Mu gitondo cyo kuri uyu wa Gatanu tariki 05 Ugushyingo 2021 ni bwo Janvier Popote yasangije abakunzi be kuri Twitter - akurikirwaho n'abarenga ibihumbi 34.2 - amafoto y'umuhango wo gusezerana imbere y'amategeko n'umukunzi we Allen yakunze kurusha abandi bakobwa bose. Munsi y'ayo mafoto yanditse ati: "Umugore wanjye, ubuzima bwanjye. Nizeye ibyiza muri uru rugendo rushya". Yakurikijeho emoji y'umutima.
Abantu banyuranye barimo ab'amazina azwi mu myidagaduro bagaragarije Popote ko batewe ishema n'intambwe yateye yo kuva mu buseribateri. Muri abo harimo: Rigoga Ruth, Patycope, Cyuzuzo Jeanne d'Arc, Eric Shaba, Edmund Kagire n'abandi. Bamubwiye ko ateye intambwe nziza yo kurushinga bamwifuriza kuzagira ibihe byiza mu rushako. Bamwe muri bo ni ukuvuga abamaze kurushinga bamuhaye ikaze mu muryango mugari w'abantu bubatse ingo.
Popote na Allen basezeranye imbere y'amategeko
Nyuma y'uko Popote na Allen basezeranye imbere y'amategeko ya Leta mu muhango wabaye Ejo tariki 4 Ugushyingo 2021 ukabera mu Murenge wa Niboye muri Kicukiro, ubu aba bombi bari mu myiteguro yo kwambikana impeta imbere y'Imana n'imbere y'abantu. Tariki 14/11/2021 ni bwo hazaba imihango yo gusaba no gukwa izabera i Kanombe, gusezerana imbere y'Imana nabyo bizaba kuri iyo tariki kuri Relax Garden muri Kimironko mu mujyi wa Kigali nk'uko Popote yabitangarije InyaRwanda.com.
Nshimyumukiza 'Janvier Popote' afite Impamyabumenyi y'Icyiciro cya Kabiri cya Kaminuza yakuye muri Kaminuza Nkuru y'u Rwanda muri 2013, mu Ishuri ry'Itangazamakuru n'Itumanaho. Ni umunyamakuru urambye mu mwuga w'itangazamakuru dore ko awumazemo imyaka 10, akaka yibanda ku makuru y'Ubutabera, Ubuzima n'Imyidagaduro muri iyo myaka yose amaze mu itangazamakuru.
Popote yakoreye ibitangazamakuru bitandukanye kandi bikomeye birimo: Radio Salus, Radio Huguka, Izuba Rirashe (ya The New Times) yakoreye nk'Umutokozi w'inkuru (Editor) kuva mu 2013 kugeza mu Ugushyingo 2018 ubwo iki kinyamakuru cyafungwaga. Yavuye muri The New Times yerekeza mu Imvaho Nshya nka 'Editor' ahamara umwaka n'amezi 6. Kuva mu mwaka wa 2020 Popote yatangiye gukorana Radio Mpuzamahanga y'u Budage “Deutsche Welle" ariko ayikorera ari mu Rwanda.
Mu 2019 ni bwo Popote yatorewe kuba Umunyamabanga Nshingwabikorwa 'SG' w'Ishyirahamwe ry'Abanyamakuru bo mu Rwanda (ARJ) muri Manda y'imyaka itatu. Hejuru y'izo nshingano afite, ubuakorera Radio Isango Star kuva mu 2012 (ayimazeho imyaka 9) ndetse akanakorera igitangazamakuru cye yise popote.rw gifite umwihariko wo kwandika inkuru mu rurimi rw'Igiswahili kikanagira Televiziyo ikorera kuri Youtube yitwa Popote Tv.
Allen ni umugore wa Popote mu buryo bwemewe n'amategeko
Popote na Allen barebana akana ko mu jisho