Urubyiruko 60 rugiye guhurira i Paris rukoreshe filime mu guhangana n’ibibazo byugarije Isi

Iyi nama izwi nka International Youth Media Summit (IYMS), izaba ku nshuro yayo ya 21, iteganyijwe kuva tariki 17 kugeza ku ya 29 Nyakanga 2026, ifite insanganyamatsiko izibanda ku mahoro igira iti “Peace in Focus: Voices Reaching Across Borders”.

Iyi gahunda izahuza urubyiruko 60 ruturutse mu bihugu bisaga 19, ruzamara ibyumweru bibiri rukorana, rukora filime ngufi zirindwi zigaruka ku bibazo bikomeye Isi ihanganye na byo.

Muri byo harimo ubukene, ivangura, uburenganzira bw’abagore, ubuzima, ihohoterwa, ibidukikije n’iterambere ry’urubyiruko.

Izi filime zizerekanirwa bwa mbere ku ya 29 Nyakanga 2026 mu muhango wo gusoza uzabera ku cyicaro gikuru cya UNESCO i Paris, mbere yo kugezwa ku Isi hose mu mashuri, mu bitaramo bya filime no mu bikorwa by’imiryango itegamiye kuri Leta.

Iyi nama mpuzamahanga yatangiriye i Los Angeles mu 2006, ikaba imaze kwakira urubyiruko rusaga 1,700 ruturutse mu bihugu 81.

Mu myaka 20 ishize, uru rubyiruko rwakoze filime zirenga 140 zigaruka ku bibazo birindwi by’ingenzi ku Isi.

Perezida akaba n’uwashinze iyi gahunda, Evelyn Seubert, yavuze ko guhurira i Paris bifite igisobanuro gikomeye.

Yagize ati "Paris ni umujyi w’urumuri, kandi ni ahantu heza ho guhuriza hamwe amajwi y’urubyiruko rwo ku Isi. Filime ni imwe mu nzira zikomeye zo guteza imbere kumvikana no kubaka impuhwe hagati y’abantu."

Buri tsinda rizakora filime rizahabwa umujyanama uturutse muri UNESCO, uzabafasha gusobanukirwa neza ikibazo bahisemo n’ingaruka gifite mu buzima busanzwe.

Ibi bizatuma filime zabo zitaba izo kwidagadura gusa, ahubwo zibe izifite ubutumwa bufatika bushobora kugira uruhare mu guhindura Isi.

Muri iyi nama hazanabera ku nshuro ya kabiri irushanwa rya filime ryiswe Seven Issues Film Festival (SIFF), rimaze kwakira filime zirenga 2,000 z’abakiri bato baturutse hirya no hino ku Isi.

Abazitabira IYMS 2026 ni bo bazaba abacamanza b’iri rushanwa, bagahitamo filime zatsinze muri buri cyiciro.

Mu bikorwa bizatangazwa ku munsi wo gusoza iyi nama, harimo ubufatanye bushya na Ikirenga Art and Culture Promotion, umuryango ukorera i Kigali.

Uyu muryango uzafatanya na IYMS mu gutanga amahugurwa ya sinema ku rubyiruko rw’u Rwanda, gufasha mu gutoranya abazahagararira igihugu mu nama zizakurikiraho, ndetse no gukora imishinga ya filime izajya imurikwa ku rwego mpuzamahanga.

Mu itango rigenewe abanyamakuru, Umuyobozi wa Ikirenga Art and Culture Promotion, Pierre Hakizimana, yavuze ko urubyiruko rufite imbaraga zo guhindura Isi.

Ati "Urubyiruko ntirwategereje impinduka, ni rwo ruri kuziyobora. Ubuhanzi n’itangazamakuru ni intwaro zikomeye zo kubaka amahoro no guteza imbere kumvikana hagati y’imico itandukanye."

Umukinnyi wa filime akaba n’umuhanzi Jérémy Charvet, uzwi muri Le Bureau des Légendes, azaba ari ambasaderi w’iyi nama i Paris.

Mu gusoza iyi nama, hazatangazwa igihugu kizakira IYMS 2027, kikazaba ari ubwa mbere iyi gahunda igiye kubera muri Amerika y’Epfo (Latin America).

International Youth Media Summit ni umuryango mpuzamahanga uhuza urubyiruko rufite impano mu itangazamakuru na sinema, ukabafasha gukora inkuru zifite impinduka ku bibazo bikomeye Isi ihanganye na byo.

Binyuze muri filime n’indi mishinga y’itangazamakuru, IYMS itanga icyizere cy’uko urubyiruko rushobora kuba imbaraga nyamukuru mu kubaka Isi irangwa n’amahoro n’ubumwe.

Urubyiruko 60 ruvuye imihanda yose y’Isi rugiye guhurira i Paris, aho filime zizahinduka ijwi riharanira amahoro n’impinduka

I Paris, si ubuhanzi gusa, ni gahunda yo guhindura Isi! IYMS 2026 igiye kuvamo filime zivuga inkuru z’abatagira ijwi

Pierre Hakizimana ahamya ko urubyiruko rutegereje impinduka binyuze mu buhanzi n’inkuru zifite imbaraga