Komisiyo y'Ubumwe bw'u Burayi yatangaje ko Google yarenze ku mategeko ya Digital Markets Act (DMA), agamije kurinda ihiganwa ryiza hagati y'ibigo bikora mu rwego rw'ikoranabuhanga.
Nk'uko EU ibivuga, Google yashyiraga imbere serivisi zayo ku rubuga rwa Google Search ndetse no muri Google Play Store, bigatuma izindi porogaramu n'ibigo bitabona amahirwe angana yo kugera ku bakoresha internet.
Teresa Ribera, umwe mu bayobozi ba Komisiyo y'Ubumwe bw'u Burayi ushinzwe amarushanwa n'ubukungu, yavuze ko ibicuruzwa byiza bikwiye gutsinda kubera ubuziranenge bwabyo, aho gutsinda kubera ko ari iby'isosiyete igenzura urubuga abantu benshi bakoresha.
Yagize ati: "Abaguzi bo mu Burayi bafite uburenganzira bwo kubona amahitamo meza kandi ahendutse. Isosiyete igenzura urubuga ntigomba kubangamira iryo higanwa."
Iyi hazabu ni imwe mu zikomeye Google yaciwe n'Ubumwe bw'u Burayi mu myaka yashize. Mbere y'aho, uru rwego rwari rumaze guca Google izindi hazabu zibarirwa muri miliyari z'amayero kubera ibibazo bifitanye isano no guca intege amarushanwa ku isoko.
Komisiyo yavuze ko Google ifite iminsi 60 yo gukosora ibyo ishinjwa. Nitabikora, ishobora kongera gucibwa izindi nzego z'ihazabu.
Google yahise yamagana iki cyemezo. Kent Walker, ushinzwe ibikorwa mpuzamahanga muri Google, yavuze ko iki cyemezo kizabangamira abakoresha internet bo mu Burayi.
Yavuze ko Google ishobora gusabwa gukuraho serivisi zimwe abantu basanzwe bakoresha, zirimo amakuru y'ibiciro by'amahoteli, indege na resitora agaragara ako kanya muri Google Search. Yagize ati: "Ibi si ihiganwa ryiza."
Google ishobora kujuririra iki cyemezo nk'uko yagiye ibikora no ku zindi manza zabanje. Digital Markets Act (DMA) ni amategeko mashya yatangiye gukurikizwa mu Burayi mu 2024.
Ayo mategeko agamije kugenzura ibigo bikomeye by'ikoranabuhanga, bizwi nka "gatekeepers", birimo Google, Apple, Meta, Amazon, Microsoft na ByteDance.
Intego ni ukubuza ibyo bigo gukoresha ububasha bifite kugira ngo bibangamire amarushanwa cyangwa bibuze izindi sosiyete amahirwe yo kugera ku bakiriya.
Mu mwaka ushize, Apple na Meta na zo zaciwe izindi hazabu zibarirwa muri miliyoni z'amayero kubera kutubahiriza ayo mategeko.
Icyemezo cyo guca Google ihazabu ya miliyari $1 cyerekana ko Ubumwe bw'u Burayi bukomeje gukaza amategeko agenga ibigo bikomeye by'ikoranabuhanga.
Mu gihe Google ivuga ko ibi bishobora kugabanya serivisi zimwe abaturage bakoresha buri munsi, EU yo ivuga ko ari intambwe ikenewe kugira ngo habeho ihiganwa ringana hagati y'ibigo byose bikorera ku isoko rya internet.
Source:Al Jazeera