Mu itangazo ryashyizwe ahagaragara na UNESCO, El-Enany yavuze ko iyicwa ry'abanyamakuru ari igikorwa kibangamira ubwisanzure bw'itangazamakuru n'uburenganzira bw'abaturage bwo kubona amakuru.
Ati: "Namaganye iyicwa rya Alex Serna. Abanyamakuru bafite uruhare rukomeye mu kugeza amakuru ku baturage no gutuma amakuru abageraho mu bwisanzure. Kudahana abakora ibyaha nk'ibi ntibigomba kwihanganirwa. Ndasaba ubuyobozi bwa Mexique gukora iperereza ryimbitse no kugeza ababigizemo uruhare imbere y'ubutabera."
Alex Serna yakoraga nk'umunyamakuru wigenga, aho yatambutsaga inkuru zisesenguye, ndetse no gutambutsa amakuru atandukanye abinyujije kuri internet.
Inkuru ze zakundaga kwibanda ku bibazo bireba inyungu rusange, birimo iyangirika ry'ibidukikije, ruswa ikekwa mu nzego zitandukanye, ndetse n'imishinga y'iterambere itemewe n'amategeko yakorerwaga muri Leta ya Guerrero.
Amakuru avuga ko mbere y'urupfu rwe yari amaze igihe ahura n’iterabwoba inshuro nyinshi, bikekwa ko ryari rifitanye isano n'inkuru zicukumbuye yakoraga kuri ibyo bibazo.
Alex Serna yaburiwe irengero ku wa 20 Kamena 2026. Nyuma y'iminsi ibiri, ku wa 22 Kamena, umurambo we wabonetse hafi y'umuhanda uhuza Acapulco na Zihuatanejo, mu gace ka Petatlán muri Guerrero. Nyuma y'iperereza, ubuyobozi bwemeje ku wa 3 Nyakanga 2026 ko uwo murambo ari uwe.
Nk'uko bigaragazwa na UNESCO Observatory of Killed Journalists, Alex Serna ni umunyamakuru wa gatanu wishwe muri Mexique kuva umwaka wa 2026 watangira.
Nanone, ni we munyamakuru wa kabiri wishwe nyuma yo kuburirwa irengero, ibintu UNESCO ivuga ko bikomeje guteza impungenge ku mutekano w'abanyamakuru muri iki gihugu.
UNESCO ivuga ko ikomeje gushyira imbaraga mu guteza imbere umutekano w'abanyamakuru binyuze mu bukangurambaga, guhugura inzego zitandukanye no gukurikirana ishyirwa mu bikorwa rya ‘Gahunda y'Umuryango w'Abibumbye yo Kurinda Abanyamakuru no Kurwanya Kudahana Ababakoreraho Ibyaha.’
Ishimangira ko kurinda abanyamakuru atari ukurengera umwuga wabo gusa, ahubwo ari no kurengera uburenganzira bw'abaturage bwo kubona amakuru yizewe no gushyigikira demokarasi.
Iyicwa rya Alex Serna ryiyongereye ku rutonde rw'abanyamakuru bakomeje kwicwa mu bihugu bitandukanye, ibintu bikomeje gukangurira imiryango mpuzamahanga gusaba ko hakazwa ingamba zo kubarinda no gukurikirana mu butabera abagaba ibitero ku bakora umwuga w'itangazamakuru.