Uwanziga agiye kumurika igitabo gihuza ‘Stoicism’ n’indangagaciro z’u Rwanda mu rugendo rwo kubaka Afurika

Iki gitabo kizashyirwa ahagaragara ku wa Gatandatu tariki ya 29 Kanama 2026, mu muhango uzabera kuri Kigali Marriott Hotel guhera saa kumi z’umugoroba.

Rising with Dignity ni igitabo cyibanda ku bitekerezo bya filozofiya ya Stoicism, ariko Uwanziga akabihuza n’umuco, amateka n’indangagaciro by’u Rwanda ndetse n’ubwenge gakondo bw’Afurika.

Stoicism ni inyigisho za filozofiya zishimangira cyane kwimenya, kwifata, kwihangana mu bihe bikomeye, kugira ubutwari, gukorera ku byo umuntu ashobora guhindura no kwakira ibitagengwa n’ubushobozi bwe.

Muri iki gitabo, Uwanziga yerekana ko izi nyigisho atari iz’abantu bo mu bindi bice by’Isi gusa, ahubwo ko zishobora gusobanuka neza iyo zishyizwe mu murongo w’ubuzima n’umuco nyafurika.

Yifashisha inyigisho z’abahanga nka Marcus Aurelius, Epictetus na Seneca, ariko akazihuza n’indangagaciro zigaragara mu mibereho y’Abanyarwanda n’Abanyafurika, zirimo kubahana, ubumwe, ubudaheranwa n’ibibazo, ubwiyunge, ubuyobozi buboneye ndetse n’agaciro ko kubaho ugamije ikintu gifite umumaro.

Igitabo gishingiye ku rugendo rwo kuzamuka udasize indangagaciro

Mu gusobanura igitabo cye, Uwanziga Joy avuga ko Rising with Dignity atari igitabo cya filozofiya gusa, ahubwo ari igitabo kigamije guha umusomyi ibikoresho yamufasha mu buzima bwa buri munsi.

Ni igitabo kivuga ku buryo umuntu yakubaka ubudahangarwa bwo mu mutima, agatsinda ibihe bitoroshye, akagira ubushobozi bwo kwiyobora, kubaka umubano mwiza n’abandi no gufata imyanzuro ishingiye ku ndangagaciro.

Uwanziga yinjizamo inkuru, imigani n’imigani migufi y’Abanyarwanda, amateka, ingero z’ubuzima busanzwe ndetse n’imyitozo ifasha umusomyi gutekereza ku buzima bwe no ku buryo ashobora kugira uruhare mu mpinduka nziza mu muryango, ku kazi no muri sosiyete.

Ni muri urwo rwego igitabo gishaka gusubiza ikibazo cy’ingenzi cy’uko ubwenge bw’abantu ba kera bushobora gukomeza kugira umumaro mu isi ya none, aho abantu bahura n’ihindagurika ryihuse, imihangayiko, ibibazo by’imibanire n’izindi mbogamizi zitandukanye.

Uko u Rwanda rufite umwanya wihariye muri iki gitabo

Kimwe mu bintu bitandukanya ‘Rising with Dignity’ n’ibitabo byinshi bivuga kuri ‘Stoicism’ ni uko Uwanziga atarebera izi nyigisho mu ndorerwamo y’ibihugu by’i Burayi cyangwa izindi filozofiya zonyine. Ahubwo azishyira mu muco w’u Rwanda no mu bwenge bw’Afurika.

Agaragaza ko indangagaciro nk’ubwubahane, kwihangana, gufashanya, kubana n’abandi, kwiyubaha, kwiyunga nyuma y’amakimbirane no kugira uruhare mu kubaka umuryango ari ibintu bifite umwanya ukomeye mu buzima bw’Abanyarwanda kandi bishobora kugirana isano n’inyigisho za ‘Stoicism’.

Ibi bituma igitabo kiba n’uburyo bwo gusangiza isi imwe mu ndangagaciro n’ubwenge bwakomotse muri Afurika, aho kubifata nk’ibintu by’umuco gusa, ahubwo bikagaragazwa nk’isoko y’ubwenge bushobora gukoreshwa no mu gukemura ibibazo by’iki gihe.

Abagenewe iki gitabo ni bande?

Mu kiganiro ‘Inzu y’Ibitabo’ na Dashim, Uwanziga Joy yavuze ko hari abantu benshi bashobora kungukira muri iki gitabo bitewe n’insanganyamatsiko gikubiyemo.

Mu Rwanda no mu mahanga, kigenewe cyane cyane urubyiruko n’abanyeshuri bashaka kwiyubaka no kugira indangagaciro zibafasha kuba intangarugero.

Ababyeyi, abarimu n’abayobozi mu miryango na bo bashobora kugikoresha nk’isoko y’ibitekerezo byabafasha mu kwimakaza indangagaciro nziza mu bana no mu rubyiruko.

Ni igitabo kandi kigenewe abantu banyuze mu bihe bikomeye by’ubuzima ariko bagahitamo kudaheranwa na byo, ahubwo bagashaka uburyo bwo kongera kwiyubaka no gukomeza imbere.

Amashuri, za kaminuza na byo bishobora kukibyaza umusaruro mu bijyanye no kwigisha ubuyobozi, indangagaciro, umuco n’imibanire.

Ku Banyafurika n’abakunda umuco wa Afurika, Uwanziga avuga ko igitabo gishobora kuba umuyoboro wo gusobanukirwa uburyo ubwenge gakondo bw’Afurika bushobora kugira uruhare mu gukemura ibibazo bya none.

Abakunda ‘Stoicism’ na bo bashobora kubwibona muri iki gitabo uburyo izi nyigisho zishobora gusobanurwa mu buryo bujyanye n’imibereho n’indangagaciro by’Afurika.

Hari kandi abadipolomate, abakozi b’imiryango itegamiye kuri Leta, abashakashatsi n’abigisha bakora mu bijyanye n’umuco, amateka ya Afurika, ubuyobozi, abimukira no gukemura amakimbirane.

Ku Uwanziga, igitabo ni n’uburyo bwo gusangiza isi ubwenge bw’Afurika

Usibye kuba igitabo kigamije gufasha umuntu ku giti cye, ‘Rising with Dignity’ gifite n’ubutumwa bwagutse bwo gushishikariza Abanyafurika kwiyakira no kwiyubakira ku ndangagaciro zabo.

Uwanziga agaragaza ko ubwenge butagira imbibi, kandi ko inyigisho zagiye zifasha abantu mu bihe bitandukanye by’amateka zishobora kongera gusobanurwa mu buryo bujyanye n’umuco w’ahantu runaka.

Ni yo mpamvu yifuza ko igitabo cye cyafasha umusomyi kugira ubutwari bwo guhangana n’ibibazo, ariko kandi akabikora atatakaje indangagaciro ze.

Mu murongo w’ubutumwa bukomeye bw’iki gitabo, Uwanziga ashyira imbere amagambo agira ati: “Rise with Wisdom, Lead with Character, Live with Dignity”, ashimangira gukura ufite ubwenge, kuyobora ufite imico myiza no kubaho wubaha agaciro kawe.

Uwanziga Joy n’urugendo rwe mu kwandika no muri dipolomasi

Rising with Dignity si cyo gitabo cya mbere Uwanziga Joy yanditse.

Yaherukaga gusohora “Manners in Rwanda”, igitabo cyibanda ku myitwarire n’imico iboneye mu Rwanda, kikaba cyarashimwe n’abantu batandukanye barimo Romeo Dallaire wahoze ayobora ingabo z’Umuryango w’Abibumbye zari mu Rwanda mu gihe cya Jenoside yakorewe Abatutsi mu 1994.

Igitabo cye cya mbere cyanashimiwe n’abandi bantu bakomeye barimo Louise Mushikiwabo, Umunyamabanga Mukuru w’Umuryango w’Ibihugu bikoresha Ururimi rw’Igifaransa (OIF).

Ibitabo bya Uwanziga byagiye biboneka ku mbuga zitandukanye nka Amazon zigurishirizwaho ibitabo, bikabona abasomyi mu bice bitandukanye.

Mu rugendo rwe rw’amashuri, Uwanziga yize muri Kaminuza y’u Rwanda ishami rya Huye, mbere yo kujya mu Burayi aho yakomereje amasomo ya Master’s mu bijyanye na International Protocol and Diplomacy i Brussels.

Yamaze imyaka irenga 15 akorera mu Buholandi, aho yakoze imirimo itandukanye irimo gukorera mu butumwa bwa dipolomasi nk’umwanditsi wa Ambasade.

Yanagize uruhare mu burezi, aho yigishije muri The Hague University mu Buholandi ndetse na UCC i Cork muri Ireland.

Igitabo kizashyirwa ahagaragara ku wa 29 Kanama

Uwanziga Joy ateganya kumurika ku mugaragaro Rising with Dignity: The African Stoic, The Rwandan Way ku wa Gatandatu tariki ya 29 Kanama 2026.

Uyu muhango uzabera kuri Kigali Marriott Hotel guhera saa kumi z’umugoroba.

Kuri Uwanziga, iki gitabo si igikorwa cyo kongera ku rutonde rw’ibitabo byanditswe n’Abanyarwanda gusa, ahubwo ni ubutumwa bwo kwibutsa abantu ko umuntu ashobora gukura mu bihe bikomeye, akiyubaka, akayobora neza kandi akabaho afite agaciro n’indangagaciro.

Ni igitabo kandi gishyira hamwe filozofiya ya kera n’ubuzima bwa Afurika ya none, mu rwego rwo gutanga igitekerezo cy’uko u Rwanda n’Afurika bishobora kwiyubakira ahazaza hakomeye, bishingiye ku bwenge, ubudahangarwa bwo mu mutima, imico myiza no kubaha agaciro ka muntu.

Muri make, Rising with Dignity ni ubutumire bwo gukura ufite ubwenge, kuyobora ufite imico myiza no kubaho wubaha agaciro kawe.

Uwanziga Joy yahuye na Minisitiri w’Ububanyi n’Amahanga n’Ubutwererane, Amb. Olivier Nduhungirehe amusangiza igitabo “Rising with Dignity” agiye kumurika

Umuyobozi w'Urwego Ngishwanama rw'Inararibonye z'u Rwanda, Tito Rutaremera, ari kumwe na Tito Rutaremera yamurikiye igitabo ““Rising with Dignity”

Uwanziga Joy avuga iki gitabo yanditse yagishyize ku masomo atandukanye mu Rwanda, ndetse kizamurikwa ku mugaragaro ku wa 29 Kanama 2026

Igitabo cye cya mbere “Manners in Rwanda” cyishimiwe na benshi, barimo uwahoze ari Minister of Foreign Affairs w’u Buholandi, Jan Pronk

Igitabo cya Mbere cya Uwanziga Joy cyaje ku mwanya wa gatatu mu gukundwa ku rubuga rwa Amazon

Uwanziga yabaye umwari muri Kaminuza ya ‘The Hague University’ yo mu Buholandi na UCC muri Cork yo muri Ireland

Romeo Dalaire wahoze ahagarariye ingabo za l’UN mu gihe cya Jenoside yakorewe Abatutsi mu 1994, nawe waje kwandika, ibitabo by’aba bombi bikaba byaramaze igihe bikurikirana mu gukundwa ku mbuga zitandukanye zigurishirizwaho ibitabo

Igitabo cya mbere cya Uwanziga Joy cyanashimiwe n’abandi bantu bakomeye barimo Louise Mushikiwabo, Umunyamabanga Mukuru w’Umuryango w’Ibihugu bikoresha Ururimi rw’Igifaransa (OIF)

Uwanziga agiye gushyira ku isoko igitabo cye cya Gatatu yanditse