Uyu mwanzuro wafashwe ku gicamunsi cyo kuri uyu wa Gatatu tariki ya 16 Nzeri 2026 aho umucamanza yasobanuye ko hari impamvu zikomeye zituma Taikun Ndahiro akurikiranwaho iki Cyaha afunze iminsi 30 y’agateganyo.
Ni nyuma y'uko ku wa 10 Nzeri 2026, ari bwo Taikun yatakambiye Urukiko arusaba kurekurwa akajyanwa muri ‘Rehab’ (akajya gukamurwamo ibiyobyabwenge) aho gufungwa iminsi 30 y’agateganyo nk’uko Ubushinjacyaha bwabimusabiye.
Ubushinjacyaha bwagaragarije Urukiko ko bumushinja icyaha cyo kwigomeka ku nzego zishinzwe umutekano n’icyo gukoresha ibiyobyabwenge aho ku wa 26 Kanama 2026 uyu musore yarezwe n’Umudaso witwa Jean Pierre n’umupolisi witwa Gasasira, bavuga ko bagiye iwe bahamagawe na Kubwayo Lenzo (Dj Lenzo) nyuma yo kumusanga mu nzu babanagamo arimo agerageza kwitwikiramo.
Ku cyaha bwo kwigomeka ku nzego z’umutekano aregwa, ubushinjacyaha bwakomeje buvuga ko Taikun Ndahiro aho gukorana n’inzego z’umutekano ahubwo yakubise Umudaso umugeri ndetse agerageza no gufungurira imbwa ye kugira ngo ibarye ariko ntibyakunda.
Gukoresha ibiyobyabwenge, Ubushinjacyaha bwagaragaje ko uyu munyamakuru yasanzwemo igipimo cy’urumogi cya 280, ari na ho bwashingiye bumusabira gufungwa iminsi 30 y’agateganyo mu gihe bugikomeje iperereza ku byaha akurikiranyweho.
Taikun yemeye ko yakoreshaga urumogi kuva muri Gicurasi 2025 kandi yari abizi ko ari icyaha, gusa yabwiye Urukiko ko yatangiye urugendo rwo kurureka muri Mata 2026.
Gusa muri urwo rugendo rwo kurureka yavuze ko yahuye n’imbogamizi z’uko Dj Lenzo babana yarunywaga akanaruzana mu rugo bigatuma yongera kurunywa.
Ngo yigiriye inama yo gutandukana na Dj Lenzo ariko Lenzo arabyanga, ibyanatumye iki kibazo bakigeza muri RIB, bandikirana ibyo uyu mu-Dj azasohokana mu nzu ariko nabwo yanga kugenda.
Nyuma y’uko Dj Lenzo yanze kumuvira mu nzu, yasohoye ibintu bye asigamo igitanda, arangije atwika ibipapuro mu rwego rwo kumutera ubwoba kugira ngo akunde agende.
Mu gihe yari muri ibyo, ni bwo Taikun yabonye abapolisi babiri n’Umudaso umwe mu rugo iwe, bamusaba ko bamwambika amapingu. Yemeye ko habayeho gushyamirana yanga kuyambara, ibintu umunyamategeko yavuze ko yabitewe n’uko yari yambaye akenda k’imbere gusa.
Yahakanye ibyo gukubita inzego zishinzwe umutekano ko iyo abikora mu byaha akurikiranyweho hari kuba harimo icyo gukubita no gukomeretsa aho kuba kwigomeka ku nzego zishinzwe umutekano.
Aha ni ho Umwunganizi we mu mategeko we yagaragaje ko iyo aza kuba yarabakubise nk’uko babivuga, ikirego cye cyakabaye giherekezwa na raporo ya muganga.
Taikun Ndahiro ku kijyanye no kwiyahura yavuze ko atari byo ahubwo yarimo atera ubwoba Dj Lenzo kugira ngo amuvire mu rugo kuko iyo aba ari byo yashakaga yari gutwika umufariso baryamagaho aho gutwika impapuro.