Uyu mukino wabereye kuri Stade ya Mercedes-Benz Stadium, u Bwongereza bwari bwafunguye amazamu ku munota wa 55 binyuze kuri Anthony Gordon, wari uhawe umupira na Morgan Rogers.
Nyuma yo kujya imbere, Tuchel yakoze impinduka zirimo gukuramo Gordon ashyiramo myugariro Ezri Konsa, anongeramo Dan Burn na Nico O'Reilly, ibintu byatumye ikipe ihindura uburyo ikina ijya kuri ba myugariro batanu.
Icyakora, uyu mugambi ntiwahiriye u Bwongereza kuko Argentine yaje kwishyura ku munota wa 85 ibifashijwemo na Enzo Fernandez, mbere y'uko Lautaro Martinez atsinda igitego cy'intsinzi mu minota y'inyongera, gihesha ikipe ye itike yo gukina umukino wa nyuma w’igikombe cy’Isi cya 2026 aho izahura na Espagne.
Nyuma y'umukino, Tuchel yavuze ko ibyemezo yafashe byari bishingiye ku isesengura yari yakoze kandi ko atabona impamvu yo kubyicuza.
Yagize ati: "Abatoza bashobora kubiganiraho mu buryo butandukanye, ariko icyemezo gifatirwa mu kibuga ni icyanjye. Nta cyo nicuza kuko abakinnyi batanze imbaraga zose kandi twari hafi cyane yo kugera ku ntsinzi. Ntekereza ko twakinnye umwe mu mikino myiza twagize muri iri rushanwa."
Uyu Mudage yavuze kandi ko yahisemo kongeramo ba myugariro nyuma yo kubona ko Argentine yari yatangiye kubona amahirwe menshi binyuze mu mipira yambukaga imbere y'izamu.
Ati: "Twahisemo gukina n'aba myugariro batanu kugira ngo dufunge icyuho hagati no guhangana n'imipira yo mu kirere kuko bari batangiye kuduteza ibibazo byinshi. Iyo bitagenze neza, biroroshye kuvuga ko umutoza yafashe icyemezo kitari cyo, ariko inshingano ni izanjye."
Nubwo basezerewe, Tuchel yashimangiye ko ikipe ye yagaragaje umutima ukomeye muri iri rushanwa, avuga ko yakinnye n'amakipe akomeye, ikagenda ingendo ndende, ikinira ahantu hirengeye ndetse no mu bushyuhe bwinshi, ariko igakomeza kwitwara neza.
Ku bijyanye n'ahazaza he nk'umutoza w'u Bwongereza, Tuchel yavuze ko akiri mu masezerano azageza mu 2028, bityo nta cyahindutse ku mwanya we.
U Bwongereza buzatana mu mitwe n'u Bufaransa mu mukino wo guhatanira umwanya wa gatatu, uzabera i Miami, mbere y'uko iri rushanwa risozwa n'umukino wa nyuma uzahuza Argentine na Espagne.
Umutoza w’u Bwongereza ntacyo yicuza ku mahitamo yakoze agatuma batsindwa na Argentine