Kuwa Mbere, tariki
ya 4 Kanama 2025, umucamanza Arun Subramanian yahakanye ubusabe bwo kumurekura
ku ngwate ya miliyoni 50 z’amadolari, ashimangira ko Combs w’imyaka 55
ashobora gutoroka cyangwa guteza akaga ku bandi bantu n’umutekano rusange.
Combs afungiye muri
gereza ya Brooklyn Metropolitan
Detention Center kuva muri Nzeri 2024, akaba amaze gusaba gufungurwa by'agateganyo nk'inshuro eshanu zose byanga zikagenda ziteshwa agaciro.
Mu nyandiko y’urukiko, umucamanza Subramanian yavuze ko nta bimenyetso bifatika byagaragajwe byemeza ko Combs adashobora guhunga ubutabera cyangwa guteza ibyago ku muryango rusange, ashimangira ko nta mpamvu “idasanzwe” yashingirwaho ngo arekurwe.
Yagize ati:
Yagarutse ku mpamvu
zishobora gutuma umuntu afungurwa nubwo yaba yarakatiwe, zirimo izabukuru
cyangwa uburwayi bukomeye bushobora kutitabwaho neza muri gereza, ariko avuga
ko kuri Combs ibyo byose bidahari.
Iri teka rishya ritanzwe
nyuma y’iminsi mike Virginia “Gina”
Huynh, wahoze ari umukunzi wa Combs, yandikiye urukiko amusabira imbabazi
n’uburenganzira bwo kurekurwa, avuga ko yakomeza kwita ku muryango we no ku
nshingano ze mu gihe akigenzurwa n’urukiko. Ni bwo bwa mbere Huynh yigaragaje
ku mugaragaro nk’umwe mu bagaragajwe nk’abahohotewe mu rubanza rwa Combs.
Kuwa 28 Nyakanga, abunganira
Diddy bari basabye urukiko ko arekurwa ku ngwate ya miliyoni 50 z’amadolari, mu
gihe ategereje igihano cye giteganyijwe gutangazwa ku wa 3 Ukwakira 2025. Uwo munsi ni
nawo azasorezaho umwaka wose amaze afunzwe, igihe kizabarwa nk’igice cy’igihano
cye.
Combs yahamijwe icyaha
cyo gutwara abantu agamije uburaya kuwa 2 Nyakanga, ariko ahita agirwa umwere
ku bindi byaha bikomeye birimo icuruzwa ry’abantu n’umugambi w’ubugizi bwa nabi.
Nyuma y’iyo myanzuro, abamwunganira basabye ko arekurwa ako kanya, ariko nabwo
urukiko rurabyanga.
Kugeza ubu, Diddy
ashobora guhabwa igifungo kitarenze imyaka 20, mu gihe azaba amaze imyaka
irenga umwe afunze.
