk’aho Kiliziya yemera ikanashyigikira iyo mibanire.
Yagaragaje ko Kiliziya “idafite ububasha bwo gutanga umugisha wa Liturujiya mu bikorwa biha agaciro cyangwa byemeza imibanire idahuye n’ibyo yigisha,” cyane cyane ifatwa nk’isimbura cyangwa igahindura imiterere yemewe y'isakaramentu ry’ugushyingirwa.
Mu mwaka wa 2023, uru rwego (DDF) rwari rwasohoye inyandiko yiswe Fiducia Supplicans, yemeraga ko abihaye Imana bashobora gusengera no guha umugisha abantu bari mu bihe bidasanzwe, harimo n’abaryamana bahuje ibitsina.
Ariko iyo nyandiko yashimangiraga ko: uwo umugisha ugomba kuba ari umugisha usanzwe, udafite imihango yihariye, udakwiye na gato kumera nk’umuhango wo gushyingirwa, kandi udakwiye gutuma bigaragara nk'aho Kiliziya yemera iyo mibanire.
Abepiskopi bo mu Budage bo bashatse kujya kure y’ibyo, bashyiraho inyandiko bise vademecum, igamije kwemerera abapadiri gutanga umugisha ufite uburyo n’imihango byihariye ku “bantu bakundana,” harimo n’abahuje ibitsina. Ibi ni byo Vatikani yamaganiye kure, ivuga ko binyuranyije n’ibyari byemejwe muri Fiducia Supplicans.
Vatikani yavuze ko iyo nyandiko y’Abadage yavugaga ibintu bishobora kwitiranywa n’umuhango wo gushyingirwa, harimo: kuvuga “ubumwe” bw’abo bantu, kubasezeranya no kubaha umugisha wa Liturujiya, no gukoresha amagambo n’ibimenyetso bisa n’ibikoreshwa mu gushyingirwa.
Ibi byose, nk’uko byasobanuwe na DDF, byatuma bigaragara nk’aho Kiliziya yemera iyo mibanire, kandi atari ko biri mu nyigisho zayo.
Nubwo iyi baruwa yanditswe muri 2024, yatangiye gukwirakwira ku mbuga nkoranyambaga mu minsi ishize, bamwe bayifata nk’aho ari icyemezo gishya. Ni yo mpamvu Vatikani yafashe icyemezo cyo kuyishyira ku mugaragaro kugira ngo ikureho urujijo.
Karidinali Fernández yavuze ko abantu benshi bibazaga aho igisubizo Vatikani yahaye Abadage kiri, bityo bakaba bahisemo kukigaragaza ku mugaragaro.
Mu gusubiza abanyamakuru ubwo yavaga mu ruzinduko rw’iminsi 11 muri Afurika ku wa 23 Mata 2026, Papa Leo XIV yavuze ko Vatikani itemera guha umugisha wihariye abaryamana bahuje ibitsina. Ati: “Ntabwo twemera umigisha utangwa mu buryo bwihariye ku baryamana huje ibitsina.”
Yanashimangiye ko Kiliziya igomba kwakira buri muntu wese, agira ati: “Abantu bose baratumiwe gukurikira Yezu, tutti, tutti, tutti (bose, bose, bose).”
Yanagaragaje ko kwibanda cyane ku bibazo bijyanye n’imibonano mpuzabitsina bishobora gutuma habaho amacakubiri muri Kiliziya, ashimangira ko hari ibindi bibazo bikomeye kurushaho, birimo: ubutabera, uburinganire, inzara, intambara, ubwisanzure bw’idini.
Iki cyemezo kigaragaza ubushyamirane bumaze igihe hagati ya Vatikani n’abepiskopi bo mu Budage, bashaka impinduka mu miyoborere n’inyigisho za Kiliziya, cyane cyane ku bijyanye n’imibanire n’uburenganzira bw’abantu.
Vatikani yo ikomeje gushimangira ko ubumwe bwa Kiliziya bugomba kuguma bushingiye ku nyigisho zayo zidahinduka.
Iyi baruwa ishimangira ko nubwo Kiliziya yemera gusengera no kwakira buri muntu wese, idashobora kwemera cyangwa gushyiraho imihango yemeza ikanashyigikira imibanire idahuye n’inyigisho zayo.