Lindsay Foreman w’imyaka 53, ufungiwe muri gereza izwi cyane ya Evin Prison i Tehran, yanditse igisigo yise “Ijwi Ribabaje Riturutse muri Gereza ya Evin – Igisigo cya Noheli” [A Sad Voice From Evin Prison - A Christmas Poem]. Muri icyo gisigo, yagaragaje agahinda kenshi ko kuba kure y’abe mu gihe cy’iminsi mikuru.
Yagize ati: “Mu gihe twagakwiye kuba turi hamwe kandi duhujwe, twisanze turi twenyine, ducitse intege kandi twihebye.”
Yakomeje avuga ko umuryango wabo “wacitsemo ibice”, anongeraho ko agahinda “gatuye mu mwobo uri mu mitima yacu.”
Ijwi rye ryumvikanye ku mugaragaro bwa mbere kuva yafungwa, nyuma y’uko BBC isangije amajwi ye ari gusomera umwana we igisigo kuri telefone, agisomera mu muryango wa gereza urimo urusaku rwinshi.
Foreman yavuze ko yanditse icyo gisigo agikoreye umuryango we, ariko anagitura “abantu bose baba baratakaje ababo, cyangwa Noheli ikaba itakibabera igihe cy’ibyishimo.”
We n’umugabo we Craig Foreman bari bari mu rugendo bise “urugendo rw’ubuzima bwabo”, bagenda kuri moto bava muri Espagne berekeza muri Australiya, ubwo bafatwaga n’inzego z’umutekano za Iran muri Mutarama uyu mwaka, bashinjwa ibyaha by’ubutasi (espionage). Umuryango wabo uvuga ko ibi birego ari “ibinyoma bidafite ishingiro.”
Bombi bari bafite visa zemewe, bayobowe n’umuyoboro w’ingendo (tour guide), ndetse n’inzira y’urugendo yari yarahawe uburenganzira mbere. Umuryango wabo uvuga ko ibibazo Lindsay yajyaga abaza abantu mu nzira—bijyanye n’icyitwa “ubuzima bwiza”—ari byo byahinduwe impamvu yo kubashinja.
Kuri ubu, bombi bafungiye muri gereza ya Evin, ariko bafungiwe mu byumba bitandukanye. Iyi gereza ni imwe mu zizwiho gufungirwamo abantu benshi bazwi ku rwego mpuzamahanga, barimo na Nazanin Zaghari-Ratcliffe wahoze afungiwe aho.
Umuryango uvuga ko bafungiye mu bihe bibi cyane: utuzu twuzuye abantu, umwanda, udukoko n’imbeba, ndetse n’ibikoresho bike by’isuku n’amazi yo kwiyuhagira adahagije. Umwana wa Lindsay, Joe Bennett, yabwiye BBC ko yabwiwe n’ababyeyi be ko imbeba zicicikana aho bategurira amafunguro.
Yavuze kandi ko bombi badafata indyo ihagije, bakaba bari kugabanuka ibiro. Craig Foreman ngo afite ububabare bukabije bw’amenyo, ariko ntiyemerewe kubona umuganga w’amenyo.
Nyuma yo kujya mu myigaragambyo yo kwiyicisha inzara mu kwezi gushize, ubu bemerewe kuvugana n’umuryango wabo hafi buri munsi kuri telefone. Ariko Joe avuga ko nubwo nyina agerageza kwihagararaho imbere ye, yumvise incuro nyinshi arira anasaba gutaha.
Ati: “Mama na data barimo gucika intege gahoro gahoro, bafite agahinda kenshi kandi kari kwiyongera.”
Yasabye Leta y’u Bwongereza “gushyira ahagaragara ukuri ikabarengera, ikavuga ku mugaragaro ko atari abatasi.”
Minisiteri y’Ububanyi n’Amahanga y’u Bwongereza yatangaje ko “ifite impungenge zikomeye” ku birego bashinjwa, ikemeza ko ikomeje kubiganiraho n’inzego za Iran. Minisitiri w’Ububanyi n’Amahanga, Yvette Cooper, bivugwa ko yabigarutseho mu biganiro yagiranye na mugenzi we wa Iran, Abbas Araqchi, mu cyumweru gishize.
Guverinoma y’u Bwongereza igira inama abaturage bayo kudasura Iran, igira iti: “Kuba ufite pasiporo y’u Bwongereza cyangwa aho uhurira n’u Bwongereza bishobora kuba impamvu ihagije yo gufatwa.”
Nubwo Lindsay na Craig Foreman bamaze kugaragara mu nkiko inshuro nyinshi, ntibarakatirwa cyangwa ngo bacirwe urubanza ku mugaragaro.
Mu gusoza igisigo cye, Lindsay yandikiye umuryango we ati: “Twifuza ko twaba turi hamwe, tugahoberana tukagumana iteka.”
Ku mwana we Joe, gutekereza kuri Noheli nta babyeyi be biramugora cyane. Ati: “Birababaje bikabije. Bari umutima n’ubuzima bwa Noheli.”
Lindsay na Craig Foreman bamaze umwaka bafungiye muri Iran kuva muri Mutarama 2025