Uyu mukino uzabera kuri Atlanta Stadium, aho u Bwongereza buzaba bushaka kugera ku mukino wa nyuma w'Igikombe cy'Isi ku nshuro ya mbere kuva mu 1966, mu gihe Argentine iri guhatanira kugumana igikombe yegukanye.
Gusa Polisi ya Atlanta yavuze ko yamaze kongera abashinzwe umutekano n'ibikoresho bizakoreshwa hirya no hino mu mujyi, cyane cyane hafi ya sitade, ahateranira abafana ndetse no mu bice bikunze kunyuramo abantu benshi
Mu itangazo ryagiye atagaragara yagize iti: "Twashyizeho ingamba zihariye zigamije kurinda abaturage n'abashyitsi, gukumira ibikorwa by'ubugizi bwa nabi no gutuma buri wese yishimira iri rushanwa mu mutekano."
Izi ngamba zije kubera amateka akomeye ari hagati y'u Bwongereza na Argentine, by'umwihariko intambara ya Falklands "Las Malvinas" nk'uko yitwa muri Argentine yabaye mu 1982, yahitanye abasirikare n'abasivili benshi. N'ubwo imyaka ishize ari myinshi, ikibazo cy'ubusugire bw'ibi birwa kiracyari impaka hagati y'ibihugu byombi.
Nyuma y'uko Argentine isezereye Misiri iyitsinze ibitego 3-2 muri 1/8 cy'irangiza, bamwe mu bakinnyi bayo bagaragaye baririmba indirimbo ivuga ku birwa bya Malvinas ndetse inashimira ibyamamare Diego Maradona na Lionel Messi.
Maradona nk'umwe mu bakinnyi bazibukirwa cyane mu mateka y'imikino yahuje ibi bihugu, nyuma yo gutsinda igitego cyiswe "Hand of God" mu Gikombe cy'Isi cya 1986, ubwo Argentine yasezereraga u Bwongereza. Ubu na ho Lionel Messi ategerejwe gukina umukino we wa mbere w'Igikombe cy'Isi ahanganyemo n'u Bwongereza.
Mu rwego rwo kwirinda ko amateka ya politiki yivanga muri ruhago, Ihuriro ry'abarwanye intambara yo ku wa 2 Mata muri Argentine ryasabye abafana kwibanda ku mupira w'amaguru aho kwinjiza ibibazo bya politiki muri uyu mukino.
Ryagize riti: "Ubusugire bw'igihugu burwanirwa mu nzira za dipolomasi no mu mahuriro mpuzamahanga, si mu kibuga cy'umupira. Umupira urakinwa, ishema ry'igihugu rikiyongera, ariko amateka akaguma yibukwa."
Polisi kandi yashimiye abafana b'u Bwongereza bageze muri Amerika kubera imyitwarire myiza bagaragaje, ariko isaba abasigaye mu Bwongereza kubigana nyuma y'uko mu mpera z'icyumweru gishize habaye ibikorwa birenga 500 bifitanye isano n'umupira w'amaguru, harimo n'abantu barenga 100 batawe muri yombi nyuma y'umukino batsinzemo Norway ibitego 2-1.