Muri 2025, ibihugu bitanu ni byo byonyine bizwi ko bitagira ibibuga by’indege, ahanini ni ukubera ubuto bwabyo cyangwa imiterere y’ubutaka yabyo. Aha turareba kimwe ku kindi, turebe aho biherereye, ubuso bifite, umubare w’abaturage, abayobozi, ifaranga rikoreshwa ndetse n’umugabane biherereyemo.
1. Andorra
Andorra ni igihugu gito cyane giherereye hagati ya Espagne n’u Bufaransa mu misozi ya Pyrenees. Gifite ubuso bwa kilometero kare 468 (468 km²) n’abaturage bagera ku 85,000.
Iki gihugu kiyoborwa n’abayobozi babiri bitwa “Co-Princes”, umwe aba ari Perezida wa Repubulika y’u Bufaransa, undi akaba Umupadiri wa Urgell wo muri Espagne.
Nta kibuga cy’indege gihari bitewe n’imisozi miremire igikikije, ariko gifite heliport nto ikoreshwa n’indege nto. Abagenzi bashaka kujya muri Andorra bakoresha ibibuga by’indege bya Espagne cyangwa u Bufaransa. Ifaranga rikoreshwa ni Euro (EUR), kandi kiri ku mugabane w’u Burayi.
2. Liechtenstein
Liechtenstein ni kimwe mu bihugu bito kurusha ibindi ku isi, gifite ubuso bwa 160 km² n’abaturage bagera kuri 40,000. Giherereye hagati y’u Busuwisi na Otirishe (Austria).
Umuyobozi mukuru w’iki gihugu ni Umwami Hans-Adam wa II, mu gihe Minisitiri w’Intebe ari Daniel Risch kuva muri Werurwe 2021.
Kubera ko ari igihugu cy’imisozi, nta kibuga cy’indege gishobora kuhaba. Abahatuye bakoresha ibibuga byo mu Busuwisi, cyane cyane Zurich Airport. Ifaranga rikoreshwa ni Swiss Franc (CHF), kandi igihugu kiri ku mugabane w’u Burayi.
3. Monaco
Monaco ni igihugu gito cyane giherereye ku nkengero z’Inyanja ya Méditerranée hafi y’umujyi wa Nice mu Bufaransa. Gifite ubuso bwa 2.08 km² n’abaturage bagera ku 38,600. Monaco iyoborwa n’Umwami Albert wa II, naho Minisitiri w’Intebe ari Didier Guillaume (yashyizweho muri Nzeri 2024).
Nta kibuga cy’indege gihari, ariko hari heliport ya Monaco ikoreshwa cyane n’abaherwe cyangwa abashyitsi baturutse mu Bufaransa. Abagenzi benshi bakoresha Nice Côte d’Azur Airport. Ifaranga rikoreshwa ni Euro (EUR), kandi igihugu kiri ku mugabane w’u Burayi.
4. San Marino
San Marino ni igihugu gito cyane gikikijwe n’Ubutaliyani (Italy). Gifite ubuso bwa 61.19 km² n’abaturage bagera kuri 34,000. Gifite abayobozi babiri bita Captains Regent, bahinduranywa buri mezi atandatu.
Nta kibuga cy’indege gihari, ariko gifite utubuga duto tw’indege. Abagenzi bakoresha Federico Fellini International Airport iherereye mu mujyi wa Rimini, mu Butaliyani. Ifaranga rikoreshwa ni Euro (EUR), kandi kiri ku mugabane w’u Burayi.
5. Vatican City
Vatican City ni cyo gihugu gito cyane ku isi, gifite ubuso bwa 0.44 km² n’abaturage bagera ku 882. Giherereye rwagati mu mujyi wa Roma mu Butaliyani.
Ubuyobozi bukuru burangajwe imbere na Papa, ubu ukuriye igihugu akaba ari Papa Leo wa XIV (guhera muri Gicurasi 2025).
Kubera ubuto bwacyo, Vatican nta kibuga cy’indege ifite, ariko ifite heliport ikoreshwa n’Umushumba wa Kiliziya Gatolika.
Ifaranga rikoreshwa ni Euro (EUR), kandi igihugu kiri ku mugabane w’u Burayi.
Inkomoko (Sources): WorldData.info