Mu myaka 140 imaze, iyi kipe iyobowe na Kroenke Sport & Entertainment yegukanye ibikombe byinshi birimo shampiyona z’u Bwongereza na FA Cup, ariko kugeza uyu munsi ntirabasha kwegukana igikombe cya UEFA Champions League, irushanwa rikomeye ku mugabane w’u Burayi.
Mu nyandiko yasohotse ku rubuga rwa UEFA.com, mu myaka ya 1990 n’iya 2000, Arsenal yabaye imwe mu makipe akomeye ku isi iyobowe na Arsène Wenger wayitoje igihe kingana n’imyaka 22. Yubatse ikipe ikomeye igizwe n’abakinnyi nka Thierry Henry, Patrick Vieira, Robert Pirès na Dennis Bergkamp.
Mu mwaka wa 2004, Arsenal yanditse amateka yo gutwara Premier League idatsinzwe umukino n’umwe mu mikino 49 yose, bituma yitwa “The Invincibles” bisobanuye abadatsindwa.
Nubwo yari ikomeye imbere mu gihugu, urugendo rwayo muri Champions League rwakomeje kugorana. Bwa mbere mu mateka yayo yageze ku mukino wa nyuma wa Champions League mu 2006, icakirana na FC Barcelona ku kibuga cya Stade de France mu Bufaransa.
Arsenal yabanje gutsinda igitego cya Sol Campbell ariko umukino uza kurangira itsinzwe ibitego 2-1, itakaza amahirwe yayo ya mbere yo kwegukana iki gikombe.
Nyuma y’uwo mukino, Arsenal yagize ibihe bigoye birimo no kwimukira ku kibuga gishya cya Emirates, ni umushinga wayitwaye amafaranga menshi cyane angana na miliyoni 390 z’Amapawundi.
Ibi byatumye imara imyaka myinshi ihagaze nabi ku isoko ry’igura n’igurishwa ry’abakinnyi, ugereranyije n’andi makipe nka Chelsea FC, Manchester City FC na Real Madrid CF.
Abakinnyi bayo b’ingenzi barimo, Cesc Fàbregas, Robin van Persie na Samir Nasri baje kugenda, bituma ikipe itakaza imbaraga yari ifite. Ibi byose byagize uruhare runini mu gusubira inyuma kw'iyi kipe haba mu gihugu ndetse no ku mugabane w'u Burayi.
Mu myaka yakurikiye uwa 2006, Arsenal yakomeje kugera muri Champions League ariko inshuro nyinshi igasezererwa muri 1/8 cy’irangiza, cyane cyane imbere y’amakipe nka FC Bayern Munich na AC Milan.
Si Shampiyona gusa kuko yageze ku mukino wa nyuma wa UEFA Cup mu mwaka wa 2000 ndetse na Europa League mu mwaka wa 2019 ariko iratsindwa.
Kuva Mikel Arteta yagera muri iyi kipe muri 2019 nk’umutoza mukuru, yongeye kwiyubaka itwara ibikombe bikomeye birimo FA Cup imwe, Community Shield ebyiri na Premier League ya 2026. Ndetse muri uyu mwaka wa 2026, yongeye kugera ku mukino wa nyuma wa Champions League ku nshuro ya kabiri mu mateka yayo nyuma y’imyaka 20 itabigeraho.
Ni umukino yahuriyemo na Paris Saint-Germain yo mu Bufaransa, aho umukino warangiye ari 1-1, haterwa penaliti maze Arsenal FC bayitsinda 4-3 igikombe gitaha i Paris mu Bufaransa, ikomeza kwandika amateka mabi muri iri rushanwa.
Arsenal FC, iri mu makipe akunzwe cyane ku isi kandi ifite amateka akomeye mu Bwongereza, ariko ikomeje kubura ku rutonde rw’amakipe yegukanye Champions League.
Nubwo ari ikipe imaze kwiyubaka neza mu bwugarizi, ikomeje guhura n’amahirwe make, gutsindwa imikino ya nyuma ndetse n’ihangana rikomeye ry’amakipe y’ibihangange mu Burayi, bitumye igikombe cya UEFA Champions League gikomeza kuba inzozi kuri bo. Gusa uko ikipe imeze ubu bitanga icyizere ko ishobora kuzongera kugerageza amahirwe yayo mu myaka iri imbere.
Arsenal FC yaraye ibuze amahirwe yo kwegukana Champions League ya mbere mu mateka yayo