Ku wa Kabiri tariki ya 31 Werurwe 2026 ni bwo DR Congo yatsinze Jamaica 1-0 mu mukino wa kamarampaka wo gushaka itike y’igikombe cy’Isi cya 2026 kizabera muri Leta Zunze Ubumwe za Amerika, Canada na Mexico.
Iki gitego cyabonetse ku munota wa 100 gitsinzwe na Axel Tuanzebe akoresheje umutwe ku mupira wari uvuye muri koroneri nyuma y’uko iminota isanzwe y’umukino 90 yari yarangiye ari 0-0 bituma hongerwaho 30.
Congo yahise ikatisha itike y’Igikombe cy’Isi cya 2026 nyuma y’imyaka 52 itagikina.
Umuvugizi wa Guverinoma y’u Rwanda, Yolanda Makolo abinyujije kuri X yayishimiye. Yanditse ati: ”Umupira w’amaguru ni mwiza kuko ikipe igizwe n’abantu baturutse mu ntara zitandukanye, bavuga indimi zitandukanye kandi bafite amateka atandukanye yambara umwambaro umwe igatuma igihugu cyose kigira inzozi. Uwo mwuka w’ubumwe ni uw’agaciro cyane ku buryo udakwiye guhinduka urwango. Mwakoze cyane! #Fimbu”.
Ubwo ikipe y’igihugu ya Congo yaherukaga mu gikombe cy’Isi byari mu 1974 yitwa Zaïre. Itsinda yari irimo muri iki gikombe cy’Isi cyabereye mu Budage, yari iri kumwe na Ecosse/Scotland na Yugoslavia na Brazil. Zaïre yatsinzwe imikino yayo itatu, harimo uwo yahuriyemo n'akaga ubwo Yugoslavia yayitsindaga ibitego 9 ku busa.
Mu gikombe cy’Isi cya 2026 Congo izaba iri mu itsinda ririmo Portugal, Colombia na Uzbekistan. Umukino wayo wa mbere izawukina na Portugal kuri NRG Stadium mu mujyi wa Houston muri leta ya Texas muri Amerika.