Uwo mwana yitwa Laurent Simons. Mu Ugushyingo 2025, Laurent yanditse amateka nyuma yo kubona impamyabumenyi y'ikirenga (PhD) muri Quantum Physics afite imyaka 15 gusa, nyuma yo gusobanura ubushakashatsi bwe muri University of Antwerp. Ibi byatumye aba umwe mu bantu bake cyane babonye PhD muri iri shami rikomeye rya siyansi.
Inkuru ya Laurent ntiyatangiye afite imyaka 15. Yatangiye kuvugwa ku isi akiri muto cyane kubera uburyo yatwaraga amasomo ye ku muvuduko udasanzwe. Mu gihe abana benshi bamaraga imyaka 12 cyangwa 13 batarangiza amashuri yisumbuye, Laurent yayarangije afite imyaka 8 gusa.
Ubwo benshi mu bana bagenzi be bari bagitangira kwiga algebra n'iby’ibanze muri siyansi, we yari amaze kwinjira muri kaminuza. Nyuma yaho yabonye impamyabumenyi ya Bachelor akiri muto cyane, akurikizaho Master's Degree muri Quantum Physics afite imyaka 12. Ibyo byatumye benshi batangira kumwita "Little Einstein", bisobanura "Einstein muto".
Ese Quantum Physics ni iki gituma abantu batangara?
Quantum Physics ni rimwe mu mashami ya siyansi atoroshye cyane ku isi. Ni ryo ryiga ibintu bito cyane bitagaragara n'amaso yacu, nk'uduce duto tugize atomu. Muri iyo si ya quantum, ibintu bikora mu buryo butangaje ku buryo rimwe na rimwe bisanisha n'ibitangaza.
Ni yo mpamvu kubona umuntu mukuru abona PhD muri Quantum Physics biba ari inkuru. Noneho ikaba yabonywe n’umuntu w'imyaka 15? Ni cyo cyatumye amazina ya Laurent agera mu binyamakuru byo hirya no hino ku isi.
Ubushakashatsi bwe bwari bwerekeye iki?
Amakuru yasohotse ku rubuga Science Alert agaragaza ko Laurent atanditse thesis yoroshye. Ubushakashatsi bwe bwiswe: "Bose Polarons in Superfluids and Supersolids."
Ni ubushakashatsi bwiga uko agace kamwe kitwara iyo kari mu bidukikije bya quantum bikonje cyane. Iyi ni imwe mu ngingo ziri ku rwego rwo hejuru cyane muri Quantum Physics kandi zifasha abahanga gusobanukirwa neza imiterere y'ibintu bigize isi.
Mu magambo make, mu gihe bamwe mu bana b'imyaka 15 baba bari gukora ubushakashatsi ku mishinga yo ku ishuri, Laurent we yari ari gushakisha ibisubizo ku bibazo bikomeye byugarije isi ya siyansi.
Abantu benshi batekerezaga ko nyuma yo kubona PhD afite imyaka 15 yari guhagarara akishimira amateka yanditse. Ariko si ko byagenze.
Akimara kurangiza doctorate ye ya mbere, Laurent yatangaje ko agiye gutangira indi doctorate mu by'ubuvuzi n'ubwenge bw'ubukorano (AI). Intego ye ni ugushaka uburyo siyansi yafasha abantu kubaho igihe kirekire kandi bafite ubuzima bwiza.
Mu kiganiro yagiranye n’itangazamakuru, yavuze ko ashaka gukoresha AI n'ubuvuzi mu gusobanukirwa neza gusaza kw'umubiri, indwara ndetse n'uburyo ubuzima bwa muntu bwarushaho kuramba.
Kuki isi ikomeje kumwitegereza?
Kuko Laurent Simons atari gusa umwana ufite amanota menshi. Ni umwana wageze ku rwego abahanga benshi bamara imyaka 30 cyangwa 40 bagerageza kugeraho.
Ku myaka 15 gusa yari amaze kuba doctor muri Quantum Physics, kandi aho guhagararira aho, yahise atangira gutekereza ku bibazo bikomeye birimo indwara, gusaza ndetse n'ejo hazaza h'ikiremwamuntu.
Ni yo mpamvu iyo abantu bavuga Laurent Simons, batavuga gusa umwana w'umuhanga. Bavuga umwana ushobora kuzavamo umwe mu bashakashatsi bazagira uruhare mu guhindura uburyo abantu babaho mu myaka iri imbere.
Icyo kibazo ni cyo gikomeje gutera benshi amatsiko: Ese uyu mwana watunguye isi afite imyaka 15, azaba ageze hehe ku myaka 30.