Umukuru w’amagereza yeguye nyuma y’uko kwica Christa Pike wakatiwe urwo gupfa binaniranye

Guverineri wa Tennessee, Bill Lee, yatangaje kwegura kwa Komiseri w’amagereza Frank Strada ku wa Gatandatu, nyuma y’igeragezwa ryo gushyira mu bikorwa igihano cy’urupfu cya Pike ryabaye ku wa Gatatu.

Strada yavuze ko yafashe umwanzuro wo kwegura kuko ari wo “muri iki gihe uri mu nyungu nziza za Tennessee”, anashimangira ko iperereza ku byabaye rikenewe kandi rigomba gukorwa mu buryo bwimbitse.

Christa Pike yakatiwe igihano cy’urupfu mu 1996 nyuma yo guhamwa n’icyaha cyo kwica Colleen Slemmer.

Ku munsi igihano cye cyagombaga gushyirwa mu bikorwa, Pike yatewe inshinge inshuro ebyiri ariko ntizamwica.

Nyuma y’igeragezwa ry’icyo gihano, yajyanywe mu bitaro byo muri Tennessee, aho akomeje gukurikiranwa n’abaganga.

Abanyamategeko be bahise batangira gusaba ko igihano cy’urupfu yakatiwe kigabanywa, bavuga ko ibyabaye bigaragaza ibibazo bikomeye mu buryo icyo gihano cyageragejwe gushyirwa mu bikorwa.

Guverineri Bill Lee yahise ategeka ko hakorwa iperereza ryigenga ku byabaye, ndetse ahagarika ibindi bihano by’urupfu byose byari biteganyijwe muri Tennessee muri uyu mwaka.

Nk’uko tubikesha ikinyamakuru BBC News, mu itangazo ryashyizwe hanze, Lee yashimiye Strada ku kazi yakoze, avuga ko yagaragaje ubunyamwuga n’ubunyangamugayo kandi ko yagaragaje ubushake bwo gushyira imbere inyungu za Tennessee.

Ku ruhande rw’abanyamategeko ba Pike, bavuze ko ukwegura kwa Strada “gufite ishingiro”, ariko bagaragaza ko ibyo byonyine bidakemura ikibazo cy’umukiriya wabo.

Bagize bati: “Ibyamubayeho ku wa Gatatu bigaragaza ko habayeho kunanirwa mu mikorere ya sisitemu kurenze kure umuntu umwe uwo ari we wese.”

Ibyabaye kuri Pike byatumye hongera kuvuka impaka ku buryo ibihano by’urupfu bishyirwa mu bikorwa, cyane cyane ku bijyanye no kubazwa inshingano igihe igihano kitagenze nk’uko byari biteganyijwe.