Iyi nkuru yongeye kwerekana uburyo AI igenda ihindura uburyo ubushakashatsi bukorwa ku rwego mpuzamahanga, ikaba ishobora gufasha no mu gukemura ibibazo byari byarananiye abahanga imyaka myinshi.
Parisi afatanyije n’itsinda rye ry’abashakashatsi, bifashishije Claude, AI yakozwe na sosiyete Anthropic, kugira ngo bakemure ikibazo cy’imibare cyari cyarabaye ingorabahizi mu rwego rwa fiziki kuva mu 2014.
Iki kibazo cyari gifitanye isano n’icyo abahanga bita "jamming", uburyo uduce duto tw’ibintu (particles) dushobora kuva mu kugenda mu bwisanzure tugahinduka ikintu gikomeye (rigid) nubwo tudafite imiterere ihamye cyangwa gahunda izwi.
Ubushakashatsi bwatangiriye mu 2014, ubwo Parisi, Francesco Zamponi n’abandi bashakashatsi bavumburaga ko hari imibare ibiri isobanura uburyo particles zipakirwa (pack together) ihora ifitanye isano. Nubwo bari bamaze kubyemeza inshuro nyinshi bakoresheje imibare, ntibabashaga gusobanura impamvu iyo sano yabagaho.
Icyo kibazo cyakomeje kuba amayobera imyaka irenga icumi.
Nyuma y’iterambere rikomeye rya AI mu myaka yashize, Parisi n’itsinda rye bahisemo kugerageza Claude kuri icyo kibazo. Babanje kuyisaba kongera gukora imibare yari yakoreshejwe mu bushakashatsi bwabo bwo mu 2014.
Nyuma y’ibiganiro (prompts) bigera kuri 40, Claude yatanze igitekerezo cy’ingenzi cyabafashije kubaka gihamya (proof) y’iyo mibare.
Abashakashatsi ntibahise bafata ibisubizo bya Claude nk’ukuri kudashidikanywaho. Babigenzuye, babitunganya, babikosora aho byari ngombwa, maze amaherezo basohora ubushakashatsi bwabo mu kinyamakuru Journal of Statistical Mechanics: Theory and Experiment ku wa 1 Nyakanga 2026.
Francesco Zamponi yavuze ko Claude itigeze isimbura uruhare rw’abashakashatsi, ahubwo yabahaye uburyo bushya bwo kureba ikibazo.
Yagize ati: "Birashoboka ko umuhanga mu mibare umaze igihe kinini akora kuri ibi bibazo yashoboraga kubona iki gisubizo. Ariko Claude yadufashije kugera vuba ku bumenyi bwinshi bwo mu mibare butari mu rwego twari tumenyereye."
Yongeyeho ko ubu abona AI nk’igikoresho gishobora kwihutisha ubushakashatsi, gufasha mu mibare no gutanga ibitekerezo bishya ku bibazo bikomeye.
Nubwo bimeze bityo, abashakashatsi bashimangiye ko Claude itigeze ikora ubushakashatsi yonyine. Bavuze ko ari bo bagenzuye ibisubizo byose, babikosora kandi babihindura ubushakashatsi bwemewe n’amahame ya siyansi.
Ibi bibaye imwe mu ngero zikomeye zigaragaza ko AI itakiri igikoresho cyo kwandika cyangwa gukora amashusho gusa, ahubwo ishobora no kugira uruhare mu gukemura ibibazo bikomeye bya siyansi byari bimaze imyaka myinshi bidafite ibisobanuro.
Abahanga bemeza ko mu gihe kiri imbere, AI ishobora kuzagira uruhare rukomeye mu bushakashatsi bwo mu buvuzi, ubumenyi bw’ikirere, imibare n’izindi nzego zisaba isesengura n’ibaruramibare bihanitse.
Gukoresha Claude mu gukemura ikibazo cya siyansi cyari kimaze imyaka irenga 10 kidafite igisubizo ni indi ntambwe ikomeye igaragaza ko ubwenge bw’ubukorano bushobora kuba umufatanyabikorwa w’abashakashatsi.
Nubwo budashobora gusimbura ubumenyi n’ubunararibonye bw’umuntu, bushobora kwihutisha ubushakashatsi no gufungura amarembo mashya mu rwego rw’ubumenyi.
Source: VNExpress International – "Nobel Prize-winning physicist uses Claude AI to solve decade-old physics math puzzle" (21 Nyakanga 2026).