Iri siganwa ryabaye mu ijoro ryo ku wa Kabiri i Glasgow muri Scotland, ryakinwe mu mvura nyinshi yatumye ikibuga gitoha cyane ndetse bigora abakinnyi gukomeza umuvuduko.
Cherop w'imyaka 20 y'amavuko yabuze urukweto rwe yari yambaye hasigaye metero 4,000 ngo isiganwa rirangire, nyuma yo gusunikana n'abandi bakinnyi bari mu itsinda ry'imbere.
Yagerageje kurwambara bundi bushya ariko biranga, ahitamo kuruta akomeza kwiruka yambaye urundi rukweto rumwe gusa, ukuguru kumwe gusigara kwambaye isogisi.
Nubwo ibyo byamugabanyirije umuvuduko mu kanya gato, Cherop yongeye kwisuganya maze asoza isiganwa akoresheje iminota 27 n'amasegonda 56.68, igihe cyabaye icyiza kurusha ibindi byose yari yarigeze gukoresha muri metero 10,000.
Mu bakinnyi batatu Uganda yari yohereje muri iri siganwa, Cherop ni we wasoje imbere yabo bose. Dan Kibet yabaye uwa 11 akoresheje iminota 28:05.84, mu gihe Oscar Chelimo yabaye uwa 12 akoresheje 28:10.49.
Umudali wa zahabu wegukanywe n'Umunya-Australia Ky Robinson, wakoresheje iminota 27:48.93, akurikirwa n'Umuhinde Gulveer Singh wegukanye ifeza, naho David Mullarkey ukomoka ku kirwa cya Isle of Man yegukana umuringa.
Robinson yavuze ko isiganwa ryari rikomeye kubera gusunikana kwinshi n'imvura nyinshi, bityo buri mukinnyi akaba yarasabwaga kwitwararika kugira ngo adahanuka.
Iri siganwa ryanasize Uganda itakaje ubwiganze yari imaze imyaka myinshi ifite muri metero 10,000 muri Commonwealth Games, kuko yari imaze gutwara ibikombe bitanu bikurikirana kuva mu 2006, binyuze kuri Boniface Kiprop, Moses Kipsiro, Joshua Cheptegei ndetse na Jacob Kiplimo wari uheruka kwegukana iri siganwa.
Si ubwa mbere umunyafurika agaragaje ubudahangarwa nyuma yo kubura urukweto mu isiganwa rikomeye. Mu 2018, Umunya-Kenya Conseslus Kipruto yegukanye intsinzi muri Diamond League ya steeplechase nyuma yo kwiruka imirongo irenga itandatu yambaye urukweto rumwe gusa.
Mu 1993 na bwo, Moses Tanui yabaye uwa kabiri muri metero 10,000 muri Shampiyona y'Isi nyuma yo guta urukweto ubwo Haile Gebrselassie yari amaze kumukandagira ku gatsinsino.