Uwamahirwe Josée wamamaye mu ndirimbo ‘Siboyintore’ na ‘Urunyenyeri’ yagarutse mu Rwanda

Uyu muhanzikazi yageze ku Kibuga cy’Indege Mpuzamahanga cya Kigali i Kanombe mu ijoro ryo kuri uyu wa Gatanu tariki 13 Gashyantare 2026, yakirwa n’inshuti n’abavandimwe. Akigera i Kigali, yatangaje ibyishimo byo kongera gukandagira ku butaka bw’u Rwanda.

Yagize ati: “Ndishimye cyane, ndanezerewe rwose kuba ngeze hano.”

Abajijwe icyo yari akumbuye kurusha ibindi, yasubije agira ati: “Nari nkumbuye igitoki, no gusangira n’abantu.”

Uwamahirwe yavuze ko azamara iminsi 12 mu Rwanda mbere y’uko asubira mu Budage, aho azahuriza hamwe ibikorwa bya muzika n’ibindi bijyanye n’imibereho ye bwite.

Mu bimuzanye kandi harimo no gutaha ubukwe bw’inshuti ye Kayitesi Judence, buzaba ku wa 19 Gashyantare 2026. Yavuze ko ari iby’agaciro kuri we kuba ashobora kwifatanya n’inshuti ze mu bihe by’ibyishimo nk’ibi.

Mu gihe azaba ari mu Rwanda, Uwamahirwe Josée ateganya gukomeza ibikorwa bya muzika birimo no gukora indirimbo nshya muri studio zizashyirwa kuri Album yise ‘Siboyintore’.

Yagize ati: “Nzakora indirimbo muri studio kuri Album ‘Siboyintore’, ariko kandi nzanakora amashusho y’indirimbo ‘Urunyenyeri’.”

Iyi Album ‘Siboyintore’ yitezweho kongera guhuza uyu muhanzikazi n’abakunzi be, cyane ko indirimbo yayitiriye iri mu zamugize ikimenyabose mu muziki wa gakondo.

Uwamahirwe Josée kandi yagaragaje ko afite indirimbo nshya zirimo ubutumwa bwimbitse, zirimo izigaruka kuri gahunda ya Ndi Umunyarwanda, zishingiye ku bumwe n’ubwiyunge, urukundo, ubukwe n’izindi nsanganyamatsiko zubaka sosiyete.

Kugaruka kwe mu Rwanda, by’umwihariko mu gihe ateganya ibikorwa bishya bya muzika, bishobora kuba intangiriro y’indi ntambwe nshya mu rugendo rwe rwa muzika rwatumye amazina ye arushaho kumenyekana mu Rwanda no hanze yarwo.

🔴🚨 AMAKURU AGEZWEHO NONAHA 🔥🇷🇼
Nishimye cyane 🤍
Uwamahirwe Josée, wamenyekanye mu ndirimbo zakunzwe cyane nka SIBOYINTORE na Urunyenyeri, yamaze kugera mu Rwanda ✈️ avuye mu Budage 🇩🇪 aho asanzwe atuye.
Yaje mu bikorwa bikomeye bya muzika 🎶 birimo no gukora amashusho mashya… pic.twitter.com/nVWTXusEBU

— 𝐉𝐔𝐒𝐓𝐈𝐍𝐖'𝐈𝐊𝐈𝐍𝐆𝐎𝐆𝐎𝐎𝐟𝐟𝐢𝐜𝐢𝐚𝐥 (@JustinNsengima) February 13, 2026

Uwamahirwe Josée yagarutse mu Rwanda avuye mu Budage, agiye gukora amashusho ya ‘Urunyenyeri’ no gutangira Album ‘Siboyintore’ mu minsi 12 azamara i Kigali

KANDA HANO UBASHE KUMVA INDIRIMBO 'SIBOYINTORE' YA UWAMAHIRWE JOSEE